دارت الدنيا لتدق طبول قلبي

البارت الخامس والعشرون

تعاندنا وصفينا ثنين مجروحين..
دقت طبول الحرب.
بقلمي عبير ادريس..

اخذله صفنه وكال..
ضيغم : اصبر بس ابدل خمس دقايق..
اني وادهم حجينا سوه.

_ ليش انت يايوم بدلت بخمس دقايق..
خبلناه ظل يباوع علينا ،سكت ماجاوب ، طلعنا وعفناه على نفس وكفته...

مجرد عبرنا باب العمارة انتهيت من الضحك وادهم وجها صار احمر كاتم ضحكته ، صعدنا بالسيارة التفت عليه كال..

ادهم : كافي لج منا الناس ..

ملاك : اجانب يا ادهم .

ادهم : وان يكن ننسى دينا..

ملاك : لا طبعاً..

سكتنا بعدين التفتت عليه من باب الفضول سألت..

ملاك : المواقف الصارت ويه ضيغم بس حتى تردلي اعتباري وتحسن علاقتنا لو اكو شغلة ثانية ابالك...

التفت رمقني بنظره سريعة ورجع يسوق ..

ادهم : اول شغلة ردت احسسه بقيمتج وغلاتج عندنا ، خليته يحس اكو سند عندج اذا حاول يستخف بيج تطلع وراج اسود تاكله ..

ضحكت من كل كلبي لان صدك اول مرة بحياتي احس عندي سند من اهلي عدا صعب طبعاً ذاك منتهين منه شلون جان يخاف عليه ويوكفلي بكل شده اوكع بيها صح ما يحسسهم ومن بعيد لبعيد يتشغل بس يحل مشكلتي عن بعد..
ملاك : واليوم شنو راح تسوي الله عليك كولي ماريد انصدم واظل مثل الثولة بس اضحك..

ادهم : مممم اليوم راح اوصله رسالة صغيرة وبس.

ملاك : وهي؟
ادهم : وردته اذا هملها راح ييجي غيره يسقيها بكل سهوله..

ملاك : مممممم.

ظليت كل شويه اضحك..

ادهم : اي شكو عليج اضحكي.

ملاك : بجالك اضحك وبجالك لكيت نفسي..

ادهم : هذا واجبي مو تفضلاً مني..

ملاك : ربي يخليلك سيلين ومريم واحبابك كلهم.

ادهم : ربي يسمع منج..

بعدها سكتنا ، الجو جان كلش حلو غائم وبارد والزرع خضاره فاقع يريح العين ، فتحت الجامة اريد استنشق هوى ، التفت عليه كال..

ادهم : هسه تتمرضين الجو بارد وماشي سريع..

ملاك : محتاجة استنشق هوى..

ادهم : براحتج..

الهوى يضرب بوجهي وعيوني تتفحص الطبيعة بتأمل ولساني يلهج بذكر الله ، شنو اشوف اكول سبحانك ربي ما اعظمك ، غمضت عيني وسافرت للعراق بلحظات بسيطة بس شكد تعذبت بيها جريت نفس وفتحت عيني حتى ارجع لواقعي ، التفتت على ادهم سألته..
ملاك : شكد بعد ونوصل..