دارت الدنيا لتدق طبول قلبي

بارت الخامس عشر

صعب
انه المنطيك كلب ابيض
عليش تخلي اصبعي من الندم ينعض.
عليش تخلي حجيي الما حجيته وياك يم الغربه يتفضفض...

ملاك
اني وين وانت وين
اني قصتي وياك قصة
انكتبت بورقة قديمة وخط حزين...

ضيغم
حيلي باد
والله راد
واخ يارب العباد
بكد رحمتك شايف من الدنيا ويل
بكد قدرتك ناحل ومابيه حيل
شمستفاد

___________

مرت الأيام بصعوبة وانتشر الخبر بكل العشيرة سبب طلاقي من ضيغم هو اتفاق بيني وبينه علمود يستر عليه ،وكل يوم موقفي يكون اسوء من اليوم القبله وصارت سمعتي على كل لسان وبرائتي صارت بيد ضيغم ، اتصلت بيه عده مرات من تبارك ما يجاوب وحتى على اتصالات اهله صار مايرد كلش حقدت عليه ، صح الصار صعب عليه بس مو اصعب من موقفي هذا ..

صعب ما ادري بيه وين ماوين موبايلي من سحبوه مني بعد ما اخذته لهذا ماكدرت اتواصل وياه ..

كل يوم اسمع حجي شكل واشاعات شكل نستني حبي لصعب ونستني الدنيا كلها ، الى ان بيوم طكت روحي وقررت ما اسكت...

جان يوم ثلاثاء وبيت جد ضيغم كلهم ملتمين يمنا امه عازمتهم على غده، جنت كاعدة بغرفتي فوك وقررت انزل اريد اسكت كل حلك يحجي عليه حتى لو اعرف مصيري الموت.

بنزلتي سمعت صوت ثنين يتهامسون وحده تكول ..

_ انتِ مو كلتي راح اسويلج سحر يم وحدة مضبوطة وافرقهم شو رجعت..

الثانية جاوبتها..
_ العلية سويته وشفتي بعينج صحتها تدهورت وصار الانفصال شلون رجعت ما اعرف احتمال السحر خلص مفعوله انطيني فلوس اجدده الج..

_ لا انتِ كلتي ضيغم يرجعلج وهذا جان من ضمن الاتفاق ليش سافر وحتى ما سأل عليه مو كلتي راح احرك كلبه عليج.

مشيت على كيفي ورحت لغرفة تبارك لكيتها كاعدة اشرتلها تعالي اجتي.

تبارك : ها ملوكة شكو.
ملاك : بس تعالي اسمعي ..

سحبتها من ايديها ورحنا وكفنا بنفس المكان وسمعنا باقي الحجي ، تبارك من النوع ماتتحمل الظلم بسرعة تحجي وماتجامل احد على الغلط ..

تبارك : هاي شنو عيني طلعن بنات خالاتي سحارات..

فزن ثنينهن وحجن بصوت يرجف بس يبينن مسيطرات.

_ سحريش انتِ فاهمة غلط احنا جنا نحجي على صديقتنا وبعدين مو عيب عليج تتسنطين علينا..

تبارك : عيب عليه مو ؟ هسه اشوفجن العيب على اصوله..

نزلت تبارك تركض ونزلت وراها وهنه هم نزلن ، خالاتها مجتمعات كلهن وحتى نسوان خوالها حجتلهم تبارك السمعناه كله ، وحده من الخالات ام البنيه التحب ضيغم كالت..

_ شوفوا شوفوا صايرات مثل الحكومة من يصير حدث قوي يطلعون حدث اقوة منه حنى يلهون الشعب بيه ..