دارت الدنيا لتدق طبول قلبي

البارت السادس والثلاثون

ضيغم

لِماذا أُحبُّكِ رغم اعتِرافي
بأنَّ هَوانا محالٌ .. مُحالْ ؟

ورغم اعتِرافي بأنَّك وَهمٌ
وأنك صُبحٌ سريعُ الزَّوالْ

ورغمَ اعترافي بأنك طيفٌ
وأنك في العِشقِ بعضُ الخَيال

ورغم اعترافي بأنك حلمٌ
أُطاردُ فيه وليس يُطالْ

_______

Back to the past
عودة الى الماضي

ايفين

اهلاً وسهلاً من جديد...

اليوم موعد رجعونا للعراق ، اتخذت السكوت بسبب اعصاب فهد الفالتة ، لا يرى ولا يسمع بس يحجي وياريت بس هيج لا يصيح ويتنرفز من اقل شي ، اذا الهوى لاح وجها تعارك وياه...

اتفقنا اني وعلي نسكت ونخليه يحجي وحده وهم ماخلصنا ، من جنا بالمطار ، جان واكف ولابس اسود بأسود اليكول عنده حداد بدي وبنطرون وربع بوت وشال القمصله بيده ، وجنطة سفره يمه وعايفنه ولا كأنما عائلته وراه ، بس كل شويه يلتفت يخزرنه ويرجع يباوع ليكدام، التفت علي وكال..

علي : ايفين هذا ابويه هو هيج طبعه يقفل على الواحد لو بالجديد هيج صار.

ايفين : علاوي اسكت ابوك ورمه لكلبي اذا احجيلك تكره الساعة النويت بيها تتعرف عليه..

ضحك حك انفه وكال..

علي : يايابه هاي شمسوي بيج..

ايفين : ولك كل دكة اتعس من القبلها وما احجيلك من متصالحين شنو يسوي بيه من مقالب مرات اتمنى نزعل اسبوع واخلص من سوالفه ..

علي : زعلي عليه وكلبي وجهج هسه يمشي عدل وياج.

ايفين : يبوو شيخلصني بيوم الانوي ازعل اجمع ملابسي واهج احسن ، ممنوع لا ازعل ولا اتمرض ماعنده هيج قانون..

علي : صدك والله؟

ايفين : يريدني بس اضحك واسولف يكول مرتاحه شعندج هم غم..

ظل يضحك وابوه من يندار يشوفنا نضحك يخزرنا ويرجع يندار ، ظلينا على هالحال الى ان صار موعد الرحلة مالتنا ، توجهنا للطائرة والحمدلله كلشي جان تمام وماصار شي يذكر ، وصلنا هلكانين من التعب ، اول ما دخلنا سلمنا عليهم كعدنا شويه وصعدنا سبحت ودخلت للفراش مددت ..

فات فهد للغرفة بدون مايباوعلي شمر روحه على السرير وخله ايديه على عيونه..

اني وياه متعلمين انام على ايديه ، يزعل اذا عفته ، بس هالمرة هو مزعلني لان صيح عليه كبال بيت ايمن وكلش انقهرت منه ومن اجيت اعاتبه طلع نفسه هو الصح واني الغلط وكبرتها واريد اسويله مشاكل، كلت هالمرة اني هم ازعل ..

درت وجهي على الجهة الثانية ونمت ، كعدت العصر على صوت دكات خفيفه على الباب عرفت هذا حمودي ، فتحت عيني بس ظليت متمدده بالفراش ، انتظرت تروح الدوخه مني واكوم افتحله الباب ما ادري بفهد كاعد وراح يسويلي مشكلة بسبب هالشي..