دارت الدنيا لتدق طبول قلبي

البارت التاسع والعشرون

trip to the future
( رحلة الى المستقبل)

جانت الدنيا عصر كعدت وخليت اللابتوب بحضني شغلتها وعجبني اشوف فيديوا العرس لأول مرة اشوفه جنت اضوج اتفرج عليه لأن يذكرني بأحاسيس توجع ويزيدني هم فوك همي ...

قدمت المشاهد وبديت اشوف من الدخولية مالتنه..

وجوهنا بيها كمية غضب وحزن بحيث مغيرة ملامحنا ، عبالك مو اني ولا هذا ضيغم..

مشينا ولازم ايدي اباوع لأيديه يريد يفلتها مني مبين مجبور عليه حتى المايعرف هم يحس..

ضحكت ..

ابد ما مبين علينا مجبورين ، رفعت راسي من شفت هيئة شخص كبالي واكف شفته تنهدت استغفرت ربي ورجعت دنكت كال..

هجان : ابنج وينه؟

جاوبت من وره خشمي.

ملاك : ليش تسأل؟

هجان : احجي عدل وباوعيلي من احاجيج.

استغفرت ربي وسديت اللابتوب وكمت وكفت صرت كباله خليت عيني بعينه وتحديته .

ملاك : أدلم ماعليك بيه مامسموحلك تتقرب منه ولا تشيله ولا تلعب وياه هذا مو ابنك افتهم ..

عكد حاجبه خازرني غاصت نظرته بتفاصيلي وكال..

هجان : ملاك لا تتصالفين .

ملاك : ماتصالفت انت زودتها ..

هجان : لا تصالفتي هواي..

ملاك : وهسه شنو المطلوب مني؟

هجان : الألعاب الجبتهن ل ليث انطيهياه ليش مرجعتهن بغرفتي .

ملاك : اسمه أدلم أدلم مو ليث افهم واغراضك خليهن على كلبك ابوه ما مقصر وياه..

ضحك مستهزء ضيق عينه وكال..

هجان : وين ابوه عارفكم سائل عليكم يدري بيج شلون عايشة..

ملاك : مو شغلك شلون اعيش ..

هجان : بس لا تنسين هسه انتِ محسوبة عليه وانه صرت مسؤول عنج..

ملاك : محسوبة عليك آمنت بالله لأن ابن عمي ونوعاً ما حقك بس مسؤول عني غلطان..

هجان : طغيتي هواي..

ملاك : مو شغلك..

جر نفس وهمس بصوت مسموع..

هجان : شعرج كلش حلو عليج رغم جنت احب الشعر الطويل و هسه غيرت رأيي ما انكر الاسود حلو بس الرمادي ناطيج جاذبية اكثر وبارز سمارج..

باوعتله صفح وكلتله.

ملاك : اتمنى من تفوت تدك الجرس او تتحمحم حتى نعرف حضرتك اجيت ونورت ونلبس حجاب .

ابتسم وحجه بخبث..

هجان : اعرف ماكو وحدة غريبة بس انتِ هنا ، وانه حافظج حفظ ..