طول الطريق ما اتكلمت ما عارفه مالي زعلانه عشان اتذكرت امي ولا فرحانه عشان شفت امهم بخير مشتاقه ليها ولا فاقداها كانت احاسيس ملخبطه شديد بعد وصلنا ما قدرت اتكلم مع احمد ولا انطق بي حرف شلت شنطتي ونزلت مع اني سامعاو بنده علي لكن ما كان نفسي ارد دخلت لقيت ابوي قدامي حضنتو وقعدت ابكي واتشقيت بالبكا رقيه شافتني قعدت تبكي ابوي ما عرف يسكت ياتو وحده فينا ودموعو غلبتو ونزلت💔
بعد مسافه سكت عارفه لو هناء جات وشافتنا بنبكي ح تبكي وما ح تسكت وتقلبو بيت بكا وهديل وروان ح يتملو الباقي ويقلبوها مناحه فمسحت دموعي وجبت ليهم مويه غسلو وشوشهم وقلت ليم اوعى تبكو تاني هسي ناس هناء بجو ويقلبوها دراما فهمتو😢
رقيه:يعني تبكينا معاك وتاني تقولي لينا ما تقلبوها دراما😕
-ما خلاص شغله هو البكا دا ولا عشان الدموع بي بلاش بتعملو كدا😒
خليل:لو انت ما بكيتي نحن ما بنبكي
-اهوو شايفين انا سكت يلا ما تبكو واي زول يشوف شغلتو نسيتوني ما صليت العصر زاتو😑
رقيه:غايتو الله يهديك مجنونه والله😂👋
مشيت اتوضيت وصليت ودعيت لي امي وشلت المصحف قريت قرأن على روحها
هناء:بتي
-ماما جيتي
+المواصلات انتهت مني رسمي وشعبي واقفه ساعتين وماف مواصلات الا ولد حلال حجز لي معاو
-الله يديو العافيه يااخ ما قصر لكن انتو شغلكم دا ما فيو ترحيل
+فيو لكن عشان انا لسه ما اتوظفت رسمي ما بدخلوني الترحيل بعد فتره التدريب تنتهي حتى اتسجل فيو
-الناس دي عويره خلاص يعني شنو لو فتره تدريب ما يسجلوك ويبطلو عبط😑
+عادي اتعودت على جرجره المواصلات😂
-دا تعب اقسم بالله😴
+انت وشك مالو وارم كدا بكيتي
-لالا بس مشينا المستشفى لي ام ملاذ كانت تعبانه شويه وهسي الحمدلله بقت كويسه
+كفاره سلامتها مالا؟؟!
-عملو ليها قسطرة وابوي قال بمشي ليهم بكره يكفر ليها
+والله لو ما عندي شغل كان مشيت😢لكن بمشي ليهم ان شاء الله
روان:الاكل وين يا جماعه نموت من الجوع يعني😢
-كدي قولي السلامو عليكم خلي الاكل وين😂
روان:هنويه قومي عليك الله ختي لينا الغدا
هناء:انا جيت خاشه هسي ولسه ما عملت الغدا
روان:بتبالغو لكن هسي انا اكل شنو😢
