تاني يوم الصباح:-
صحيت متأخر عشان كنت تعبانه قمت اتسوكت وصليت ومشيت المطبخ اشوف لي شاي سمعت عمتو نعمات بتتكلم مع عمتو اميرة
نعمات:والله المرا سمحه وظريفه
أميرة:وصغيرة لكن الكلام دا بالجد
نعمات:اتكلم مع عبدالله قال ليو انا عايز اعرس ما بكون بكذب
أميرة:خليو يعرس سااي عمرو كلو راح وهو بربي في البنات براو خلي يشوف حياتو
نعمات:هدا ما شاء الله ربى البنات زي العجب وكل وحدة بقت مرا وست بيت
-لا فهموني كيف يعني ابوي عايز يعرس؟
دخلت وقلت كلامي دا سكتن وبقن منطتات عيونهن وما ردن علي عدت السؤال تاني ماف زول ردا علي جات هناء قالت لي تعالي عايزة اتكلم معاك قلت ليها دقيقه افهم الاتقال دا شنو قالت لي تعالي وانا بفهمك مشيت معاها الغرفه قعدت ومسكت يديني وقالت لي الكلام السمعتي صاح ابوي عايز يعرس لكن بعد ما ياخد موافقتنا قلت ليو طالما هو قرر عايز بي موافقتنا شنو تاني خلي يعرس سااي وان شاء الله تضوي ليو قالت لي سمرا احترمي نفسك انت بتتكلمي عن ابوك قلت ليها كلامي ما غلط كما سااي معرس ليها شنو قالت لي ويفضل لي متين مضيع حياتو عشانا ما كفايه عمرو الراح وهو بربي فينا قلت ليها دا واجبو تجاهنا كان يجدعنا في الشارع يعني قالت لي سمرا ما تكوني انانيه ابوي دا ما قصر فينا ونحن كبرنا واي واحده عندها بيتها وانت وران ح تعرسن وتمشن تخلن ليو البيت فاضي منو الح يطبخ ويغسل وينضف ليو البراعي منو ويشوف طلباتو قلت ليها انا ما عايزة اعرس وح اقعد معاو عمري كلو واعمل ليو اي شي ولا ح احوجو لي زول قالت لي ومفتكرة ابوي ح يرضى بي حاجه زي دي قلت ليها وما يرضى لي مش قراري انا ما عايزة اعرس غصب هو قالت لي ما غصب لكن لو قدرتي تقنعي ابوي بكلامك دا انا بقنعو ما يعرس قلت ليها خلاص اتفقنا
بعد يومين:-
لبست عبايتي ومشيت لي ابوي في المدرسه الوكت كان فسحه الصلاة دخلت المكتب وسلمت على الاساتذة
خليل:ناس البيت كويسين؟
-كلهم تمام انا عايزة اتكلم معاك
=طيب هسي بجيك
كان في كنب في طرف الحوش قعدت فيو وابوي جاء وشايل ورق في يدو قال لي حق الامتحانات وبصحصح فيهم قلت ليو عايزة اتكلم معاك في موضوع مهم قال لي اتكلمي سامعك قلت ليو انا عايزة اقص شعري رفع راسو عاين لي ورجع يصحصح قال لي شعرك وانت حره فيو لكن عايزة تقصي لي قلت ليو لمن عملو لي العمليه حلقو لي الورا ولسه ما طول زي القدام عايزة اقصو عشان يقومو سوا قال لي خير وتاني قلت ليو عايزة اقد زمام وما تعترض وتقول لا لانو الزمام ما دخلو بالاخلاق قال لي متين الاخلاق بقت في النخرة قدي لو عايزة لكن لو شكيتي لي انو حار ولا القدة وجعتك ح تمشي تقفليها خليك عارفه قلت ليو والله ما بشكي قال لي تاني في شنو قلت ليو عايزة اشتغل في شركه صغيرة فتحت قريب اتكلم لينا عنها دكتور في الجامعه وشكرها واكون متدربه عشان بعد اتخرج يكون عندي خبرة قال لي كلام جميل وانا بدعمك طالما لقيتي شغل انا ما عندي مانع قلت ليو طيب نجي للموضوع الاهم ختى الاوراق من يدو وقال لي اها شنو قلت ليو انت بالجد عايز تعرس عاين لي مسافه وقال انا طلبت رايكم في الموضوع قلت ليو انا ما موافقه ما عايزة وحده تجي بيتنا وتاخد مكان امي قال لي هي ما ح تاخد مكانها قلت ليو نفس الشيء ما عايزة مرا تخش في بيتنا والموضوع انتهى قال لي اديني فرصه اشرح ليك وجهة نظري قلت ليو يا ابوي عايز تشرح لي شنو انك نسيت امي وخلاص حبك ليها مات وانتهى ولا انك عايزة وحده غيرها ولا انك حبيت من جديدة انا ما عايزة اسمع حاجه لكن اعرف اني ما موافقه على الزواج دا ولا ح اوافق عليو اصلا وقمت وخليتو بنادي علي وطلعت وانا ببكي قعدت في مسطبه في الشارع وكملت بكاي سمعت صوت شافع بقول لي مالك بتبكي قشيت دموعي لقيتو واحد من شفع المدرسه شكلو بقرا في اولى قصير وكلبوظ كدا وشعرو كتير وحلو ما شاء الله قلت ليو اتجرحت في يدي جاء قعد جمبي وقال لي ياتو يد مديت ليو يدي اليمين باسها لي وقال خلاص هسي بتبرد انا لمن اتجرح امي بتبوس لي مكان الجرحه وببقى كويس بستو في خدو ودموعي جات نازله مسحها لي وطلع لي حلاوة من جبيو وقال لي ما تزعلي الجرحه هسي بتبرد والحلاوة دي عشان تنسي بيها الوجع قلت ليو انت حلو شديد على فكرة🥺قال لي هووي انا داير اعرس بت عمي ما بقدر اعرسك لكن بشوف ليك صحبي اقسم بالله كتلني بالضحك😂قلت ليو حظها بت عمك عندها عريس حلو خلاص قال لي يلا قومي امشي البيت ما تقعدي في الشارع انت ولد قلت ليو لا بت😂وهسي ماشه البيت قمت قال لي مع السلامه واشر لي بيدو ومشى وانا رجعت البيت
