អ្នកប្រុសរោគចិត្ត

Ep26 : បេះដូងបងត្រូវឆ្លាក់ឈ្មោះអូន

   "គ្រប់យ៉ាងព្រោះបងស្រលាញ់អូន"ជុងឈានចូលមកឈរឆ្ងាយពីថេយ៉ុងប្រហែល4ជំហាន គេញញឹមស្រាលមើលមកមនុស្សដែលគេស្រលាញ់ ស្នាមញញឹមនេះវាកម្រនិងមានលើផ្ទៃមុខគេណាស់!! ហេតុផលដែលគេក្លាយជាមនុស្សបែបនេះព្រោះកាលពីគេនៅក្មេងរូបភាពដែលប៉ាគេវាយធ្វើបាបម៉ាក់របស់គេនៅដិតដាមជាប់និងភ្នែក គេមិនអាចធ្វើអីបានសូម្បីតែបញ្ឈប់គ្រប់យ៉ាង ត្រឹមតែជាក្មេងឈរសម្លឹងមើលហិង្សាក្នុងគ្រួសារទាំងទឹកភ្នែកស្រក់ជោគថ្ពាល់ គេឃើញរឿងបែបនេះសឹងតែរាល់ថ្ងៃរហូតដល់ពួកគាត់លែងលះគ្នាគេក៏ស្បថថាអំពើអាក្រក់ត្រូវតែមានផលតបស្នង មនុស្សម្នាក់នោះធ្វើអោយម៉ាក់គេឈឺចាប់ជាតំបូងគេក៏សម្រាប់ប៉ាគេចោលដោយគ្មានក្តីស្តាយស្រណោះរហូតមកដល់ពេលនេះគេនៅតែប្រកាន់ផ្នត់គំនិតថាមនុស្សដែលគេស្រលាញ់មិនអាចមានអ្នកណាចង់ប៉ះពាល់ឬធ្វើបាបបានជាដាច់ខាត។

   តើគេខុសមែនទេដែលធ្វើគ្រប់យ៉ាងដើម្បីមនុស្សដែលគេស្រលាញ់? តើគេខុសមែនទេដែលសម្លាប់មនុស្សដែលសមតែទទួលនៅលទ្ធផលដែលបានពីអំពើអាក្រក់ដែលពួកគេបានប្រព្រឹត្ត? តើគេខុសមែនទេដោយគ្រាន់តែគេស្រលាញ់ថេយ៉ុង? តើគេខុសខ្មាំងមែនទេ?

   "សុទ្ធតែកុហកបោកប្រាស់ទាំងអស់ ឆាប់សងអារម្មណ៍កក់ក្តៅមកខ្ញុំវិញមក ឆាប់សងបេះដូងដ៏បរិសុទ្ធមកអោយខ្ញុំវិញមកជុងហ្គុក ជេស៍ស្ទីឡា"ថេយ៉ុងក្តោបកាំភ្លើងស្រែកទាំងទឹកភ្នែកនៅតែបន្តស្រក់មកតក់ៗជោគផែនថ្ពាល់ទាំងសង រាងកាយញ័រទទ្រើតឈរស្ទើរមិននឹងនៅតែប្រឹងពង្រឹងជំហរសម្លឹងមើលទៅអ្នកម្ខាងទៀត។

   "ថេយ៍...បងស្រលាញ់អូនណាស់ដឹងទេ?"គេដឹងថាពាក្យដែលថេយ៉ុងនិយាយមុននេះជាឃ្លាមួយដែលថេយ៉ុងនិយាយនៅក្នុងយល់សប្តិរបស់គេ វាក្លាយជាការពិតហើយ! ចុងបញ្ចប់នៃសុបិនអាក្រក់នោះគេលឺស្នូរគ្រាប់កាំភ្លើងតើថេយ៉ុងពិតជាជ្រើសបាញ់សម្លាប់គេមែនហ្អេស៎?

   "ស្រលាញ់ខ្ញុំ? ស្រលាញ់ខ្ញុំតែមិនស្តាប់ខ្ញុំ ស្រលាញ់ខ្ញុំតែសម្លាប់មនុស្សគ្រប់គ្នា គិតថាខ្ញុំមិនដឹងឬថាមនុស្សដែលបងសម្លាប់តាំងពីឆ្នាំនោះជាអ្នកណា? បងសម្លាប់ប៉ាខ្លួនឯង បងសម្លាប់មនុស្សម្នាក់ដែលមានឈ្មោះជាឪពុក..."ថេយ៉ុងអណ្តឺតអណ្តករឹតតែខ្លាំង ថ្ងៃដែលអ្នកស្រីអេលជីមកនិយាយជាមួយជុងហ្គុកនោះគេក៏លួចស្តាប់លឺដែរតែប្រឹងធ្វើជាល្ងង់មិនដឹងខ្យល់អី។