3.My Babe True Love S-3 (Completed)

Episode(13)

(Unicode)

"Babe...ကိုကိုရောက်ပြီ"

လွန်ခဲ့တဲ့သုံးရက်ကမှ ဦးဇင်းနဲ့ဒါကာလေးဟု ခေါ်ဝေါ်ပြောဆိုခဲ့ရသော ဆက်ဆံရေးတစ်ခုသည် အခုကျတော့ ကိုကိုနှင့်Babeဆိုသည့် 'ကိုဘေး'ဘဝသို့ ပြောင်းလဲရောက်ရှိနေရ၏။ 

သူ့ကိုယ်သူ 'ကိုကို'ဟုသတ်မှတ်ကာ ဆွဲဆွဲငင်ငင် အာဘော်ဆင်နေသော ရှေ့ကလူကို မဟော်မင်းမြတ် သေချာကြည့်လိုက်သည်။ တစ်ချိန်က ပိတုန်းရောင် ဆံပင်ထူထူကို ပိုင်ဆိုင်ထားသောသူသည် မင်းမြတ်လက်ချက်ကြောင့် ကတုံးပြောင် ကန္တရလူသားအဖြစ်သို့ ရုတ်ချည်းရောက်ရှိသွားရသည်။ ပြောင်နေသော ကတုံးကြောင့် မျက်ခုံးမွှေးတို့က ပိုပြီးမဲနက်သွားသယောင်ရှိသည်။ ငါးရက်တိတိ ဥပုပ်စောင့်လိုက်ရပြီး ညစာရှောင်ခဲ့ရလို့လားမသိ..အနည်းငယ် ပိန်သွားသည်။

"Babe ကိုကို့ကို အထဲမဝင်ခိုင်းတော့ဘူးလား။ ဘာလို့စိုက်ကြည့်နေတာလဲ"

ကတုံးကြီးနဲ့မို့ ထူးထူးဆန်းဆန်း ကြည့်မိတာကို ကြင်ကြင်နာနာ စိုက်ကြည့်တယ်လို့ ထင်သွားပုံရပါရဲ့..။ ကိုAlexက မင်းမြတ်ကို သွားတိုက်ဆေး ကြော်ငြာထဲကလိုမျိုး ပြဲနေအောင် ရီပြလာသည်။ ဒီလို ကတုံးနဲ့ ကြေငြာရင်တော့ နာမည်ကြီးတော့မှာပဲ...။

"ဝင်လေ..."

မင်းမြတ်က စိတ်ဆိုးနေဆဲပုဒ်မကို ခေါင်းစဉ်တပ်ကာ မျက်နှာသေနဲ့ ကြိုဆိုတာတောင်မှ ကိုAlexက အခုထိ မျက်နှာပိုးကို မသတ်နိုင်သေး..။ ဧည့်ခန်းထဲကို ရောက်တော့မှ ဆိုဖာပေါ်က မင်းမြတ်လွယ်အိတ်ကို ကြည့်ပြီး မေးလာသည်။

"Babe ဘယ်တုန်းက ပြန်ရောက်တာလဲ"

ဒီမေးခွန်းက မင်းမြတ် မေးရမှာမဟုတ်ဘူးလား..။ မင်းမြတ်က လုပ်ရိုးလုပ်စဉ်အတိုင်း ကျောင်းသွားတက်တာပါ..။ သူကပဲ တစ်ပြန်ကြီး လာမေးနေရသေးတယ်။ သိပ်ပြီးမကျေနပ်တာကြောင့် လက်ကိုပိုက်ပြီး အသံမာမာနဲ့ မေးလိုက်သည်။

"ခုနလေးတင်..၊ ဘယ်တုန်းက လူထွက်တာလဲ"

"အခုလေးတင် ပြန်ရောက်တာ Babeရဲ့။ ရောက်ရောက်ချင်း ကိုကို Babeဆီကိုလာတာ"