🔥وعد الظلام🔥(بالدارجة المغربية)

🌹الجزء 32🌹

✨ وعد الظلام ✨
💗 Nora & khaoula 💗

وصلات جوج ديال ليل واجود عينيه كيتغمضو مسرح على الفوتوي لي قريب لشفاء كانت الحرارة ديالها بدات كتنقص شوية ...حاتم فجنبها معنقها حتى داه نعاس ...
شفاء بدات كتكح : احوو احوو
ناض قافز مشا لاطابل لي حداه خدا كأس ديال الماء وجا جلس فجنبها ...حاول يعطيها ولكن خاصو يقادها ...بعد عليها يدين حاتم ودار يد من موار خصرها ونوضها حتى ولات مقابلة ليه ...حط الكأس على فمها كانت منحل عينيها بصعوبة وتسدهم رشفات منو شوية وحطات راسها على صدرو بدون وعي ...
حط الكأس فجنب السرير ...يلاه غادي يمد يدو باش يبعدها وهو يتراجع وخلاها ...هبط راسو بحكم كانت قصيرة عليه كيشوف ملامحها وهي ناعسة معرفش علاش ولا هاد الايام كيراقبها بزاف ...تفكر الهدرة لي قال ليها واش يكون قسا عليها
ولكن روجولتو متسمحش ليه يشوف مراتو واقفة مع راجل اخر ويبقى ساكت ...ماشي حب ولكن أجود هكا داير نفسو حارة كتبقى مراتو على اسمو والشرف ديالها من الشرف ديالو
بدا كيقرب بشوية بلاما يحس ومع التعب غطس وجهو فعنقها وريحة شعرها زادتو راحة غمض عينيه كيستشق عبقها بارتياح وهي مكيناش فهاد العالم ..كيبانو من بعيد كأنهم معانقين ..
دازت دقائق فجو هادئ تحت انغام المطر وغير ضوء واحد لي منور الغرفة ...أجود كأنه مشتاق لحضن من شحال يرتاح فيه وينسى كلشي ...فرمشة عين تسللو ذكريات لمخيلتو قدامو مراتو وكرشها منفوخة مادة يديها ليه وكتبتاسم ...حتى هو رد ليها الابتسامة وتحرك بخطواتو لعندها عنقها بنفس الطريقة ...
حل عينيه فجأة وبعد عليها رجعها لبلاصتها وخرج من الغرفة ملامحو مبدلين كليا ساخط على راسو عروقو تنفخو ..
ضرب يدو بقوة مع الحيط ونطق بصوت مجروح : علاش ..علااش نسيت راسي ..نسيتها ونسيت اشنو واعدتها ( واعدها عمرو يتخلى عليها ولا يفكر فمراة اخرى) كينتفس بسرعة وغمض عينيه هادي كانت إشارة ليه باش ميبقاش ينسى المرأة لي كيبغي لي ماتت وخلات ليه طرف منها ...
اجود : غير تبرى ونبعد عليها ..ماخاصنيش نتخيلك فيها اليلى
...

⏳⏳

فأحد المستشفيات وفقاعة العمليات كل كيحاول بجهدو باش ينقدو المريض لي قدامهم كانت حالة خطيرة كلو مضروب يدو مهرسة والاسوء قلبو لي مريض ممساعدوش باش يتمسك بالحياة زائد خيبة الأمل لي تعرض ليها كسراتو علاش لا وهو من زمان كيتخيل ويتمنى فأشياء كثيرة والاخير تبخرات...

الطبيب : زيدو الصدمات ...
الفرميلة ضغطات على زر ...صدرو كيتهز مع الصعقات الكهربائيه وكينزل ...دقائق من الخوف والتوتر العرق بدا كيتصبب مع الطبيب والطاقم ديالو ...
الطبيب بصوت عالي : غادي نحاولو لأخر مرة يلاه ..واحد... جوج .... تلاثة....   لأخر مرة تهز صدرو مع شهيق خلى الكل يتنهد براحة واطمئنان واخيرا نقدوه بصعووبة ...
الاكسيجين على وجهو كيضبب بزفير ديالو واخيرا رجعات ليه انفاسو  صدرو كيطلع وينزل ...
الطبيب كيحيد الكمامة والتعب باين على وجهو  ولكن ابتسامة انتصار خلاتو ينسى التعب ...: الحمد لله بقدرة الله ومجهودنا قدرنا نرجعوه من الموت
الكل : الحمد لله
الطبيب : بدلو ليه السيروم وعقمو الجروح ديالو ..حتى نرجع