The White Cat's Divine Scratching Post ⟨⟨ Myanmar Translation ⟩⟩

~အခန်း ၁၁~ လက်ဆောင်

{ Unicode }

ရန်လျဲ့ ... ခေါင်းလောက်ကိုကြည့်ပြီး မချိပြုံး ပြုံးလိုက်ခြင်း

~~~~~

မော့ထျန်းလျောင်သည် သက်တံ့တံတားတစ်ခုကိုဖြတ်ပြီးနောက် ဝေါ်ထျန်းဂူသို့ ရောက်လာခဲ့သည်။

ဝေါ်ထျန်းဂူက အတော့်ကိုကြီးသည်၊ ဂုဏ်အသရေမြင့်သည့် အသွင်အပြင်များနှင့် ဝေါ်ချင်းဂူထက် အကြိမ်ပေါင်းများစွာ ကြီးလှသည်ပင်။ အထဲတွင်ကား လကြည့်ဇရပ်ငယ်*များနှင့် တံတားများဖြင့်ဆက်သွယ်ထားလေသော နေရာကျယ်ကျယ်အိမ်များစွာ ရှိနေလေသည်။ ထိုအိမ်များတွင် လက်ရာမြောက်သည့် မုခ်ထောင်*များဖြင့် အလှဆင်ထားပြီး ထိုနေရာတွင်နေကြသည့် ကြိုးကြာတို့နှင့်အတူ တောင်တန်းများ၏ ရင်သပ်ရှုမောဖွယ်မြင်ကွင်းကို တွေ့မြင်နိုင်လေသည်။

ဂူမုခ်ဝကိုဝင်လိုက်သည်နှင့် ရန်လျဲ့၏တပည့်များက သူထံလာရောက်၍ ကြိုဆိုကြလေသည်။

"အခမ်းအနားက ယွီဖန်းဇရပ်မှာ ကျင်းပမှာပါ။ ကျေးဇူးပြု၍ ရှစ်ရှိုးကြွပါ "

ဂူသုံးခုစလုံးတွင် ဓားပျံစီးခြင်းကို တားမြစ်ထားသည်ဖြစ်လေရာ  လမ်းလျှောက်သွားရမည်သာ ဖြစ်သည်။ ထို့ကြောင့် မော့ထျန်းလျောင်သည် ယခုအနေဖြင့် ဓားပျံစီး၍မရနိုင်သေးသည့်တိုင် အရှက်ရစရာမလိုတော့ပေ။ ထို့ကြောင့် သာသာယာယာပင် အရှေ့အရပ်ရှိ ယွီဖန်းဇရပ်သို့သာ လျှောက်သွားတော့သည်။

ယွီဖန်းဇရပ်သည် အမိုးမရှိဘဲ ပန်းများဖြင့်သာအလှဆင်ထားလျက် နေရာမှာလည်း အတော်ပင်ကျယ်လေသည်။ ယနေ့တွင် များစွာသော သစ်သားခြေတိုစားပွဲရှည်*များကို သပ်သပ်ရပ်ရပ် ခင်းကျင်းထားလေပြီး လူအများစုမှာ နေရာယူပြီးသားပင်။ ရန်လျဲ့၏နေရာသည်ကား ကျောက်သား‌ဘောင်ပေါ်တွင်ဖြစ်၏။

ရန်လျဲ့သည်ကား ဂိုဏ်းချုပ် ထျန်းလန်ကျန်းရန်* ၏အဓိကအတွင်းဆောင်တပည့်ဖြစ်ပြီး ပထမမျိုးဆက်တပည့်များထဲတွင် အမြင့်ဆုံးနေရာရထားသူပင်။ ထူးချွန်သည့် မီးဒြပ်စင်စွမ်းအားရှိသူလည်းဖြစ်သည်။