انت لست اختي

‎📌رواية "انت لست اختي" 📌
‎                                                بقلم🖋 "R&K"

‎📌الفصل 50📌

‎كانت جالسة ملاهية مع خدمتها لي مختصة بالحسابات، واخة حاسة براسها عيانة شوية ولكن الخدمة ديالها هي اللولة، تحل الباب، هزات راسها لقاتو ازاد، وقفات بالزربة وحانية راسها

‎ملاك: سي ازاد
‎ازاد: ساليتي الخدمة؟
‎ملاك: ته تقريبا امسيو، بقا لي الملف الخاص بالواردات لي جاونا من مدينة طنجة، وصاف
‎ازاد: همم اوك خليهم تالغدا، انا عارضك اليوم للعشاء

‎ملاك رفعات راسها فيه وخرجات عينيها من الصدمة، واش هادشي لي كاتسمعو بصح ولا غير كاتخايل، سرطات ريقها وجاوباتو حشمانة

‎ملاك: ليا الشرف اسي ازاد، ولكن والديا مايبغيوش نخرج بالليل
‎حط يدو تحت ذقنو: قولي لهم عشاء عمل وانا لي غانوصلك تالدار

‎حسات بالحرج من هضرتو، كيف غادي تخليه يدخل لداك الدرب، اكيد غاياخذ عليها نظرة خايبة، بتاسمات ليه كاشراة عن الموافقة ديالها، وتاهو بتاسم ليها

‎ازاد: غانستناك لتحت فالسيارة

‎خرج وخلا قلبها كايفرفر، شافت فلباسها لقاتهم عاديين جدا، هزات كتافها بدون مبالاة وجمعات حوايجها فساكها، صايبات احمر الشفاه ديالها وخرجات

‎جالس فسيارتو كايفكر والق مطرقة ومطرقة فراسو، ماعارف ومافاهم تا حاجة من راسو، شرب شوية دالماء من القرعة لي عندو وهو يسمع تيليفونو يصوني

‎ازاد: الو اسيل
‎اسيل: فينك؟ تعطلتي؟
‎ازاد: مازال انتعطل عندي عشاء عمل
‎اسيل: واش فنفس الريسطو لي كانمشيو ليه؟
‎ازاد:اه هاداك علاش؟
‎بمكر: سولتك باش نقولك ماتطلبش من عندهم عصير اللتشين، خاااايب ومر، طلب ديال الفريز زين
‎ازاد: هههههه اوك اوك؟ صاف غير هادشي؟
‎اسيل: هممممم لا كاين حاجة اخرى
‎ازاد: وشناهي؟
‎بصوت خافت نطقات: كانبغيك، كانموت عليك
‎بتاسم: تانا كانبغيك ااسيل، قلبي ملك ليك انت فقط
‎اسيل: صاف براكة ههه يالله سير للخدمة مواح

‎قطع عليها وحط التيليفون فبلاصتو، فهاد الوقيتة حلات ملاك الباب وركبات حداه، الحشمة تقتلها وقلبها ما بغا يسكت، كاتحس بركابيها فشلالين، شافت فيه لقاتو كايشوف بعيد وباينة فيه كايفكر فشي حاجة

‎ملاك: احم مسيو ازاد، الى مشغول نقدو نأجلو العشاء
‎ازاد: اه؟ لا لا غير كنت كانفكر وصاف فالخدمة، مشينا؟
‎بتاسمات ليه: مشينا

‎طلق الراديو وكسيرا، كانت السماء بنفسجية، واحد الجو غزاااااال، السيرات قلال وواحد النسيم بارد كايضرب فوجها فهاد الصيف، ملاك فرحانة بعاد الجو وخاصة معاها الشخص لي كايعجبها، شافت فيه بزاوية عينيها، يد كايسوق بيها ويد مخرجها من السرجم، رجعات عينيها للقدام وكاتسمع للاغاني لي مطلوقين

‎ازاد: واش مرتبطة؟

‎تفاجآت من السؤال ديالو، علاش غايسولها على حياتو العاطفية؟ اكيد عاجباه كيما هو كايعجبها

‎ملاك: لا احم مامرتابطاش
‎ازاد: اوكي مزيان
‎ملاك: وانت؟
‎ازاد: تانا