انت لست اختي

‏‎ 📌رواية "انت لست اختي" 📌
‏‎ بقلم🖋 "R&K"

‏‎📌الفصل 58📌
ناضت اسيل شادة فصونيا وكل الاعين عليها، دازت من قداموا ووقفات كاتشوف فيه بعينين خاليين من الحب او البريق ديالو، عينين حادين ومليانين حقد وكره، نطقات وفكل حرف كاتزير على الفك ديالها

اسيل: الحاجة الوحيدة لي غادي نقولك اازاد، انا غادي ندمك، غانخلي قلبك يتجرح كيما جرحتيني، انبكيك الدم اازاد، لا انت، ولا هادي لي واقفة حداك، غادي ندمك مزيااااان
ازاد: اسي..
قاطعاتو: شششش سميتي ماتنطقهاش على لسانك الموسخ، انا لي دابا ماقابلاش نتزوج بك فهمتي؟ هههههه غير ستنى اولد عمي الى ماكويت ليك قلبك كيما كويتي لي قلبي مانتسماش اسيل بنت نبيل

شدات فصونيا وتمو خارجين من القاعة تبعها باها ولؤي خايفين دير شي حاجة فراسها، ركباتها صونيا فالسيارة وكسيرات، هزات الكاغط وبدات تمسح فدموعها والكحول لي هابط ليها على عينيها، حلات السرجم كاتتنفس وتتحسس الهواء البارد لي كاينقص شوية من النار لي كاتحرق فقلبها، شمتة ماتبغيها لعدوك، غمضات عينيها كاتتفكر اللحظات لي دازو قبل بيناتهم، لمساتو وكلامو لي خلاها بحال الحمارة تابعاه، عطاتو شرفها وجسدها وقلبها، عمرها حطات الفكرة ان ازاد غايدير فيها هادشي كان ديما هو الحامي بالنسبة ليها، حلات عينيها وسدات السرجم، بقات صونيا غير كاتشوف، ماعرفاتش اش غادي ولا اش غاتقول

صونيا: كيفاش كاتحسي دابا؟
تنهدات: كيف غانكون اصونيا؟ راني مصبرة راسي غير بزز لا نمشي نقتل راسي
صونيا: هادا ماشي حل، انت لي غاتكوني الخاسر الوحيد، اما هو غايكمل حياتو عادي
اسيل: عافاك اصونيا سكتي
شدات الفران وحطات السيارة على الجنب: ماغاديش نسكت ااسيل، هضرتي غادي تقصحك ولكن فنفس الوقت غادي تقويك باش تزيدي للقدام، انت خاصك تندميه وطبقي الكلام لي قلتي ليه
اسيل: اش عندي ماندير؟ من يوم يومي وانا ديك البنت لي ماشي مسؤولة، ديما كانستنى بابا ولا خويا يجيبو لي الحاجة، ديما كانتكل على غيري، اش غاندير؟؟ والو مافيدي والو، خاصة من بعد هاد الضربة لي دارلي
صونيا: هاد الضربة والو مقارنة مع الضرابي لي فيا، ولكن انا خليتهم يكونوا مصدر قوة بالنسبة ليا ماشي العكس
شافت فيها: شنو هوما هاد الضرابي؟ شنو قصتك اصونيا؟؟
تنهدات: ملي غادي تقرري تاخدي حقك، انقولك، ودابا يالله نرجعك للدار، غايكون باباك خايف عليك
تحسرات: بابا مسكين، هو اكثر واحد كانبغيه فهاد الدنيا
بتاسمات: ماشي اي واحد كايعطيه الله اب مزيان، احم شربي الماء باش تبردي شوية، الصهد
اسيل: فين هي القرعة؟
صونيا: اللور

كاع الحضور بقاو يشوفو فملاك ويلعنو فيها، اما هي مكمشة فراسها وكاتبكي حيت تحطات فهاد الموقف كلشي خرج وبقا غير هو وياها الراس فالراس، هو كايشوف فالارض وقابط راسو بين يديه، تانفذ انتقاموا عاد تفكر اش دار وحس براسو، تنادم معاه الحال وماعارف دابا اش يدير، اه هرس قلبها ومن بعد؟؟ نبيل ماتضرر بتاشي حاجة، اكبر متضرر هو اسيل وازاد، باع الحب ديالو للانتقام، هاهو دابا جالس بوحدو فالقاعة وحداه بنت مكايعرفهاش، طلع وجهو عندها ونطق

ازاد: صاف املاك تقدي تمشي لعند الدار ايوصلك الشيفور، الاتفاق سالا
بابتسامة: اوكي، بيناتنا التيليفون

رد ليها الابتسامة وعطاتو بظهرها، قلبها كايقصحها بزاف، ولكن اش عندها مادير، بنادم ملي كايبغي شي حد، واخة عارف مزيان بلي مكايبغيهش، ولكن كايدير اي حاجة باش يراضيه ويبقى بجنبو واخة كايضرو

ركبات فالسيارة اللور وعطات العنوان للشيفور، وكسيرا بيها، رجعات ذاكرتها لنهار العشاء

# فلاش باك
ملي كانوا جالسين فالمطعم، كانوا كايدويو فمختلف المواضيع تاوصلو للموضوع لي بغاه ازاد

ملاك: ماقلتيش ليا على والديك، فين هوما؟
ازاد: تقتلو
شدات على فمها: الله اكبر، وشكون قتلهم؟؟؟
شاف فيها بعنين حمرين: عمي
شهقات بشوية: الله الله، الله يرحمهم مساكن
شبك يديه على الطاولة: امين امين، وانا جبتك هنا على حسب هاد الموضوع
باستغراب: كيفاش؟
تنهد: انا باغي ننتاقم من عمي عن طريق بنتو، باغي فنهار زواجنا نجيبك نتي ونقولهم انتزوج نتي، ونتي تبارك الله بعقلك ورزينة، وتالزين زينة وماتعتابريهش تعناب ههه، يعني غانخلي الضربة قاسية شوية

ملاك حسات بقلبها غايوقف، هي صحابلها عندو مشاعر تجاها، ماتوقعاتش هادشي كااامل غير باش يطلب منها تدخل فهاد المعماعة، بقات وقيتة كاتفكر وتحلل الموضوع من كاع الجهات، شافت فيه ونطقات

ملاك: اوكي موافقة
بتاسم ليها: كانشكرك بزاف، ولي بغيتيها انا نلبيها ليك
ملاك: فقط مساعدتك هي كلشي بالنسبة ليا

نهاية الفلاش باك