انت لست اختي

‎📌رواية "انت لست اختي" 📌
‎                                                بقلم🖋 "R&K"

‎📌الفصل 47📌
‎خرجات من الخدمة ديالها كيف العادة، شدات الطوبيس وركبات فيه وعقلها كايفكر غير فيه، معجبة بيه لاقصى درجة، كلشي فيه كايخليك تنجاذب ليه، بتاسمات بوحدها وعقلها مشا وسافر فاحلام اليقظة ديالها، وقف الطوبيس نزلات وتوجهات للدار، سلمات على مها وباها جلسات معاهم كاتدوي واخة عقلها مسافر، كلات ما كتب الله وطلعات لبيتها، لبسات بيجامتها وحطات ليزيكوتور فوذنيها وتكات كاتتخيل راسها مع ازاد كايبغيو بعضياتهم وعايشين قصص الحب والغرام، وهي مافخبارهاش راه غادي تتضرر من هاد الخيال الواسع ديالها

‎دخل للدار مع المغرب لقا غير نبيل بوحدو جالس فالصالون كايتفرج فالاخبار، جلس حداه كايشوف فيه

‎لؤي: الواليد
‎نبيل: هممم
‎لؤي: محتاج فلوس
‎نبيل: الفلوس كانعطيهم ليكم فراس الشهر، ماتعاودش ترجع لعندي تطلبهم
‎لؤي: واتعااامل معانا الواليد
‎نبيل: انت غاتسكت ليا القلب مافيهاش، واش ماباغيش تصايب فمككككك!!
‎لؤي: مالو فمي مزيناتو، السنان بويض تقول غير هوليوود سمايل
‎رجع كايشوف فالاخبار: انا لي خاص لمي العصا
‎لؤي: حشومة الواليد جدة فالقبر
‎هز تيليكومند شير بيه لراسو وجاتو فوسط جبهتو: انتبعك ليها الى ماق**** من حدايا
‎شد لؤي وجهو: ويلي الواليد خاص نربيوك

‎شد نبيل طبسيل كان حداه، يالله طلع  راسو باش يفلقو لقاه طار
‎نبيل: غايسكتولي القلب شي نهار، الله يا ربي الله واش عندي بنادم هنا ولا حياوانات

‎لؤي طلع لبيتو كايفرنس وكايضحك على باه، حي تيشيرت ديالو وبقا عريان من الفوق، بدل غير السروال ولبس فبلاصتو شورط قصير مريح تكى على ظهرو وهز تيليفونو، حط النمرة ديالها لي سرقها من اسيل، وبقى كايستنى ترد عليه

‎كانت جالسة كاتفرج فواحد الفيلم وكاتاكل فالشيبس، تاسمعات تيليفونها كايصوني، كانت نمرة غريبة عليها، نقصات من صوت تلفازة وردات

‎صونيا: الو
‎لؤي: انا العاشق الولهان من اصابع القدم حتى الأذنان
‎صونيا: شعرك مخ**ري بحال وجهك يا وجه الصندالة دعشرة ريال
‎لؤي: ايجيو معاك الزين غير انتي
‎صونيا: واحشم على عاراضك راه كبيرة عليك، كونت تزوجت كون ولدت قدك
‎لؤي: اجي نتزوجو ونولدو بحالي نيت، الى كان ولدي يشبهني، ويلا بنت تاهي تشبهني
‎صونيا: باش يبقاو بايرين وتاواحد مايديها فيهم ياك
‎لؤي: هي راك موافقة؟
‎صونيا: الزعتر نعاماس

‎قطعات عليه وطفات تيليفون، بتاسمات ابتسامة خفيفة وجمعاتها

‎صونيا: لا داكشي لي بقا ليك اصونيا، جمعي راسك