انت لست اختي

الجزء 59

هابط من بيتو تايتكسل وملامحو باينة عليهم الازعاج، الحالة التفسية ديالو مدمرة وكاره وتايشوف الدنيا كحلة، تايحس بروحو اتخرج من الجسد ديالو ولكن اللنتقام عمى لو عينيه، كان باغي غير يشفي داك الحقد وداك الكره لي كان كابتو فقلبو، ولكن فاللخر لقى راسو خاسر اهم حاجة كانت فحياتو، وهي اسيل، اول واخر بنت بغاها من قلبو
رمى عينيه على الكوزينك بانت ليه ملاك كاتوحد فالفطور، لي بدورها غير سمعات اثار الاقدام ديالو تقلبات عندو مبتاسمة وحشمانة منو حيت جات لدارو، تقدم عندها بشوية وتايشوف فعينيها

ازاد: السلام ملاك صافا؟
ملاك: الحمد لله وانت؟
ازاد: الحمد لله...احم ماديريهاش مني قلت الصواب ولكن شنو
تاديري هنا؟

#فلاش_باك:
من بعد ما سلات ديك المسرحية لي دارتها هي وازاد قدام كاع عبيد ربي، خرجات من القاعة والكاميرات والصحافة كاملين مجموعين عند الباب، تفكات منهم غير بزز وركبات بسرعة مع الشيفور ديال ازاد، خلات موراها عجاجة ودمرات بنت وعائلة كاملة غير باش تكبر فعين واحد لي استغلها فقط من احل مصالحو الشخصية، الطريق كاملة وهي تفكر فهادشي لي وقع وداكشي لي دارت لاسيل، رمات كاع هاد الافكار من بالها وبتاسمات حيت حاسة بلي من بعد هادشي ازاد ايطيح فيها ويكون ليها وتكون ليه.
مالقات راسها تاوصلات لدار باها، نزلات من اللوطو وبدات دق، بقات واقفة واحد الشوية تاسمعات شي حاجة ترمات من السرجم دبيتها،شافت لقانها باليزة ديالها وباها لي لاح حوايجها
الاب: سيري مابقات عندي بنت، ماترجعيش لهاد الدار فهمتي؟(تقلب عند مرتو لي كانت تبكي) ونتي الى سقت لخبار غير دويتي معاها راه انطلقك، فهمتي؟ برب العرش العظيم تانطلقك وهاني علمت ليك زيدي دخلي زيدي
ملاك بقات مسمرة حدا الباب وكاتشوف فحوايجها لي مليوحين فالارض والجيران كاملين تايتفرجو فيها وتاينممو فيها، الشيفور هز ليها حوايجها ودارهم فالباليزة وبقا يشوف فيها تانطقات ب "ديني عند دار سي ازاد" ومكان عليه غير يطيعها حيت الامانة ديال ازاد

#الحاضر:
ملاك: هادشي لي وقع، وسمحلي بزاف اسي ازاد حيت راني نديرونجيك ولكن مالقيت عندمن نمشي من غيرك، ولكن اليوم ان شاء الله نلقى حل
ازاد: مكاين لاش تلقاي حل، وجدي راسك باش نمشيو لداركم
ملاك: لدارنا؟ علاش؟
ازاد: اندوي معاهم ونفهمهم شنو كاين
ملاك: ماعرفتش واش الفكرة مزيانة ولا لا ولكن انا معاك، اجيب باليزتي وهاني معاك
ازاد: هاني سابقك للوطو وتبعيني

داكشي لي دارت نيت هزات حوايجها وتبعاتو للوطو ولقاتو ساهي كاع ما حس بيها جات حتى نحنحات عاد توگد من السبات ديالو، ركبو بزوج وكسيراو

#فلوبيطال
كاتشوف فالاب ديالها لي ولات حالتو مستقرة دابا وسمح لهم الطبيب باش يديوه، بقات تشوف فيه وتبوس ليه يديه بحنان

اسيل: سمحلي ابابا وصلتك لهاد الحالة
ضرب ليها راسها: ششش ماتقوليش هاكا، نتي ماعندك تا ذنب ودابا راني مزيان حسن من اللول كاع
لؤي: تا الشوف ولا عندو مزيان من الصباح وهو مقابل الفرمليات تقولي عندو عشرين عام
نبيل: والله يا هاد قليل الترابي تا نعضك من نيفك
لؤي: لا ابا الا نيفي بعد منو
كانوا ملاهيين فالنگير بثلاثة بيهم تا دخل شي حد للغرفة، كلشي تقلب تايشوف عند الباب وكانت الفرملية لي دوات مع صونيا، نبيل وجهو تخطف وولا صفر، بلع ريقو بشوية وبقا يشوف
الفرملية: سمحو لي الى دخل بلاما ندق، ولكن خاص المريض يرتاح شوية
اسيل: واخة حنا غادين، يالله ابابا بسلامة تالغدا ونجيو نديوك
الاب: واخة ابنتي

خرجات اسيل ولؤي وبقا نبيل والفرملية بوحدهم، جلسات حداه وهي كاتبتاسم ليه

نبيل: سايلي، شكاديري هنا؟
سايلي: جيت نفرگ الرمانة كي تاتقولو... #يتبع