انت لست اختي

‎           📌رواية "انت لست اختي" 📌
‎                                                بقلم🖋 "R&K"

‎📌الفصل 28📌
‎بقا ازاد جالس فبيتو المظلم كايشوف فالبراسلي لي فيدو وكايدورو فصبعو كيما راسو كايدور من المشاكل لي فحياتو، كان هاني ماعليه مابيه تالقا راسو فهادشي، وقف البارسلي فواحد العقيقة لي فيها الحرف ديالو والحرف ديال اسيل ورجعات بيه الذاكرة لايام الطفولة ديالو مع حبيبة قلبو اسيل

‎💥فلاش باك💥

‎كانوا محاوطين بيه غير العائلة ديالو المقربة لي متشكلة من اسيل نبيل ولؤي، كايغنيو ليه اغنية عيد الميلاد ديالو بمناسبة العشرين عام لي قفلها، نفخ على الشمعة وخدا قطعة من الكيكة لي قطعها واول واحد ذوقو هي اسيل، كلاتها من عندو تحت نظرات الاب ديالها لي عايق بازاد من شحال هادي، ولكن ماخافش على بنتو، حيت عارف مزيان طينة ازاد، وعارف بلي عمرو يقدر يآذيها ولا يدير حاجة لي تخرج عليها، من بعد ذوق عمو من الكيكة تاهو اما لؤي خشاها ليه ففمو وبعجو مسكين، تا لؤي مكانش من المعكازين هز شوية ديال الكريمة وطلسها لوجه ازاد تاولا كلشي كايضحك

‎كملات الحفلة وطلع للغرفة ديالو باش ينعس، لابس غير بوكسور ومن الفوق عريان، عدل الساعة ديالو باش تصوني بكري تادخلات عليه اسيل كيف العجاج

‎اسيل: ازاد راه نسيت ماعطيتكش الكادو ديالك
‎ازاد: اسيل خرجي راه مالابسش حوايجي 😡
‎اسيل: راك لابس شورط، مالك ملي كاتمشي لبحر كاتلبس السروال القندريسي؟

‎غلباتو الضحكة على كلامها وبراءتها ولكن مابينش، فالاعماق ديالو ماغضبانش حيت دخلات عليه وهو فهاد الحالة بالعكس، هو باغيها تشوف الجسم ديالو كي داير حيت فعلا كان جذاب، واخة فعمرو عشرين عام الا وانه بدا يتريني، مازال ماحصل على جسم ضخم حيت كايبقى صغير لهادشي، ولكن عضلات بطنو مطراسية و محبوب الفتيات تبارك الله وما شاء الله بلا ماندويو عليه هههه جلس ازاد على ناموسيتو وكايشوف فيها بعينين ناعسين

‎ازاد: شنو جبتيلي؟

‎جلسات حداه وجبدات براسلي فيه اول حرف فسميتو وسميتها، هو عينيه مركزين غير عليها وعلى حروفها، كايحفظهم باش قبل ماينعس يسترجع صورتها بين عينيه ويطفي شوية ديال الشوق لي فقلبو، شدات اسيل البراصلي ومداتو لازاد

‎اسيل: هاك هادي، اسوارة ديال الحب، وحيت انت خويا وكانبغيك بزاف، قررت نعطي ليك هاد الاسوارة، ولؤي تاهو عندو منها، خوتي لي كانبغي هديتهم اجمل حاجة تجي على بالي