انت لست اختي

        📌رواية "انت لست اختي" 📌
                                                بقلم🖋 "R&K"

📌الفصل 55📌
دازت سيمانة بحال البرق واسيل ملاهية غير مع التوجاد، فرحانة والفرحة ماقاداها، كون قدات طير كو طارت، جابت اغلى الالبسة لي كاينين فالمغرب، اما لاغوب ديالها دومانداتو خصيصا من فرنسا لاشهر المصممين، جالسة عند المراية والكوافيرة كاتوجد ليها الماكياج واللباس، اول لبسة كانت بالاخضر، جات كاتحمق، كاع البنات حلو فمهم فيها، تا الكوافورة مامتيقاش بلي هاد العروسة كاملة زينة لهاد الدرجة، صونيا كانت واقفة معاها تاهي وكيف عادتها هي والانوثة بعاد على بعضياتهم، جات بتيشيرت مفضفض مع سروال ضيق

صونيا: ما شاء الله جيتي كاتحمقي ااسيل، ازاد اليوم مايزگلكش

كلشي بداو يضحكو ومنهم اسيل لي مبتاسمة وعاجب الحال، هبطوها عند المعروضين بالصلاة والسلام على رسول الله، وكيف العادة فاي عرس، كاين لي يفرح ليك وكاين لي يحسدك، ولكن اسيل ماهامها تاواحد، الوحيد لي باغياه دابا هو ازاد، وكاتستنى بفارغ الصبر فوقاش يجي ويكتبو الكتاب

كانت واقفة كانشوف فاسيل وفرحانة ليها، تاحسات بشي يد على خسرها، قرصات يدو ودوات بعصبية

صونيا: مالك الزمر ماباغيش تبعد مني
لؤي: باغي نديرو تاحنا شي فشي بحال اسيل وازاد ولا ماعجبكش الحال
صونيا: لؤي سير الله يرحم ليك الوالدين، انا مكاناسبكش
لؤي: انا عارف اس كايناسبني واش لي لا
صونيا: انا كبيرة عليك سير شوف لك غيرس وانت مازال صغير على شي زواج وانا ماشي ديال الزواج
لؤي: تانا مادويتش على الزواج اصونيا، ولكن انا باغي المعقول معاك، عمرني ندير حاجة لي تآذيك، الى عاشرتيني غاتعرفيني اكثر
صونيا: لؤي، انا ماشي دالمعقول وماشي دالتفلية، سير شوف لك غيري

مشات بدلات البلاصة وخلاتو معصب، عيا يحاول معاها باش يخليها تنجاذب ليه ولو قليلا ولكن هي بحال الحجر، احاسيسها سدات عليه من نهار لي تغتاصبات من باها، جلسات مع العيالات بقاو يطلعو ويهبطو فيها، عامرة وشومة ودايرة جرينات طواال ولابسة غير تيشيرت وسروال، اعتابرو هادشي قلة حياء وتربية منها، بقاو كايتهامسو عليها وهي عارفة اش كايقولو وماداتهاش فيهم، حيت هادشي ولفاتو

...: اوا ابنتي واش مزوجة
صونيا: لا علاش؟ ياكما باغا تزوجيني لولدك
ضحكات باستهزاء: هههه لا لا داكشي لي بقا
صونيا: هههههه ياكما ولدك ماشي راجل وخايفة نضربو التريمة ديالو ونحمرها ليه كيف كايدير لك راجلك فالليل

كلشي بقا كايضحك على ديك المراة لي ضربات الطم وسكتات، عرفات بلي صونيا ماشي من النوع لي تلعب معاها، فحين صونيا رجعات كاتشوف فاسيل ومباتسمة بالفرحة، صحابلها ازاد صاف نسا كلشي وغايبدى صفحة جديدة مع اسيل