انت لست اختي

       📌رواية "انت لست اختي" 📌
                                                بقلم🖋 "R&K"

📌الفصل 37📌
دخلات لبيتها والقردة طالعة ليها لراسها، رمات ساكها وكاتتغدد...كلما تفكرات كيفاش تعامل معاها والبرود ديالو وكلامو لي دخل فعظامها بحال السم كاتبغي ترجع لعندو وضربو بشي قرطاسة لراسو تفكرعو ليه نيت، بقات غادة جاية فالبيت ديالها ووجها حمر بحال الماطيشة من القمعة والاعصاب لي ركب فيها، حلات الباب وعيطات بصوت عالي

اسيل: فاطمممممممة!!!!!!!!!! فاطمممممممة!!!! وافاااااااااااطمة طلعييييييييييي!!!!

فاطمة هي رئيسة الخدم لي فالقصر، اول مرة تسمع اسيل كاتغوت خافت تكون واقعة ليها شي حاجة، ونبيل مفشش بنتو لاقصى حد الى وقعات ليها شي حاجة يجري عليهم كاملين، طلعات كاتجري لعندها وقلبها غايطيح والخدامات لتحت كايشوفو ويبرگگو

فاطمة: ن...ن...نعام الالة
اسيل: بغيت عصير ديال العنب الكحل، ويكون بارد، والسكر كيما كايعجبني ياويلكم شي حاجة ماتعجبنيش تا نريب عليكم هاد القصر...تحركيييييي!!! يالااااااا!!!!!

حالة اسيل استغربو منها كاع لي فالدار، هي مكاتغوتش كاع، وديما كاتتعامل معاهم باحترام، وهادي اول مرة تغوت فوجه فاطمة ولا تآمرها بشي حاجة بهاد الطريقة، ماتستغربوش من حالتها،  كيفاش تكون عادية وهادي اول مرة شي حد يرفضها، خاصة انه اول واحد تعتارف ليه... بغاتو ليها، ولي ليها ليها، واخة تقتلو ومبعد تقتل راسها ماعندهاش مشكل بتاتا

جابو ليها العصير وكان هو هاداك كيما تايعجبها، بردات بيه الفقصة لي غاتقتلها من لداخل لقات راسها كادوي مع نفسها

اسيل: اه غلطت وكانعتارف بيها ولكن لاش يكبر القضية لهاد الدرجة تقول انا لي قتلت والديه، ولكن تانا مادرت فيها مايصلاح عاود تاني، مالي على داك التبرهيش، وشنو من الفوق رفعت السلاح فوجهو، اعععععععععع يا ربي اش غاندير راسي غايتفركع

توجهات للمراية وكاتشوف فراسها كيف عادتها، رسمات ابتسامة شريرة ونطقات

اسيل:غادي تكون ليا اازاد، سواء بغيتي...ولا كرهتي 😈