Mera Pehla Pyaar - Chashmish

chapter 1

Anirudh's POV...

Chashmish shayad ajeeb sa naam lage aap logo ko, par mere liye toh voh chashmish hi bani rahi, hamesha! naam nhi jaanta tha mein uska..

Pehli baar Lanka pe dekha tha, shaam ka samay tha, thand ka mausam aur apni do boxer saheliyon ke saath voh iss thand mein garam garam kachoriya kha rahi thi, aur ham apne dosto ke saath dahi wade aur sevpuri thusne mein vyast the. vaise toh hamara pura dhyaan Sev Puriuri par hi tha, kyuki hame pata tha jara sa bhi dhyaan bhatka yeh kameene utne mein nipta denge! par tabhi kachoriyon ke dukaan se ek pyaari si.. lagbhag chillati huyi si..

Voice: ohh shit!! Kitni garam hai yaar .. uff

POV continues...

Mene udhar dekha toh ek ladki pair patakte huye.. haafte hue.. apne dono haath hila rahi thi, uski dost pith sehlate hue, keh rahi thi,"Yaar tuze dheere dheere khana chahiye na.. tu hamesha jaldibaazi karti hai"..

usne Paani piya yeh sab dekhkar mujhe hasi aa rahi thi.. aur mein muskura raha tha. pata nhi kab, kaha aur kaise ham dono ki nazre takrai. Aur mujhe muskurata dekh, usne mujhe ghussse se ghura. jaise ki maine usse thermodynamics ke baare mein puchh liya ho..

meine bhi dheere se hi nazre jhukai. aur vapas sev Puri ki aur dekhne laga.. par savdhani hati aur durghatna ghati ka matlab aaj samajh mein aaya.. sev Puri khatam ho chuki thi.. kameeno ne kha kar khalas kar diya tha..

*****

madam kachoriya kha kar sev Puri ki dukaan ki aur aa gayi..dusri taraf ham log abhi khade the.. madam ne sev Puri waale ko order diya..

Girl: bhaiya, teen sev Puri!

Mein waha rukna chahta tha.. meine chaubey se kaha, yaar dahi Wade khaate hai. chaubey ji muskuraye aur bole, dahi Wade kha toh lenge par aaj ka pura bill tum doge! Na chahte hue mujhe haa kehna pada..

Chaubey: bhaii teen dahi Wade!

Sev Puri waala: bhaiya bas sev Puri bana le.. phir dete hai?

Meine bhi muskuraate huye kaha, "haa koi baat nahi aap pehle unhe hi de dijiye!"

Itna sunte hi usne meri taraf dekha meine bhi muskurakar uske taraf dekha, isbaar usne mujhe ghurne ke bajaay ek pyaari si smile ke saath dekha.. phir nazre zuka li.. mein toh bas use dekhta hi reh gya.. usne woolen topa lagaya tha.. jisme kuchh cartoon type ka bana tha. kyaa bana tha mujhe yeh toh nhi pata par jo bhi tha, tha boht pyaara! topa lagaay, chashma lagaay voh padhaku type bohot hi pyaari lag rahi thi.. harkate bhi uski bilkul bachho jaise thi..

voh achanak se apni dono hatho ki hatheliyon ko ragadte hue..
girl: uff kitni thand hai..

phir usne sevpuri waale se kaha,"bhaiya jaldi banaiya na?"

mein phir se uski inn pyaari si harkato mein kho gaya tabhi chaubey ji ne tana maarte hue kaha, "sasurke itna kahe ghur rahe ho.. jara pyaar se dekho!"

meine kaha, "pyaar se hi toh dekh raha hu.. abb kya jaake uska haath pakad lu?"

abb tak shant Maurya ji bol pade, "beta itna pyaar se bhi nhi dekhne ko keh raha."

*****

ham teeno hasne lage, udhar unki sevpuri bhi ban chuki thi, meine kaha, "Maharaj abb toh hamko bhi dedo, dahi Wade !"

dekha udhar madam bhi sevpuri khaate huye, yeh sunkar dheere se muskura di. hamne unhe dekha toh nazre jhuka li, shayad voh bhi samajh rahi thi ki ham yaha unhi ke liye ruke hai, abb agar late hua toh rukna vyarth ho jaayega.. khair, ham logo ko dahi Wade mil gye.. meine kaha, "sasurke jaldi jaldi thuso.. saath mein hi chalna hai."

Maurya: abbe chhichorigiri karte karte pichhe nhi Jaana hame..

Hamne aur chaubey ne Maurya ke kaan pakadte huye kaha, "sasurke saal bhar jo bhaujai ke baare mein itni baate karte the tab toh tumhe chhichori panti, pyaar ki seedhiya dikhai deti thi.. nautanki mat kar abb, jaldi se kha." udhar madam logo ne bill puchha aur idhar hamne aur chaubey ne dahi wada.. dahi ke saath hi thus liya par Maurya kachuye ki tarah chammach se dheere dheere kha rahe the..

Chaubey: abbe jaldi karo!!

Maurya: itni bhi kya jaldi.. jab kha lenge tabhi toh chalenge.

Mene sev Puri waale bhaiya se kaha, bhaiya paise isi se le lena yeh aaram se aayega.. chalo re chaubey!

Itne mein Maurya ne kaha, aree ruko ruko yeh deko plate aur chammach gaye dustbin mein, dahi Wade pet mein!

Yeh sab dekhkar voh teeno hasne lagi. dukaandar aur ham log bhi hasne lage. khair, paise de kar ham log bhi unn logo ke saath hi chalne lage. kaafi shaanti se ham log chal rahe the, naa voh sab kuchh bol rahi thi, na ham log. Lanka gate aa gaya.. mujhse raha na gaya, meine kaha, "yaar chaubey ji soch rahe hai ki kachoriya bhi khani chahiye thi."

Maurya: toh chalo, chalte hai phir..! Chaubey ne maurya ki peeth thokte huye kaha, kal ke liye bhi kuchh rehne do!! Ham MVV pahuchne waale the.. meine kaha, "yaar, thand boht hai.. ek topa bhi le lena chahiye, cartoon wala!!"

Chaubey: haa sasurke tum chashma bhi lelo!

Abb voh teeno bhi muh par hath rakhke has Rahi thi.. voh ab mvv mein ghusne waali thi..

tabhi pata nhi mujhe kya ho gya aur tez se chillaya, "waise chasmish ladkiya boht pyaari lagti hai, bachpan se hi."

voh meri taraf mudi aur tez se ghura jaise meri dono kidney nikaal legi.. meine dono hatho se kaano ko pakda aur maafi maangne ka ishara kiya.. aur voh muh banakar chali gyi...

ham use dekhte reh gye.. uski dono saheliya toh has rahi thi, picche mud kar. par woh jab mudi, toh wahii ghusse se laal aur ham sir jhukaaye soch rahe the ki kyaa yahi matlab hota hai.. aa bail mujhe maar ka..

To be continued...