Mera Pehla Pyaar - Chashmish

chapter 30

Anirudh's POV..

Hamari aur chashmish ki sulah ho gayi thi, phone par. Abb koi naarajgi nahi thi ham dono ke bich.

Abb ham dono free the, toh roj baate hoti thi, kyuki pichhle kuchh mahino se, ham ek dusre se bohot hi kam baate kar rahe the. Pravesh pareeksha ke dabaav ke chalte.

Chashmish ke ghar waale bohot khush the.. aur hamare ghar waale bhi!

Abb mein jab bhi, pitaji ke saath school jaata.. toh sab samman dete.. "arey! Voh dekhiye roychowdhury master sahab ka beta aaya hai.. BHU mein top kiya hai.."

Jo master sahab hame pehle murga banate the, voh aaj samman dete the, kursi par baithate the, gaav aakar mein bohot khush tha..

Puraane dosto ke saath din beet rahe the. Par sach kahu, toh mujhe banaras bohot yaad aata tha..

Voh VT mein chaubey aur maurya ke saath baithna.. voh lanka mein, ham teeno ka idhar udhar ghumna, aur chashmish ke saath roj subah tehelna.. inn sab ki bohot yaad aati thi..

Abb hame bhi bananas jaana tha, counseling karane.. aur chashmish ko delhi jaana tha!

Ham alag toh ho rahe the, par dil ke kareeb the, ek taraf chashmish se dur jaane ka gam tha, toh dusri taraf, dosto se dubaara milne ki khushi thi.

Chashmish ki counseling ho gayi. Usee TC wagera jama karni thi, toh usee ek din ke liye BHU jaana tha.

Anirudh: jiss din hamari counseling hogi.. uss din aana! Shaam ko ghumne jaayenge. Shayad fir baad mein vakt mile na mile.

Usne kaha thik hai.. chashmish hamare counseling ke din subah subah aa gayi. Ham toh ek din pehle se aa chuke the..

Ham chashmish ko lene gaye, maurya ne ruchi bhaujai ke yaha, uska rehne ka intezaam karwa diya tha..

10 baje woh bhi department aayi, ham counseling kara rahe the, meine kaha..

Anirudh: 2 ghante mein free ho jaunga.. tum tabtak MVV aur central office se sab kaam kara lo..

Bondita: aapka hukoom aankho aankho par.. bandar ji! Aap free hokar call kijiyega

Anirudh: aapka bhi hukoom aankho aankho par chashmish ji!

Voh muskurate huye, chali gayi..

_____________

Paachvi rank thi toh counseling jaldi ho gayi.. aur ham sabkuch nipta ke pahuch gaye central office!

Chashmish migration nikalwa rahi thi.. fees jama ho gayi thi.. 2 din baad milna tha..

Bondita: yaar yeh toh 2 din baad bol rahe hai..

Anirudh: koi baat nahi.. mein le lunga.. tum chali jaana..

Aaj raat ko uski train thi 11:30 baje..