Mera Pehla Pyaar - Chashmish

chapter 34

Anirudh's POV...

Hamari shaadi lagbhag Tay ho chuki thi, gharwaalo ki, jidd se par mein bilkul bhi iss shaadi ke liye tayyar nahi tha, bhale hi chashmish aur mere bich abb kuchh nahi bacha tha, par phir bhi, jitna pyaar kal tha utna hi aaj bhi tha, kyuki dil mein thi chashmish!

Mujhe intezaar tha Priyanka ke aane ka, jaisa ki Tay hua tha, ki iss Diwali buriya bistar samethte huye Ghar aa jao, mein lagbhag sure tha ki mishrayin Amma ki bitiya hamse shaadi nahi karegi.

Kyuki mein bachpan se hi usee naa Pasand karte aata tha, voh naak bahaye, hame uddhh uddhh kehti thi..

Aur mein chidhkar, usee apna juta nikaalkar, pith par de danadan de danadan maarta tha.

Moholle ki aurto ke liye yeh kisi, manoranjan se Kam na tha.

Sab, daat nikaalkar Maza leti thi. "Arey! Aaj maar raha hai, Shaadi ke baad naa maarega"

Aur hamari maataji, usee pyaar se god mein bithaati, "arey hamari patohu ko maar diya, chalo Ghar khaana Nahi denge aaj!" Hame aankhe dikhaakar kehti thi.

Aur Priyanka, itne mein Khush!

Aur ham pair patakte huye bhaag jaate..

Karte bhi kya! Hamari sunta bhi kaun!? Naa bachpan mein koi sunta tha, naa aaj bhi koi sunne ko tayyar hai..

Abb bataiye, ham kaise uss mishrayin Amma ki nak behni bitiya se byaah Kar Lete..

Jise "Anirudh" hamara naam Lena naa aaya ho..

Uddhh, uddhh kehti ho..

Khair, hame toh Pura yakeen tha, ki Priyanka hamse nafrat Karti hai, aur inhi sab baato ko sochkar, mein man hi man Khush tha, ki Priyanka abb toh engineer ban gayi hai, aur ham abhi padh hi rahe hai, aur baaki bachpan ki harkato se toh voh naaraj hi hogi.

Kul milaakar voh Shaadi ke liye mana Kar degi.

Aur mein usee chashmish ke baare mein bata bhi dunga, tab toh pakka hi mana Kar degi.

Aaj Priyanka aane waali thi, aur hame pakka yakeen tha, ki Ghar aate hi, voh maataji se milne turant aayegi.

Mujhe Uske aane ka intezaar naa tha, uske Shaadi ke liye naa kehna bohot utsukta se intezaar tha.

Priyanka ke Shaadi ke liye naa ka intezaar mujhe thik waise hi tha, Jaise ki baara mulkho ke police ko, Don ka intezaar tha.

__________

Khair, voh Shubh ghadi aa hi gayi, Priyanka ne gaav aate hi, apne Ghar pe samaan feka aur sidha mere Ghar par aa dhamki..

Maataji baramde mein thi, voh daudte huye aayi aur maa ko baaho mein kaskar jagadkar dheere dheere jhula jhulne lagi..