Mera Pehla Pyaar - Chashmish

chapter 9

Anirudh's POV...

Hamne chashmish ko Facebook par dhund liya tha.. Hi likhkar ek message bhi send kar diya tha friend request ke saath.. hame umeed thi, ki chashmish hamari friend request dekhte hi accept kar legi.. par esa hua nahi.. usne 2 din baad friend request accept ki.. inn do dino mein, hamne chashmish ki profile ka muaayana kam se kam 1000 baar toh kiya hi hoga.. haalanki usne hamara message seen kar liya tha..par reply nahi diya tha.. phir bhi ham khush the.. kyuki ham block nahi hue the.. ek umeed thi.. ki ho sakta hai chashmish meri request accept kar le.. mein Facebook par uski pic dekha karta.. kuchh pic toh mene save bhi karli thi..

yeh jo ek tarfa pyaar hota hai na, sahab yeh duniya ka sabse behatarin pyaar hota hai..!

Kyuki isme pyaar ki koi seema hi nahi hoti.. aur aap iss pyaar mein dubte ho ya tair te ho.. yeh aapki marzi hai.. kyuki yeh aapka adhikaar hai.. aur iss se aapko koi nahi rok sakta! Iss mein feeling bohot pyaari hoti hai.. aap har 5 min baad, facebook ka notification check karte ho.. yeh sochkar, ki yaar kahi usne meri request accept toh nahi karli ?! Jab notification mein aisa kuch nahi hota hai, toh uski profile ka.. ek aur baar sair kar aate ho..

Ohh ! Shukra hai bhagwaan ka, abhi tak block nahi kiya !

Phir uski pic dekhna, uske comment padhna, koi ladka agar comment kar raha ho toh.. dekhna ki har pic pe comment toh nahi kar raha hai ?

Achha ! Toh yeh sasura, line maar raha hai !

Chhora agar B.H.U ka hai toh.. pata kar ke chhore Ko..

Bhai, bhaabi hai tumhari ! Abb se comment mat kariyo..

Toh bhaii yeh jo feeling hai na, yeh sasura.. single ladko mein hi hoti hai.. hoti kya hai ? Hak samajhte hai.. ek baat aur, sasuro ne kabhi  psychology padhi bhale hi na ho.. par yeh jo single ladke hote hai na, khud ko women psychology ke gyaata samajhte hai..!

Haa yaar.. accha dekh, pichhe mudke dekhi toh bhai samajh lena ki pyaar hai use..

dekhkar muskura rahi hai, pyaar hai use.. bhai !

Aur, facebook par message padhke block nahi kiya.. matlab, bhaii pyaar toh hai..!

Aankh dono taraf hai, toh bhaiyo, facebook ke profile ko check karte karte.. meri bhi women psychology ki samajh badti jaa rahi thi.. mene bhi anuman lagana shuru kar diya tha.. ki chashmish block nahi kar rahi hai.. request ko delete nahi kar rahi hai.. matlab kuchh toh hai !

Yeh kuchh toh hai ! Ham ladko ko bohot pareshan karta hai.. ham ladke besabra type ke hote hai.. aur ladkiya, sabra ki murat.. jinhe hamara intehaan lene ki aadat hoti hai..

Aap ladki ko, friend request send karo.. voh 2 din se pehle accept nahi karegi.. message uske agle din degi..  aap 4 line likhoge toh voh, 1 line mein jawaab degi..! Aur propose karoge agar use, pyaar use bhi hai.. lekin voh tumse kuchh dino ka waqt maangke hi.. Ha bolegi..  par ham ladko mein itna sabra nahi hota..

kaise samjhae ham tumhe dear chashmish ?

Mene uske pic pe comment kiya.. bohot pyaari pic hai.. mene socha ki agar isne comment like kiya..  toh samjho, baat banegi..
Dekha ki 1 ghante baad usne comment like kiya hai.. aur thanks kaha..

Abb women psychology ka gyaan jaag gaya mera..! Meine kaha, bhaii kuchh toh hai ! Ladki like ke saath comment mein thanks bhi keh rahi hai..!

Par abb iss baar meine bhi sabra dikhaya.. khud ko reply karne se roka.. mene bhi kareeb 1 ghante baad like kiya aur comment kiya, Welcome !

Yeh 1 ghanta guzarna mere liye bohot hi mushkil tha.. par khud ko roke rakha.. kyuki meri women psychology kehti thi.. ki turant reply kiya toh chashmish ko lagega ki mein uske comment ka intezaar hi kar raha tha...

Abb 5 min baad hi chashmish ne comment ko like kiya.. mujhe laga, ohh ! Kyaa baat hai !!! Kuchh toh hai, guru ! Hamne bhi aadhe ghante baad uske dusre pic par comment kiya... "Isme kaafi sundar dikh rahi ho aap ! " Usne bhi turant reply kiya, hindi mein..

Bondita : dhanyawaad !

Abb mujhe apni psychology par pura vishwas ho gaya tha.. mujhe lag raha tha ki yeh friend request aaj hi accept karegi.. bas chah rahi hai ki mein comment ke bajay message karu.. par bhaii jab psychology ki baat ho toh ham thode sakt kisam ke ladke hai...  Hamne kaha.. aaj bina friend request accept kiye, message kar diya toh... Guru, bhaav kam ho jaayega..! Ham wait karne lage ki chashmish accept kab karegi !? 

Shaam ke 7 baje, aakhir voh notification aa hi gaya.. jiska hame 2 din se intezaar tha.. chashmish ne hamari friend request accept kar li thi.. lekin guru, ham bhi kam nahi hai.. message nahi kiya..
Hamne kaha ki agar message kiya toh use lagega, intezaar kar raha tha !

Raat mein 1 baje uska message aaya.. Hello Anirudh !

To be continued...