My Serein ( Completed )

Chapter 10 ( In magical era )

පූර්ණ චන්ද්‍රයා අඳුරු වලාවකින් වැසී යද්දී ද්වාරය අසල සැඟවුණු ජන්කුක් අංගනය මධ්‍යයේ ඝන අඳුරේ ගිලී ඇති කුටිය දෙස මද වේලාවක් දෑස් යොමා බලා සිටියා. පිටුපස අංගනයේ පිහිටි ශිෂ්‍ය කුටිවලින් තවමත් මන්දාලෝකය විහිදීම මද සහනයක් වුවත් සුළඟේ හඬ පවා ඇසෙන තරමින් පවත්නා දැඩි නිහැඬියාව ජන්කුක්ට රැගෙන ආවේ අන්තරායක සේයාවක් දනවන සුළු හැඟීමක්. ද්වාරය අසල වෙනදා රැඳෙන ආරක්ෂකයින් පවා අතුරුදහන්ව ඇති නිසාවෙන් ජන්කුක් ද්වාරය මග හැර ආරක්ෂක පවුර මතින් පැන තම පාඨශාලා භූමියට ඇතුළු වූයේ පරිසරයේ පැවැති නිහැඬියාවට මදකුදු බාධාවක් එල්ල නොකරමින්.

සෙමෙන් සෙමෙන් තම කුටිය වෙත ළඟා වූ ජන්කුක්ට දැක ගත හැකි වූයේ කුටිය අභියස අපිළිවෙලට ගලවා දැමූ කළු පැහැ ව්‍යාඝ්‍ර සමින් නිම කරන ලද පාවහන් යුගලක්. තමාගේ පාවහන් යුගලත් ඒ අසලින්ම ගලවා තබා ජන්කුක් ඒ වන විටත් විවරව තිබූ තම කුටියට ඇතුළු වූයේ කොපුවෙන් මුදා ගත් තියුණු අසිපත ද අතැතිවයි. කුටියට එක් අඩියක් තබා ජන්කුක් තම හුස්ම පාලනය කළේ ඒ අසලින්ම ඇසෙන වේගවත් සුසුම් හඬට අවධානය යොමු කරමින්. ගැඹුරු වේගවත් හුස්ම බියපත් බවකට වඩා නොඉවසිලිමත් නොසන්සුන් බවක් ගෙන එද්දි ක්ෂණයකින් කුටියට ඇතුළු වූ ජන්කුක් තම අසිපත එක එල්ලේම ද්වාරය පිටුපස සිටි අනවසර ආගන්තුකයාගේ ගෙල දෙසට යොමු කළේ හුස්ම වැටෙනා දිශාව සමඟ පුද්ගලයාගේ උස අනුමාන කරමින්.

" රාජකීය කුමරකු මරණයට පත් කිරීමෙහි ලා ප්‍රයත්න දැරීම මරණ දණ්ඩනයට හේතු වන බව ඔබ දැනුවත් නොවෙද ආචර්‍යතුමනි ? "

මද සිනහවක් සමඟ ඇසුණු ලයාන්විත ගැඹුරු කටහඬත් , අසලින් වහනය වූ අයරිෂ් මල්වල සුගන්ධයත් කෙලිලෝල තරුණයකුගේ කලාත්මක පණිවුඩය ජන්කුක්ගේ හදවතට රැගෙන එද්දි කළු වලාවෙන් මිඳි චන්ද්‍රයා කුටිය තුළට රැගෙන ආ මන්දාලෝකයෙන් බැබලෙන දීප්තිමත් දුඹුරු දෑස් සමඟ පිවිතුරු සිනහවකින් හැඩවුණු රෝස පැහැ තොල් පෙති සහිත කාල වර්ණ වස්ත්‍රයෙන් කැපී පෙනෙන චන්ද්‍රයා බඳු වූම මුහුණ ජන්කුක්ගේ අසිපත එක් ක්ෂණයකින් පහත හෙලීමට තරම් බලයකින් පරිපූර්ණ වුණා.