Stolen Heart

6

အိမ်ရှေ့မှာ ရိုက်ကွင်းသွားဖို့ ကားရောက်နေပြီမို့ ရေခဲသေတ္တာထဲက Detox Water ဘူးကို ယူဖို့ မီးဖိုခန်းထဲ ဝင်မိတဲ့အခါ Lin ZiHong က မနက်စာ ပြင်နေတာကို တွေ့ရပြန်တယ်။ သူတစ်ခါမှလည်း စားခဲ့တာ မဟုတ်ဘူး။ ကုမ္ပဏီတစ်ခုကို ဦးဆောင်နေတဲ့ ဒုဥက္ကဌက အဲ့လောက်တောင် အားယားနေလား။

ဒီနေ့လည်း သူစားမှာ မဟုတ်တဲ့အတွက် ရေခဲသေတ္တာထဲက ယူစရာရှိတာကို ယူပြီး မသိချင်ယောင်ဆောင်ကာ ကျောခိုင်းထွက်လာခဲ့တယ်။

သူတို့ လက်ထပ်ထားတာ တစ်လနီးပါးတော့ ရှိပြီ။ ဒီကာလအတွင်း Evan ပြောသလို အိမ်အကြီးကြီးထဲ မတွေ့ဖြစ်အောင်သာ အတတ်နိုင်ဆုံး ရှောင်နေခဲ့တယ်။ Lin ZiHong နဲ့ ထိပ်တိုက်တွေ့ပြီး ရန်ဖြစ်ရဖို့ ဝန်မလေးပေမဲ့၊ သူ့ကို အလျော့ပေးပေးနေတဲ့ Lin ZiHong ကိုတော့ တကယ် စိတ်ကုန်လွန်းလို့ မျက်နှာချင်းမဆိုင်မိအောင် မနက်ဆိုလည်း အစောကြီးထွက်၊ ည‌ဆိုလည်း နောက်ကျမှ ပြန်၊ အလုပ်တွေကို နားရက်မရှိအောင် အချိန်ပြည့် ချိတ်ခိုင်းပြီး ရှောင်ဖို့ ကြိုးစားနေခဲ့တာ။

Lin ZiHong က ဝန်ထမ်းတွေကို ညအိပ်ညနေမထားပဲ သူတို့နှစ်ယောက်လုံး အိမ်မှာ မရှိတဲ့ ‌နေ့ခင်းပိုင်းအချိန်တွေသာ လာလုပ်ခိုင်းတာမို့ မနက်စာကို Lin ZiHong က ကိုယ်တိုင်လုပ်ပေးတာမျိုး။

နေ့လည်စာနဲ့ ညစာကို အပြင်မှာ စားတာများပေမဲ့ မစားဖြစ်တဲ့ တစ်ခေါက် တစ်ခုခု လုပ်စားဖို့ မီးဖိုခန်းမှာ မွှေနှောက်နေတုန်း Lin ZiHong ရောက်လာပြီး ခေါက်ဆွဲပြုတ်ပေးဖူးတယ်။ သူ မစားပဲ သွန်ပစ်တာတော့ သေချာပေါက်ပေါ့။

ဒါပေမဲ့ ဒီကောင်က အမှတ်ကို မရှိတာလား၊ တစ်ခုခုကြံနေတာလားတော့ လုံးဝ စဉ်းစားမရ။ ကျိန်းသေတာ အကောင်းတော့ မဖြစ်နိုင်ဘူး။

ကားပေါ်ရောက်ကတည်းက ဆူဆူပုတ်ပုတ် ထိုင်နေတဲ့ YU ကို ဒီနေ့ ရိုက်ကူးရေးအတွက် အချက်အလက်တွေ Tablet ကြီး ထိုးပေးလာတဲ့ Evan က။

"ဘာဖြစ်လာပြန်တာလဲ မျက်နှာက..."

"ဘာမှမဖြစ်ပါဘူး"

တကယ်တော့လည်း ဘာမှ မဖြစ်ခဲ့ဘူး။ ဒါပေမဲ့ Lin ZiHong ကို မြင်ခဲ့ကတည်းက စိတ်က မကြည်ချင်တော့တာ။