Stolen Heart

9

ဒီနေ့ဟာ သူ့ရဲ့မွေးနေ့။ 21 နှစ်ပြည့်မွေးနေ့။

မွေးနေ့တိုင်း ဂျပန်မှာပဲ ရှိခဲ့ဖူးတယ်ဆိုပေမဲ့ ဒီနှစ်မွေးနေ့ကိုတော့ ထိုင်ဝမ်မှာ အထူးသဖြင့် ဒီအပန်းဖြေအိမ်မှာ ကျင်းပဖို့ ဆုံးဖြတ်ခဲ့တာကြောင့် Evan အပါအဝင် ထိုင်ဝမ်က သူငယ်ချင်း အချို့ကို ဖိတ်ထားတယ်။

လူငယ်‌တွေပဲဆိုတော့ ခြံထဲမှာပဲ လုပ်တဲ့ မွေးနေ့ပါတီအသေးစားကို မွေးနေ့ရှင်ဖြစ်တဲ့ သူတောင် ခြံထဲ မရောက်သေးဘူး ဆိုပေမဲ့ တက်ကြွစွာ စ,နေကြပြီ။ တကယ်တော့ မွေးနေ့အကြောင်းပြပြီး သူငယ်ချင်းတွေ စုကဲကြခြင်းပါပဲ။

သူငယ်ချင်းတွေ ဘယ်လိုကဲကဲ သူစိတ်မဝင်စား။ သူဒီနေ့ အာရုံစိုက်ထားတဲ့ကိစ္စက တစ်ခုတည်းပဲ။
မွေးနေ့မှာ ထူးထူးခြားခြား စီစဉ်ထားတဲ့ ကိစ္စလေး ရှိတာကြောင့် ရင်တွေ ခုန်နေမိတယ်။

"ကော လာပြီ"

ဒီနေ့ သူ ကောကို ဖွင့်ပြောမယ်။ ခြံထဲ ဝင်လာတဲ့ ကောကို အခန်းပြုတင်းပေါက်ကနေ လှမ်းမြင်တာကြောင့် အသင့်ပြင်ထားတဲ့ လက်ဆောင်ဘူးလေးကို ယူပြီး သူ ခြံထဲ ဆင်းလာခဲ့တယ်။

#_#_#_#

"Happy Birthday နော် YU"

လူကို မြင်တာနဲ့ ပြုံးပြုံးလေး ဆုတောင်းပေးတဲ့ ကောက အရမ်းချစ်စရာကောင်းတယ်။ ပြီးနောက် တစ်ခါတည်း ကမ်းပေးလာတဲ့ လက်ဆောင်ဘူးလေး။ သူ ကျေနပ်စွာ လှမ်းယူရင်း စပ်စုကြည့်မိတယ်။

"ဘာလေးလဲ ကော"

ရှက်ကိုးရှက်ကန်း ရယ်လာတဲ့ ကောက။

"အဖိုးတန်တော့ မဟုတ်ပါဘူး... Tie Clip လေးပါ"

သူ တအားရဝမ်းသာ ဖွင့်ကြည့်လိုက်တော့ ရိုးစင်းတဲ့ ငွေရောင် Tie Clip လေး။ ရိုးစင်းပေမဲ့ လှတယ်။ တန်ဖိုးကြီးတယ် မကြီးဘူးဆိုတာထက် ကောက သူ့အတွက် ရွေးဝယ်လာပေးတယ်ဆိုတာနဲ့တင် ကျေနပ်နေပြီ။ လက်ဆောင်ဘူးလေးကို အင်္ကျီအိတ်ကပ်ထဲ ထည့်သိမ်းလိုက်ပြီး ကောလက်မောင်းကို တွဲလိုက်တယ်။

သူ့မှာလည်း ကောကို ပေးဖို့ လက်ဆောင်ရှိတယ်။  ဒါပေမဲ့ ဒီနေရာမှာတော့ မဟုတ်ဘူး။