Stolen Heart

12

"ဂရုစိုက်ဦးနော် Yusuke... သေချာနားဦး"

"စိတ်ချပါ... ကျွန်တော် အမြဲရှိနေမှာပါ..."

သူ ဖြေမဲ့စကားကို ရှေ့က ဦးပြီး ဖြေလိုက်တဲ့ Lin ZiHong ကို သူ မသိမသာ စွေကြည့်လိုက်တယ်။ အဖေရှေ့မှာမို့ Lin ZiHong ရဲ့ ပိုင်စိုးပိုင်နက်ဆန်မှုကို သူ ဘာမှ မပြောတော့။ သူ့ကို ကြည့်နေတဲ့ ဖခင်ကိုတော့ ပြုံးပြီးသာ ခေါင်းညိတ်ပြလိုက်တယ်။

Lin ZiHong က သူနဲ့ လက်မထပ်ဖြစ်ခင်က အမေဘက်က အစ်မဝမ်းကွဲဖြစ်သူနဲ့ စေ့စပ်ဖို့ထိ ဖြစ်ခဲ့တဲ့သူမို့ အဖေက သိပ်မကြည်ချင်။ သူတို့ လက်ထပ်ပွဲကိုလည်း အတင်းမဖျက်ခဲ့ပေမဲ့ ကျေနပ်ခဲ့တာလည်း မဟုတ်ဘူး။ အခုလည်း မျက်နှာလို မျက်နှာရ ဝင်ပြောတဲ့ Lin ZiHong ကို သိပ်အရေးတယူလုပ်တာ မဟုတ်။ သူ့အနေနဲ့ကလည်း လက်မထပ်ခင်က လူကြီးတွေကို အပြန်အလှန် မေတ္တာရှိလို့ လက်ထပ်တဲ့သဘောပဲ ပြောခဲ့တော့ အဖေရှေ့တော့ Lin ZiHong ကို မေတ္တာရှိချင်ယောင် ဆောင်ရသေးတယ်။ ဆေးရုံဆင်းပြီး Condo မှာ ပြန်နေတဲ့ ကိစ္စကိုလည်း လှုပ်ရှားရတာ အဆင်မပြေသေးတဲ့အချိန်မို့ ပိုရင်းနှီးတဲ့နေရာမှာ နေချင်လို့ဖြစ်ကြောင်း၊ Lin ZiHong လည်း တူတူ လာနေမှာ‌ဖြစ်ကြောင်း ဆင်ခြေတွေ ပေးထားရတယ်။

ဒါကြောင့် ဆေးရုံဆင်းလာပြီး သူ့ Condo ကို ပြန်လာတဲ့လမ်းမှာ အဖေဖြစ်သူရော၊ Evan ရော ပါတဲ့အပြင် Lin ZiHong ပါ ပါလာခဲ့တာ။

#_#_#_#

ညနေလေယာဉ်နဲ့ ပြန်မဲ့ ဖခင်ဖြစ်သူနဲ့ လိုက်ပို့မဲ့ Evan တို့ ထွက်သွားပြီး‌တဲ့နောက်မှာတော့ တံခါးဝထိ လိုက်နှုတ်ဆက်ပြီး ပြန်လာတဲ့ Lin ZiHong ကို သူ ဆိုဖာမှာ ထိုင်နေရင်း စီးပြောလိုက်တယ်။

"မင်းလည်း ပြန်တော့..."

သူ့စကားကို ဂရုမစိုက်တဲ့ Lin ZiHong ဖုန်း Screen ကို ကြည့်ရင်းသာ အလုပ်ရှုပ်နေတယ်။

"Lin ZiHong...! မင်းလည်း ပြန်တော့လို့ ပြောနေတယ်..."

သူ မျက်မှောင်ကြုတ်ပြီး ခပ်မာမာ ထပ်ပြောလိုက်ပေမဲ့ အဖက်မလုပ်သေးတဲ့ Lin ZiHong က သူ့ကို ကျောခိုင်းပြီး တံခါးသွားဖွင့်ပြန်တယ်။ တံခါးကနေ ဝင်လာတဲ့ Richard လက်ထဲ ပါလာတဲ့ Luggage တစ်လုံးကို Lin ZiHong က လက်ဆင့်ကမ်းယူပြီး သူထိုင်နေတဲ့ ဆိုဖာနားထိ ဆွဲလာတော့ သူ နားမလည်နိုင်သလို မေးမိတော့တယ်။