Stolen Heart

21

သူ‌ ပွေ့ကာ သယ်လာတဲ့ Yang YuTeng ရဲ့ ကိုယ်လုံးကို မွေ့ယာပေါ် အသာချပေးလိုက်တယ်။ မူးပြီး ကားပေါ်မှာ အိပ်ပျော်လာတဲ့ ကောင်လေးရဲ့ မျက်နှာလေးက နှစ်လိုဖွယ် ကောင်းလွန်းတာကြောင့် သူ သေချာ ငေးမိတယ်။

လူက အိပ်နေပေမဲ့ စိတ်ကတော့ အိပ်ပုံ မရဘူး။ မျက်လုံးထောင့်မှာ မျက်ရည်တွေ စို့လို့။ ဒီနေ့ပွဲမှာ သူ့ကို စိတ်လိုလက်ရ နမ်းခဲ့တဲ့ Yang YuTeng က ပွဲတစ်လျှောက် ငြိမ်ပြီး ဝိုင်တွေပဲ သောက်နေခဲ့တယ်။ အခုတော့ မျက်ရည်တွေ စို့နေပြန်တယ်။မျက်ရည်စတွေကို လက်ညိုးနဲ့ အသာတို့ ဖယ်ပေးရင်း ခပ်တိုးတိုး ရေရွတ်လိုက်တယ်။

"မွေးနေ့မို့ မင်းကောကို သတိနေရတာလား... ဟင်"

ဒါဟာ အမေးသပ်သပ်ပါ။ Yang YuTeng မကြားနိုင်လို့ မေးခြင်း သပ်သပ်ပဲ။ တကယ် ကြားနိုင်ရင် သူ မမေးဘူး။ ပြန်ဖြေရမဲ့ ဟုတ်တယ် ဆိုတဲ့ အဖြေကို မကြားချင်တာမို့။

#_#_#_#

သူတို့ရဲ့ မင်္ဂလာဦးအခန်းအဖြစ် ရည်ရွယ်ခဲ့တဲ့ ဒီအခန်းရဲ့ bathroom မှာ သူ သုံးတဲ့ Product တွေ ထည့်ထားခဲ့ပေမဲ့ တစ်ခါမှ မသုံးခွင့်ခဲ့ရဘူး။ ဒါပေမဲ့ အခု ဝင်ကာ မျက်နှာသစ်ရင်း ကြည့်တော့ Yang YuTeng လည်း မသုံးထားပေမဲ့ ဖယ်မပစ်ထားတာကိုလည်း တွေ့ရတာကြောင့် သူပြုံးလိုက်မိတယ်။

မထူးတော့ပါဘူး။ ဝင်လက်စနဲ့ ဒီမှာပဲ ရေပါ ချိုးလိုက်တော့မယ်။

#_#_#_#

ချစ်သူရဲ့ မျက်လုံးထောင့်‌မှာ စို့နေတဲ့ မျက်ရည်တွေနဲ့ ချစ်သူရဲ့ ရုတ်တရက်ဆန်တဲ့ အနမ်းအကြောင်းကို ရေဗန်းက ကျနေတဲ့ ရေစက်တွေ အောက် မျက်လုံးစုံမှိတ်ကာ တွေးနေမိတယ်။

ရုတ်တရက် ဗိုက်သားပေါ် ဖြတ်ပြေးလာတဲ့ အထိအတွေ့နဲ့ ကျောပြင်ကို ထိနွေးလာတဲ့ အနွေးဓာတ်ကြောင့် သူ့ မျက်လုံးတွေ ပွင့်လာတယ်။

သူ့ကို တစ်စုံတစ်ယောက် အနောက်က ဖက်ထားတယ်။

နှစ်ယောက်တည်း နေတဲ့ အိမ်မှာ Yang YuTeng က လွဲလို့ ဘယ်သူဖြစ်နိုင်ဦးမှာလဲ။ မယုံနိုင်စွာ လှည့်ကြည့်လိုက်တော့ Yang YuTeng က သူ့ကို နံရံဘက် တွန်းကပ်ပစ်တယ်။ ရီဝေဝေ အကြည့်တွေနဲ့ ငေးကြည့်နေတဲ့ Yang YuTeng ကလည်း အပေါ်ပိုင်းဗလာနဲ့ ခါးပတ်မှာ ပတ်ထားတဲ့ သဘက်တစ်ထည်သာ ပါတယ်။