شهر واحد 2011
ليبيا في الفترة هذه فيها مستحيل يقدر حد يتنبأ بالاحداث اللي توالت بعدها
تبان من برا مستقرة هادية و رايقة و الناس ع قلب واحد ما في اي شي يفرق بينهم الا يوم مبارة الديربي ممكن بين اتحاد و اهلي او الديربي اللي في بنغازي بين الأهلي و النصر
المهم نبدوا في احداث روايتنا
للتنبيه شخصيات ابطال الرواية هالمرة في بعض الأوقات ح نتكلم ع لسانهم يعني لما أنقول انا نقصد الشخصية المذكورة سلفا و ح أنبهكم ع شان تعرفوا ع مني نتكلم بالضبط
و نحب ديما نبدأ بيوم العيلة يعني يوم الجمعة
و لان جمعة خلونا نبدوه من عند عيلة جمعة
من التيليفيزيون كان ينسمع صوت اغنية تعود الليبين يسمعوها كل جمعة في برنامج صباح الخير ..صباح الخير ع بلدي زيتون بلدي و نخيل بلدي ع الرايحين مزارعهم ...
ليلى تحضر في الفطور بروحها في المطبخ
ليلى اللي نسيت نوصفها هي امرأة فائقة الجمال و العمر ابدا مش ماثر فيها بيضاء و شعرها اسود و طويل و عيونها سود و اكبار
جهزت طاولة الفطور و عليها كل ما لذ و طاب و حاطة المبخرة ع المدخل
نزل الهاشمي من فوق يمشي و يلبس في توب التوتة متاعه ابتسامته بسيطة تكاد تبان للي يدقق فيه هلبة ممكن يلاحظها زي امه اللي تعرفه عز المعرفة اول ماشافاته قلبها يضحك بروحه لان هو و علياء و جهاد سر سعادتها من زواج مبني ع الود و العشرة و التفاهم و اكيد الحب
الهاشمي لما شاف لامه كانت الابتسامة حاضرة و بقوة ع ملامح وجهه و الشيء هذا خاص بيها دونا عن غيرها : صباح الخير
ليلى مبتسمة بحب : صباح النور وين اليوم كنك راقد لعند توا مش من عادتك
الهاشمي شاف بوه وراه نازل : البارح راجعت حسابات المزرعة و المصنع ع شان هكي نضت متاخر
و قدم من بوه باس راْسه : صباح الخير يا بوي
جمعة : صباح النور
ليلى مبتسمة : صباح الخير يا حاج هيا الفطور واتي تفضلوا
جمعة شافلها بابتسامة : صباحك مبروك هيا
الهاشمي : وين علياء ؟!
علياء نزلت تجري ع الدروج : يا نجي وخيي اللي فاقدني غير انت وين يا ماما ما دورتيني حتى بالكذب والا انت يا بابا نازل تفطر بدون ما تخطم ع داري تفيقني
الهاشمي شدها من ايدها : غير قولي صباح الخير وانت شي حاطة ع وضع الصلي و نازلة فينا من صباح الله خير
علياء ضحكت: هههههه حتى كلامك ع السلاح
جمعة : باهي خلاص وقت الفطور تقعمزوا و تفطروا بدون دوشة وانت يا علياء وين بنت عمك ؟!
أنت تقرأ
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
