حجر صوان

Part 19 🔥🔥🔥

(اسفة ع التاخير هذا وين جانا الضي)

اسماء بصوت واطي : فهمتي عليا والا؟!

فجرة بتفكير : احني قبل فكرنا نشرطوا عليها تسكن معاي في الحوش الحق قلت هكي اكيد ترفض و تجي منها

اسماء : و الله انك درويشة سامحيني فيها تحسابي بيرفضوا لا تدير روحها طيبة و توافق و هي اللي توريك النجوم في عز الظهر لكن لو مشيتي ع رايي توا تشوفي كيف الموضوع ح يتسكر مرة وحدة و منهم هما يعني انت تطلعي منها قدام ولدك

فجرة اقتنعت : خلاص اماله احني شويا و طالعين و ندير زي ما قلتيلي

اسماء بخبث : مية مية

طوط
طوط

شافت للمرايا و ابتسمت بغرور : ما احلاني و ما احلى دماغي توا الست زينب الكل ح يكرهها و تبدا مجبورة تروح معاي لحوشي و علياء هانم ما صارلها من حبيب القلب و تتنكد هي و عيلتها و الهاشمي بنفسه هو اللي بيلز صاحبه الاخير اللي قعدله ههههههه صحة ليا

لحظات و تفكرت

" انت طالق طالق طالق ما نبيك تكوني مرتي في الاخرة)

لمعوا الدموع في عيونها مسحتهم و لبست قناع الغرور و اللامبالاة و طلعت

زوبا تواسي في شعر علياء : ماشاء الله عليك علياء

علياء تشوف للبسة زوبا كانت لابسة بلوزة خضراء شيفون و معاها سروال اسود و قايمة شعرها فوق و نازل منه خصلات : حتى انت الله واحد عليك

زوبا : و الله انا قبل مش حابة نطلع بكل و لا عندي خلًوق نجامل حد سامحيني بس مرة خالي سكرت راسها

علياء بزعل : يعني بتسيبيني بروحي قبل

زوبا : مش هكي قلت نقعد في المطبخ تعرفي وضعي يا علياء

علياء حبت اطمنها : صدقيني ح تحبيها ديداي فجرة طيبة و ع فكرة راهي من جماعتكم

زوبا ما فهمت عليها : كيف يعني؟!

علياء خذت برفانها و بدت تبخ منه: قصدي طحلوبة زيك

زوبا تنهدت : تصدقي لو نقولك ما عاد يفرق معاي الموضوع خلاص بعد اللي عشته في الشهور هادي بدو الناس عندي مش بشني يحبوا لا بديت نتعامل معاهم ع وقت الشدة ! يعني حوش عمي و عمتي كانوا قدامنا اكثر ناس مويدين و ولد عمي هدا اللي كان خاطبني هوا اللي حرضني نطلع حتى في المسيرات بس بعدين شفتي بروحك شني صار و انتو و خوك بالذات اللي يعتبر من اكثر المعارضين لمعمر و شفتي بعيونك لولاه هو راهو انا ضعت صح اول ما وصلنا اهني عذبني و دمرلي نفسيتي اكثر ما هي مدمرة بس اقل شي كان عنده عذر و عمره ما اعطاني وعد ان يحميني و خالفه زي اوس ولد عمي و عمي و غيرهم هلبة .. تي حتى اهلي سيبوني وسط النار و سافروا كل ما نتفكر هديكا الليلة نحس روحي وحيدة