شاف قدامه سيارة نوعها قديمة شوية و في جنبها راجل عمره من عمر بوه يعاند في السيارة و واضح معاه عيلة
لما ركز فيه عرفه يكون واحد من ابناء عمومة بوه اسمه عبدالحفيظ و سبق و ذكرنا اسم ولده علي و يكون صديق المرحوم عمرلهذا ما كان منه غير يوقف يشوف سيارته علاش واقفة تعوذ من الشيطان
و مسح ع وجهه
و نزل : السلام عليكم لاباس يا عمي
عبدالحفيظ وقت شافه فرح : الله لا يوريك باس يا هاشمي جيت و جابك ربي تعالى شوفلي هالحصلة هذه دارتها فيا نص الطريق
الهاشمي فتح كوفني السيارة و طبس يفحص فيها
في السيارة كانت نفيسة زوجة عبدالحفيط و واضح عليها تعبانة لانها مريضة : الله يربحه هذا ولد جمعة الهاشمي
و من الخلف كانت عبير بنتها مواليد 1986 معلمة احياء في مدرسة اعدادية
البنت سهمت فيه و هامت معاه و سافرت لعند وصلت لعالم ثاني و تفاجئت بيه كيف مولي: تي اين عمر هذا طلقة؟
الهاشمي : يا عمي كلم العيلة و اركبوا معاي نوصلكم السيارة قصتها طويلة راهو ضروري من الورشة
عبدالحفيظ انحرج : بالك انعطلك ع حاجة يا ولدي
الهاشمي خلوقه في شيشه ما عنداش بال نهائي للنقاش بسبب اللي صار متحكم في اعصابه بالسيف : لا تعطلني لا شي و بعدين حوشكم ع طريقي شوف العيلة و تفضلوا
عبدالحفيظ : ربي يربحك يا ولدي
الهاشمي اشرله بايده و ركب سيارته يستنى
عبدالحفيظ مشي لسيارته و فتح الباب اللي من جهة مرته : هيا يا حاجة انزلي بيوصلنا ولد جمعة و خلاص السيارة ما يصيرش منها اليوم
عبير قريب زغرطت
نفيسة بتعب : اااه ساعدني يا حاج نحس في راسي دايخ
طبس شدها من جهة و عبير من الجهة الثانية و مشو لعند سيارة الهاشمي اللي ما كانت بعيدة عليهم اصلا
الهاشمي لما شاف حالتها نزل و فتحلها الباب : تفضلي يا ديداي و لا باس عليك
نفيسة : لا يوريك باس يا وليدي و ربي يفتح عليك
ركبت بمساعدة راجلها و عبير اللي عيونها ع الهاشمي و بس
و ركبت من الجهة الثانية اللي من وراء الهاشمي اما عبدالحفيظ فطبعا ركب جنب الهاشمي
شغل السيارة و طلع
وهما في الطريق
الهاشمي : معش كلمك علي؟
عبدالحفيط تنهد بحزن: ليه فوق من الشهر ماعاد كلمني خذاته الغربة خلاص
الهاشمي تفكر خوه و تحسر : الله غالب يا عمي المهم صحيح
أنت تقرأ
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
