حجر صوان

Part 35

جمعة : انا نبيك انت تفهم معتز يمشي ببنتي لمصر ع اساس بيتدهوروا زي ما يديروا شباب هالوقت (قصده شهر عسل) بيش بنت اختي تسافر معاهم لخوها لاني ما نقدر نسفرها بروحها و لا نقدر نسافر معاها ماهو ما نبي حد يحس بشي لعند تسافر بالسلامة و بيناتنا ولاني واثق فيك بوها يبي ياخذها لدبي تقعد معاهم حتى في مصر مش متريح عليها لانها قريبة ع ليبيا و هو ماعاد يبيها تخش ليبيا بكل

ونيس قلبه زي من جبده بايده يعني عارف انها بتسافر لكن مش بهالسرعة و زيادة موضوع بوها و دبي هذا حمل كبير يعني تبعد لمصر قريبة و خاصة ع بنغازي لكن دبي بعيدة و شني معنى ان معش يبيها تخش لليبيا قعد مفنص عيونه و خلاص

جمعة لاحظ شروده: ونيس نكلم فيك يا راجل وين وصلت

ونيس استاقض : احم معاك يا عمي بس اللي نعرفه ان دبي تبي تاشيرة و تاخذ وقت

جمعة : ماهو بوها يقدر يتملها فيها نستنوا في جواز السفر بس واك جبته انت اليوم

ونيس استسلم وحس ان كل ما قرب هي تبعد يعني قبل ما يشوفها كان كل شيء اسهل

في دار البنات

كانوا راقدات جنب بعض

ومعاهم سهام

علياء : هيا احكيلنا يا زوبا كيف قدر ونيس و خالي ينقذوك من اللي ما يتسمى اكيد مش كل شي حكيتيه قدام امي و جداي

زوبا غمضتً عيونها و تفكرت شكل ونيس و كيف حطها وراه: سبب اخر لعشق بنغازي

سهام و علياء جو مقعمزات و في صوت واحد : شنوووووو

زوبا ضحكت ع ردة فعلهم : هههههههه خيركم

علياء دارت حركة اللفة بصبعها متاع عاودي : عاودي كلامك يا زوبا شنو معناه

سهام : اي ليه معنى واحد راهو

زوبا بهزوة: لا ثاني و لا ثالث موضوع الحب و المشاعر هذا خلاص قلبي من ناحيته صوان و مش حً نفتحه لاي حد بس اللي قصدته حاجة ثانية يعني كيف منحكيلكم الراجل حماني حطني وراء ظهره كان ممكن يموت من وراي و ما اهتم ابدا هذا كله وهو ما يعرفنيش ولا حتى عنده علم اني نقربلكم

علياء باستغراب : بس كلام خالي لجهاد ع اساس وقت شدوا الكلاب هدكما جابهم طول هنا وما سلمهم لاي كتيبة لان عرف انك بنتنا

زوبا استرجعت اللي صار و كيف اصر عليها يوصلها و كيف سلم ع جمعة عادي و ما ساله شنو تقربلهم : حييي تعرفي حق كلامك بس كيف

سهام: فعلا غريبة

علياء تفكرت كلام معتز ع البرنامج: حيييه اكيد من البرنامج يا زوبا وقت عرضوا صورك

زوبا اتضايقت و تخيلت ان يفكر فيها بطريقة مش كويسة و بصوت حزين : نسيته بكل البرنامج انا