( والله ضغطت ع روحي ع شان قدرت نكتب الجزء هذا و بالنسبة للحلقة اللي بعدها مازال مش كاملة شكرا ع صبركم معاي و ربي يقدرني ع ارضاءكم❤️❤️)
الصدمة ارتسمت ع وجوه الجميع بعد سماعهم لتفاصيل اللي صار من ونيس
ونيس تنهد : و نا يا عمي لولا الموقف اللي صار قدامكم ما كنت حكيت في الموضوع بدون اذن صاحبة الشان لان الموضوع يمسها هي اوحدها و السبب الثاني اني نريدكم تاخذوا حذركم منه الحيوان هضا حاشاكم و سامحوني ع تقصيري لان هرب مني و ما قدرت نمسكه و نسلمه لكم
الجد : اللي درته انت كبير يا ولدي ما تعذر ع شي بارك الله فيك و جميلك دين في رقبتنا يعني لو ما جيت في هالوقت كانت بنتنا ضاعت و انت يا مصطفى وصل شكرنا حتى لجماعتك و اكيد عارفين كيف العرض غالي وانتم صنتوا عرضنا
مصطفى : نحنا عيلة وحدة يا حاج و عرضكم عرضنا و الحمدلله تمت الامور ع خير بس لو سمحتولنا نحققوا مع الكلاب (حاشاكم) ع شان نعرفوا منو اللي دازهم لكم لان واضح انهم مش من هنا
ونيس قريب ضحك وقت تذكر كيف جداه فاطمة تناشب فيه بنحن عيلة و هذا بونا بس قدر يتمالك نفسه
جمعة : اكيد خوذوا راحتكم بس خلو جهاد يكون حاضر و اسمعني يا جهاد و الكلام ليكم كلكم ما نبي الموضوع يطلع و ياريت يا جهاد وانت يا حاج الهاشمي ما حد يقوله ما نبيه يديرلي مشاكل قبل العرس
ونيس تنهد براحة و فرح انهم قرروا تاجيله لبعد العرس تكون وقتها زوبا طلعت من البلاد
جهاد.: تم يا بوي
رن تيليفونه و كانت علياء : عن اذنكم
و طلع
مشي و هو بينفجر كل ما يتفكر ان اوس خش للحوش و خذاها منه بكل سهولة و يلوم في روحه لان في جزء من اللحظة زي اللي خشله الشك فيها
علياء مدتله الصفرة : تفضل
جهاد خذاها منها : ديري غيرها و وتوا العشاء و قولي لامي و فرحيها ان خالي مصطفى هنا و ونيس ولد خالي عبدالقادر
علياء خبطت راسها بخفة : حي نسيتهم بكل تعرف من خوفنا ع زوبا نسيتهم
جهاد ابتسم مجاملة : ماشي
و ضيف اصحاب مصطفى و رجع جنبهم في المربوعة
اشرله جده يطلع معاه
طلعوا قدام الحوش : نعم يا جدي
الجد مدله التيليفًون : شوفلي تيليفون مراة عمك منو اللي يتصل بيها
جهاد ما فهم عليه: ليش؟
الجد اعطاه نظرة خيبة امل و غل
جهاد تفاجا: قصدك هي وراها
الجد : شكله هكي هيا نراجي فيك من بكري و قدام الجماعة ما قدرت نتكلم مهما كان حشمة
جهاد وجهه احمر : معاك حق
أنت تقرأ
حجر صوان
Любовные романыرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
