قبل نص ساعة ...
زوبا و سجى طلعوا من المحاضرة و قعمزوا في مكان مخصص للطلبة طاولات و كراسي مخصص للانتظار او مراجعة الدروس يعني زي المكتبة بس عادي مسموح فيه الكلام
سجى : خيرك حسيتك مش ع بعضك من بكري
زوبا تنهدت : اااااه شني منحكيلك تعرفي انت جيتيني من السماء انا يا سجى متضايقة هلبة شفتي اللي داروهولي في البرنامج هذاكا ؟! نفس الناس قاعدين وراي و مش ناويين يسيبوني في حالي مش عارفة وين نمشي باش يرتاحوا و كله كذب راهو اا ع مؤيد و لا ع معارض كله مصالح و حقد و فلوس وراه
سجى خافت عليها : شني صاير يا بنت خوفتيني و اقسم بالله ع قد ما كانت علاقتنا رسمية قبل لكن من وقت وقفتي معاي في الموقف اللي في الاحداث وانا حاسة انك قريبة عليا يا ربت تعتبريني صاحبتك
زوبا شافتلها ع جنب : تي نقولك فرحانة بجيتك علاش اماله لو مش معتبراتك صاحبتي !! انت عرفتك وقت شدتي وقت طيحتي و مستحيل نبدلك و لا نتخلى عليك يا بنت مش انت سالب و انا موجب لكن مع هذا والله مرتاحتلك
سجى حبت تلطف الجو: هوا مشكورة ع كلامك بس لحظة شني معنى انت اللي موجب و انا اللي سالب علاش مش العكس
زوبا ضحكت: هههههههه تبيلك فطومة انت؟!
سجى ضحكت: هههههه ياناعليا ما تخطري عليا هذاك اليوم حصلت عليها جو من الاخير و احسن حاجة كلامها مرة ع الشرقاوي و مرة ع الغرباوي
وهي اهني خطر في بالها ونيس و جوها انقلب ثاني
سجى : تي خيرنا عاد؟ فكينا من النكد
زوبا خذت نفس عميق و حكتلها اللي صار معاها امس بالتفصيل وانتهى بزواجها من ونيس
اللحظة هذه وصل ونيس و كان يدور عليها و شافها من بعيد و جي
سجى مصدومة: ووووه عليا من سمهم هادو شني سحيقة يا كبدي نار و دمار هادو !! يعني توا انت متزوجة
زوبا : معش تفكريني بالله عليك و زيادة ان الهاشمي اللي حكيتلك عليه هو اللي تم الموضوع انا مقهورة يا سجى
ونيس وقف مصدوم ورمجروح منها متوقع صدها و رفضها متخيل ان الهاشمي مأثر فيها باي شكل بس سماع الشيء هذا بنفسه مؤلم لدرجة غير متوقعة...
سجى : بس خلاص هو راجلك و حرام تفكري في غيره
زوبا بحسرة: عارفة يا سجى بس نقولك سر ! هذا اللي اسمه ونيس من قبل صارو بيني و بينه مواقف نكذب لو نقول ما تأثرت بيهم و خاصة اني عرفت بان شاعر بس وقت بعثلي هدية عبارة عن لعبة بزل فيها صورتي وقت المسيرات وكاتبلي عليها
و الا نقولك شوفي بروحك فتحت تيليفونها و كانت مصورة اللعبة كيف صورتها واضحة فيها و الكلام المكتوب .. توا بالله عليك تصدقي انت ان في حد يحب حد هكي من مرة شافه
أنت تقرأ
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
