حجر صوان

Part 30

(السلام عليكم و الله ضغطت ع روحي ع شان انزلها يعني غدوا مرات نتاخر في الحلقة اعذروني انحبكم هلبات و واجد و دنيا)

كانت صدمته قوية هلبة لما تاكد انها مش موجودة و عقله ما استوعب الشيء هذا و خاصة ان يسكر عليها في الباب اول شي خطرله فتح الدواليب لتكتمل الصدمة عنده بعدم وجود اي شيء من ملابسها

حط ايده ع راسه و يشح في شعره: وين مشت ال##؟ معقولة؟

و ع طول فتح الدرج اللي داس فيه كل الاوراق ع شان يتاكد من وجود جواز السفر بس طبعا ما كان موجود : مسرة يا حيوااااانة تحسابي بتتخلصي مني

و ع طول نزل يجري زي المجنون و خذي اول تاكسي للمطار ع اساس يقدر يلحق عليها

لكن وقت هو متجه للمطار كانت طيارتها تعلن عن موعد الاقلاع و مغادرة الاراضي المصرية

و حرفيا هي هذا وين ارتاحت و اطمنت انها تخلصت من قيود مؤيد همست : الحمدلله الحمدلله

وصل مؤيد للمطار و سال ع الرحلات المتجهة و بلغوه ان الرحلة اقلعت من نص ساعة قعمز ع اول كرسي و خاب امله لان خرج خاوي الوفاض البنت اللي استجرم ع شان يوصلها و ضاعت وراها حياة انسان بريء و تيتموا من وراها اطفال سيباته و بالاحرى هربت منها و اصلا عمرها ما كانت ليه لان ما فائدة وجودها في حياته وقلبها و حواسها و كل مشاعرها بعيدة عنه كل البعد

في مشرق ليبيا الحبيبة

قرر ونيس اليوم يغدي العيلة ع مزاجه فجابلهم لحم و داروا مشاوي و كان رايق اخر رواق

عبدالقادر: قولي يا معتز شنو الاوراق اللي دزهن معايا راجل عمتك

معتز شاف لونيس اللي اشرله ما يعطي تفاصيل : ورق عادي يا باتي شور المصنع متاعه ع اساس ناوي يستورد كم حاجة من مصر و يبي يدخلها من ميناء بنغازي

عبدالقادر ما اقتنع لكن سكت: اها قتلي ، المهم راهو نحنا اتفقنا ان اطلع فرحك بعد شهر من توا و الفلوس عطيناهن الهم ع شان البنت تاخذ حاجتها و انت اشقى بشقتك و حال الغاية تكملها في اقرب وقت

معتز توتر و تحشم : ان شاء الله يا باتي

مصطفى : ربي يتمملك ع خير

معنز : ان شاء الله

فاطمة : العقبالكم انتم (ونيس و مصطفى)

مصطفى قام ايديه فوق : كلا نا ما عندي شي مغير هالعيل هضا لا عاد نفكر في زيزة لا شي

عبدالقادر: كنك انت انسى اللي صار و دورلك ع بنت الحلال اللي تساعدك ع العيل هضا

مصطفى : يارا فكونا من السيرة هضي اهو قدامكم الشاعر انكان تريدوا تجوزوا حد جوزوه

ونيس : ان شاء الله يا عمي منو قالك اني ما نبي نجوز

جمعية تفاجئت: صحيح يا ونيس ؟! يعني ندورلك ؟! تي عندي لكي بنت تقول ايش ! سماحة ع عقل ع نشاطة