حجر صوان

Part 27

صباح يوم الخميس صار شي فاجأ سهام يعني كانت حاسة ان زوبا من داخلها انسانة كويسة و طيوبة و محتاجة بس حد يوريها الطريق الصح و عارفة ان الكتب الي اعطتهملها ح ياثروا عليها بس ابدا ما توقعت ان التاثير هذا يكون سريع

وقت نزلت من فوق القتها بلبسة الصلاة متاع فنارة تصلي و تدعي

ما في اسعد من الشعور هذا اللي حساته سهام ان ربي يسخرك ع شان تكون سبب في هداية غيرك

ابتسمت و عيونها دموع و حاطة ايدها ع قلبها

زوبا مسحت ع وجهها : اللهم امين

طبقت سجادة الصلاة و وقفت و تلاقو عيونها مع عيون سهام و الاخيرة معش قدرت تصبر و حضنتها : مبروووووك زوبا

زوبا ابتسمت : الله يبارك فيك و شكرا يا سهام مش عارفة شني نقولك حاسة و كأن قلبي كان مغلف بالصوان بس توا ذاب و انصهر انصهار مع كل سجدة و كل حرف قريته من القران حاسة روحي خفيفة مش صليت يومها و حسيت بالراحة بس اليوم احساسي غير حاجة مختلفة بالمرة نحس في روحي في عالم ثاني زي الريشة فاقدة الجاذبية

سهام محافظة ع ابتسامتها : ماشاء اللع تعرفي ان اللي انت فيه هلبة يصلوا و من سنين بس مش حاسينه و لا يستطعموا في اللذة متاع لذة الايمان و الخشوع

زوبا تنهدت براحة: الحمدلله

فنارة : هيا كان بتفطرن راهو جمعة جاي في الطريق و بنعدوا غادي عاد تلبيسة بنته اليوم و حتى انت يا سهام راهو ماكد عليا تمشي

سهام متحشمة و حاسة روحها ما عندها صفة: لا اعذريني جداي تو نمشي لحوش اختي

فنارة بحزم: لا اختك و لا خوك و كان انت مش ماشية حتى انا هذا مكاني

زوبا شدتها من ايدها : و حتى انا مش ماشية هيا سهام

سهام معش قدرت ترفض : ماشي يالله تعالي قبل تسقع القهوة

زوبا مشت قدامها: لا كل شي الا قهوتك

و بدو يفطروا و يهدرزوا و يضحكوا مرة مرة ع كلمات خالد ولد سهام

اشعة الشمس القوية نوضاته و ازعجاته مسح وجهه و شاف حواليه و تفكر هوا وين و شنو يدير هنا و شنو اللي صار امس قعمز بتعب و حاس روحه مجهد ع الاخر بس في نفس الوقت الغضب اللي فيه يحرق الدنيا باللي فيها

وقف و مشي للحمام اكرمكم الله غسل وجهه اكثر من مرة بعدين توضا و طلع قضي صلاته و خذي تيليفونه و فتحه

والقي مكالمات فايتة من بوه و امه و اخته و خوه و حتى جده متصل بيه

حط ع رقم الاخير

الجد كيف كمل فطوره و هو يخمم في حفيده وين مختفي اول ما شاف اسمه ع الشاشة رد : تي وينك يا هاشمي ؟