تأكدت من صحة المكان التي وصلت إليه بعد رؤيتها لملكتين واقفتين أمامها، تراهنّ ولا ترونها.
ورد بمزاح ويكأنها تخيفهم: بخ، أنا جيييت، ثم التفتت تجاه غلا بتساؤل.
هلا: دي بقا يا ست هلا ورد بقا اللي حكيتلك عنها، ودي صديقتي غلا يا ورد.
ورد: ازيك يا قمر، اخبارك ايه، إن شاء الله نكون صاحبات بقا.
غلا بفرحة أظهرتها دموع عينيها: طبعا، دا شرف ليا والله، أنا فرحانة اوي اني اتعرفت عليكم، ومبروك ليك يا روحي.
نكزتها هلا في كتفها.
غلا: اااااه في ايه يا هلا، أنا عملت ايه دلوقتي؟!
هلا: اسمها مبروك يا ام الهنا.
غلا بابتسامة خجل: تصدقي، أنا اسفة.
ورد: طيب نمشي بقا كفاية تأخير، لسة هنلف كتير لما تشبع.
هلا ببكاء مصطنع: ربنا يستر يا رب.
*********★**********★*********
نهي: مش أم الدكتور لؤي جت هنا يا ابو أحمد؟!
عبد الرؤوف: يا خبر!! تصدقي كنت ناوي أكلمه وأأكدله إننا علي ميعادنا، علشان كنت عارف إنه هيفكر إزاي، وهيتردد بعد الظرف اللي حصل فجأة دا.
نهي: دا يا قلبي بقا خايف، ومش عارف يعمل ايه، زي اللي بين نارين.
عبد الرؤوف: ربنا يجعله في ميزان حسناته يا رب، ويجعله شفيع ليه يوم القيامة.
نهي: يا رب اللهم امين.
عبد الرؤوف: إنتي قلتيلها إيه يا ام احمد صح؟!
نهي: قلتلها إننا مش فارق معانا الشكل ولا الجسم، إحنا بتشتري راجل، عارف ربنا، ويتقي الله في بنتنا.
عبد الرؤوف بتساؤل: ورغد؟!
نهي: مالها؟!
عبد الرؤوف: رأيها إيه، مش كنتي المفروض اخدتي رأيها الأول، هل هي هتقدر تتعايش مع الوضع دا ولا لا؟! مش عايزين نظلم الناس معانا، ولا نظلمها.
نهي: أنا عارفة رغد يا ابو أحمد مش تايهة عنها.
عبد الرؤوف: ولو يا ام أحمد، دا زواج، معلش اتأكدي منها بردو.
نهي: طيب هقوم ادخلها كدا، مع إني عارفة ردها، بس هقول إيه.
عبد الرؤوف: معلش بقا، خليها عليكي المرة دي.
نهي بضحك: ماشي يا سيدي، أمري لله.
"لا يرتبط الحب بعمرٍ أو زمنٍ، بل نحن من نصنعه، وبيدنا صنعه في أي وقت كان، فقط أحسن الاختيار".
دخلت إلى ابنتها حيث كانت تعد الطعام في المطبخ.
نهي: ها يا رغودة، خلصتي ولا لسة؟!
رغد ببكاء أثر تقطيع البصل: اها، لسة، شوفتي حالي؟!
نهي: انشفي يا بت كدا، بكرة تقطعي لما تشبعي، ومش هتتكلمي.
رغد: مش تخوفيني بقا يا ماما الله، ما أنا ست بيت شطورة اهه.
نهي: واحسن ست بيت كمان، يا سلام، بس كدا، كنت عايزة اخد رايك في حاجة بقا!
رغد: اتفضلي يا نونو سامعاكي.
نهي: اتلمي يا بت، نونو ايه دي؟! هو أنا قدك؟!
ضحكت رغد بصوت عالٍ علي طريقة والدتها: خلاص حقك عليا.
نهي: طيب دلوقتي، إنتي إيه رأيك في موضوع لؤي؟!!
رغد: من ناحية إيه يا ماما؟!
نهي: بعد اللي حصل معاه يا رغد، هل إنتي هتقدري تتحملي، وتتعايشي مع الظروف دي، من غير ما تجرحيه مرة، أو تحسسيه بالعجز؟! لأنه هيبقى مسؤول منك يا بنتي، وربنا يرضي عنك برضاه هو كمان عنك.
رغد: بصي يا أمي، الموضوع مش فرق بالنسبة ليا والله، بالنسبة ليا المعاق مش معاق البدن تماماً، كتير ناس سالمة ومعافة، ومش يتعاشروا والله.
نهي: زين العقل يا بنتي، معاكي حق، أنا كدا ربيت، يعني كدا خلاص نخليه ييجي!!
رغد: تمام يا ماما، علي خير، بس بعد ما نخلص من ورد بقا.
نهي: نخلص منها دا ايه!! والله دي بنبونة البيت، مش عارفة هتبعد ازاي؟!
رغد: يا ماما مش تقلقي، دي قاعدة معاكي لسة شهرين، وبعدين دا بينك وبينها مش مكمل خمس دقائق، احنا هنصيع علي بعض!!!
نهي: نصيع؟!!! لا أنا هطلع احسن، علشان مش عايزة اخلص منك أنا.
ضحكتا سويا، وخرجت كل منهن لإكمال مهمتها.
************★***********★************
كان جالسًا، يُعد عدته، يكمل دراسته، فها هو قد اقترب موعد مناقشة رسالة الدكتوراه الخاصة به، حتي قاطعه صوت رنين هاتفه.
لؤي: السلام عليكم، يااااه والله افتكرت يا جدع إن ليك صاحب!!!!
أحمد: يا راجل مش كدا، كله ضرب ضرب مفيش شتيمة.
ضحك لؤي علي صديقه، فهو يعلم أنه دائماً ما يحب المزاح.
لؤي: ماشي يا عم، مش عايز اشتم بس علشان ربنا ييسرلي الحال في المذاكرة، احسن تدعي عليا دعوة ولا حاجة أنا مش ناقص.
أحمد: عامل ايه يا باشا، واحشني والله.
لؤي: والله إنت اكتر، فينك يابني كدا مختفي؟؟
أحمد: الدنيا يابني، هنعمل ايه، هي كدا، المهم بقا قبل ما انسي!!
لؤي بمزاح: ارغي.
أحمد: يا جدع أم الكلمة بتاعتك دي، أنا اللي في البيت بقا هيولعوا فيا بسببها.
لؤي: الحمد لله، أنا كدا ربيت صح.
أحمد: واد انت، هاجي اضربك والله، اسمع بقا واسكت شوية.
لؤي: اهه سمعت.
أحمد: إن شاء الله كتب كتاب اختي يوم الخميس إن شاء الله، عقبالك يا عم، وعايز همتك معايا بقا، للأسف آسر العريس، فمش هينفع اشغله، اخد براءة هو المرة دي، فهشغلك إنت بقا.
لؤي: يا ساااتر، أنا عارف والله إن في مصلحة، بس عامة مبارك يا سيدي، وعقبالك انت كمان، أما بالنسبة لعقبالي دي، لازم تكون متوضي الأول.
أحمد: مش هرد، والله ما هرد، أنا مستنيك من النجمة، ابقي أتأخر بقا، علشان مش تلاقي حد يعبرك.
لؤي: يااااه، بقا الواد آسر بقي عريس خلاص، والله الواحد فرحانله من قلبه يا شيخ.
أحمد: معاك حق والله، ربنا يسعدهم يا رب، صحيح متنساش، الحاجة تيجي قبلك.
لؤي: طيب وهي هتيجي قبلي ازاي يا ناصح، ما انا اللي هجيبها.
أحمد: مش بقولك إنت ظريف اوي النهاردة، يلا سلام علشان مش عايز اقفل في وشك.
لؤي بضحكة عالية، فها هو قد استطاع إزعاج أحمد، وهو فقط من يتمكن من إزعاجهم: سلام يا صاحبي.
********★********★********★********
تتحرك بصعوبة، تجر قدميها بإرهاق شديد.
هلا: يا ورد أبوس إيدك، أنا غلطانة إني جيت معاكي اصلا، معلش يا غلا تعبناكي معانا، هي ورد كدا لازم تطلع عنينا علشان تشتري حاجة، فما بالك بقا بحاجة الفرح.
غلا: لا خالص، أنا فرحانة اوي والله.
نظرت إليها هلا نظرة شرسة: نعم ياختي؟! فرحانة!!!
ورد: شايفة الناس العسل دي، مش زيك.
هلا: أنا مش عسل، أنا بقيت مكسحة هانم، عايزة اروح، رجولي يا بشر.
ورد: خلاص بطلي صياح، إحنا مروحين اهه، وبعدين والله اغير رأيي، واخلي الفستان الأسود ليا.
هلا بفرحة طفولية، وهي تفغر فمها: بجد يا وردتي، عملتيلي الفستان اللي أنا كنت عايزاه.
ورد: اه ياختي، ياكش يطمر، دا اخد اكتر من فستاني.
هلا: أيوة بقا، تسلميلي يا وردتي.
غلا: هو إنتي بتخيطي فساتين يا ورد؟!
ورد: أيوة، أنا مصممة.
غلا: اللهم بارك، ربنا يوفقك يا رب.
ورد: أنا وإنتي يا جميلة يا رب، المهم مش تنسي الميعاد بقا، يوم الخميس الصبح إن شاء الله تكوني عندنا، اتفقنا.
غلا بفرحة: اتفقنا إن شاء الله، هبقي اكلم هلا قبل ما اخرج، علشان تقابلني.
ورد: تمام، إن شاء الله.
غلا: يلا أنا هستاذنكم بقا، علشان هروح اركب واروح أنا بقا.
قبلتها ورد، وهلا.
ورد: خلي بالك من نفسك يا روحي.
هلا: في رعاية الله يا لولي.
غلا: في رعاية الله يا بنات، يلا سلام.
********★********★********★********
تجلس هلا ممدة القدمين: اااااه يا رجلي ياني، يا كُلي ياني، ياني ياني.
أحمد: لا إله إلا الله، كل دا مرة واحدة؟!!!
هلا: اسكت يا احمد بقا مش وقتك خالص، دي اختك خلصت عليا، وانا لسة مش دخلت دنيا.
أحمد: يا بنتي انتي مالك كدا، انتي بسكويتة ياختي، مش قادرة تتحملي شوية مشي؟!!
هلا: اهو أنا كدا بقا، ثم أكملت بجدية: ألا صحيح يا ميدو؟!
أحمد وهو يضرب كفًا بكف: إنتي مجنونة يا بنتي؟! والله أنا بستغربلك.
هلا بضيق مصطنع: تصدق أنا غلطانة، أنا داخلة أنام، هه.
نهي: هو كله هيقوم ينام دلوقتي، علشان عندنا يوم طويل بكرة، من الفجر كله هيصحي، ومفيش نوم تاني، عايزين نخلص نظافة وترويق قبل ما حد ييجي.
هلا وهي تفتح عينيها بدهشة: ها؟! ترويق ايه؟! اهق اهق.
أحمد: ترويق اللي في بالك ياختي، صحيح يا أمي، أنا كلمت لؤي، هيجيلي بدري إن شاء الله، وهتولي انا وهو مهمة الأكل.
ورد: أيوة بقا، هناكل من ايد الشيف أحمد، يااامي.
أحمد: لا يا ماما انسي، إنتي العروسة، مش هتاكلي.
ورد: دا بعينك، قال عروسة قال.
نهي: طيب يلا بقا كفاية كدا، سيبيها لوقتها ياختي، بس ياك تأكلي اومال.
أحمد: هتااااكل، المشكلة إنها في الاكل هتاكل مش عايزك تقلقي من الناحية دي خالص يا أمي.
ضحك الجميع علي حديثه، متجه كل منهم إلي مرقده.
#حب_في_الله.
#سارة_سامي.
