طيب الجراح 💚
الجزء الثاني من "حب في الله"💚
بقلم: سارة سامي ✍️
الفصل(١٣)
قاطعها صوت أخيها، الذي تفاجأت بوجوده، وإن كان يقف خلفها منذ عدة دقائق.
أحمد بحمحمة: الجميل سرحان في إيه؟!
استدارت له، لتبتسم ابتسامة صغيرة: تعالي يا أحمد، ولا حاجة، حبيت الجو بس.
أحمد بعد أن جلس بجوارها: سهر!!
سهر: نعم؟!
أحمد: إنتي أكيد عارفة إني حافظك كويس جدا، وعارف إنك مش تمام، وفي حاجة تاعباكي، وإنتي طبعاً مش هتخبي عني حاجة زي كل مرة، أنا مش ماما يا سهر، قولي يا حبيبتي اللي جواكي، أنا سامعك.
كانت تستمع له، ودموعها تتسارع في الهبوط، لترتمي بين ذراعيه فور أن أنهي حديثه، فيزداد نجيبها.
أحمد مطمئناً إياها، وهو يمسد علي ظهرها بحنان: هشششش، اهدي، اهدي يا حبيبي، متخافيش.
سهر: ماتت قدامي يا أحمد، كانت شابة لسة، كانت قمر وطيبة، بقت عمالة تعيط وهي بتطلع في الروح، عمالة تهمهم بكلمات، مش بقا حد فاهم إيه هي، بس أنا فهمتها، أنا قعدت أفكر في الحركات اللي كانت بتقولها، كانت بتقول يا ريتني سمعت كلامه، يا ريتني ما عملت كدا، قلبي وجعني أوي وهي بتعيط يا أحمد، كانت روحها بتخرج بعذاب، تحسها مش بتتعذب من ألم سكرات الموت بس، كان في حاجة تانية تاعباها، بصتلي بصة في الآخر قبل ما تلفظ آخر نفس ليها، بصتلي بصة وجعت قلبي يا أحمد، مش راضية تفارق بالي، جسمي وقلبي كله واجعني من ساعة ما سمعتها بتترجاني وبتقولي بصعوبة، ربنا يسامحني، اوعي تنسيني ارجوكي، كل اللي واقفين بصولي، فكروا إني اعرفها، مش فاهمة هي تعرفني منين، وايه كلمتها دي، أنا مش قادرة يا أحمد، الموقف كان صعب أوي، مأثر فيا، بتعذب يا أحمد، قلبي واجعني من ساعتها، قلبي واجعني يا أحمد، تعبانة، تعبانة، ألقت آخر كلماتها وصوت نحيبها يزداد.
أحمد بتأثر، وهو يحاول الصمود كي يهدئ أخته، وهو يزيد من احتضانها: بس يا سهر اهدي يا حبيبتي، الموت واجب علينا كلنا يا سهر، كلنا هنموت يا حبيبتي، كبير، صغير، مفيش حاجة اسمها صغير علي الموت يا سهر، وبعدين تلميحات البنت، ونظرتها ليكي، مش يمكن تكون رسالة بحاجة معينة، وهي طلبت منك تدعيلها، مش تبكي وتعذبيها، ادعيلها يا سهر، دا أهم حاجة، واكتر حاجة هي محتاجاها، إنتي فاكرة إن دموعك دي هتفيدها بحاجة، إنتي كدا بتعذبيها يا سهر، اصبري يا حبيبتي علشان تعرفي رسالتك دي، وتوصليها، لأن دي بقت أمانة عليكي.
سهر بهدوء بعض الشيء: هعرفها إزاي يا أحمد؟! هعرفها إزاي؟! الموضوع مبهم، ومش عارفة أوصل لأي خيط ليه حتي.
أحمد: الأيام أكبر وأهم وأفضل برهان يا سهر، الأيام بتوضح كل حاجة يا حبيبتي، سبيها علي اللي كلفك بيها يا حبيبتي، ربنا بعتلك البنت دي، في الوقت دا، بالمهمة دي، وهو اللي هيوصلك لطريقها، لكن اللي إنتي عاملاه في نفسك دا، غلط وألف غلط كمان، قومي اقعدي مع أخواتك، والناس اللي بيحبوكي، واللي قلبهم واجعهم من القلق والخوف عليكي، قومي يا سهورتي، وارجعي نوري، وانشري البهجة في المكان اللي تقعدي فيه، ثم أكمل بتأثر: وحشتنا سهر أوي يا سهر.
