Love is Painful

마지막 첫사랑-Last First Love(Extra)

ရှုပ်ထွေးပွေလီလွန်းတဲ့ ကားလမ်းမကြီးထက်မှာ လိမ့်ဆင်းနေတဲ့ 𝗛𝘆𝘂𝗻𝗷𝗶𝗻 ကားအနက်ရောင်လေးရဲ့ ဘီးဟာ အချိန်ကြာလာတာနဲ့အမျှ မူမမှန်သလို ခံစားလာရသည်။ သို့သော်လည်း တစ်ယောက်သောသူဆီကို အမှီသွားမှရမယ်ဆိုတဲ့ အသိစိတ်က မူမမှန်နေတဲ့ ကားဘီးကိုတောင် မမှုပဲ ရှေ့ဆက်ဖို့ သတ္တိတွေ ပေးစွမ်းနိုင်ခဲ့သည်။ ရင်ထဲက ပူပင်သောကတွေနဲ့အတူ သူ့ဆီကို အချိန်မီမရောက်မှာစိုးရိမ်တဲ့ သောကတွေပါ ထပ်လောင်းပြီး အရှိန်မှန်မှန်နဲ့မောင်းနေတဲ့ကားကို အရှိန်တင်လိုက်ပြီး ခရီးဆက်လိုက်သည်။

လေဆိပ်နားရောက်ခါနီးလေးနားမှာပဲ ပြည့်ကျပ်နေတဲ့ ကားတွေကြားထဲမှာ တန်းစီရတော့မယ်ဆိုတာသိလို့ ဘရိတ်ကိုနင်းလိုက်ပေမယ့် ဘယ်လိုမှ အရှိန်သတ်လို့မရတော့တဲ့ ကားလေးဟာ လမ်းမထက်မှာ ဘယ်ညာယိမ်းထိုးနေတော့သည်။ စိုးရိမ်စိတ်တွေနဲ့အတူ ကြောက်စိတ်တွေပါ ရောယှက်လာတာကတော့ ကားမောင်းတာနဲ့ ပက်သက်ပြီး စိတ်ဒဏ်ရာရှိခဲ့ဖူးတာကြောင့်ဖြစ်သည်။ သူတစ်ယောက်တည်းအတွက်ကိုကြည့်ပြီး တစ်လမ်းလုံးအားတင်းမောင်းလာခဲ့ပေမယ့် ရုတ်တရက် အရှိန်မထိန်းနိုင်တော့တဲ့ ကားကြောင့် စိတ်တွေလည်း ကားဘီးလို မူမမှန်တော့ပဲ ကြောက်ရွံ့မှုတွေနဲ့အတူ ပေါင်းစပ်လာသည်။

သိပ်မကြာလိုက်ခင်မှာပဲ သူ့ကားလေးဟာ နောက်ကားတစ်စီးနဲ့ တိုက်မိပြီး မီးခိုးငွေ့တွေထွက်ကာ လောင်ကျွမ်းနေတဲ့ ကားလေးပေါ် 𝗛𝘆𝘂𝗻𝗷𝗶𝗻 စိတ်အစဉ်ဟာ ငြိမ်သက်ပြီး မျက်ဝန်းတွေ မှိတ်ကျသွားတော့သည်။

လောကကြီးကို နှုတ်ဆက်ထွက်ခွာရတော့မယ့်သူတစ်ယောက်လို အသက်ကိုလုရှုနေရခြင်းအကြောင်းကတော့ သူအရမ်းကိုချစ်ရပါတယ်ဆိုတဲ့ ကောင်လေးကြောင့်သာမဟုတ်ရင် ကားပေါ်မှာတင်ပဲ သူ့ဘဝကြီးကို လက်လျှော့ကာ အရှုံးပေးလိုက်တော့မှာပင်ဖြစ်သည်။

ဒါပေမယ့် အချစ်ကပဲ ဆွဲဆောင်အားကောင်းတာလား။ ကောင်လေးကိုတွေ့ရဦးမယ်ဆိုတဲ့အသိနဲ့ စိတ်ကိုရနိုင်သမျှတင်းထားပြီး နာကျင်မှုကို အံတုကာ ဆေးရုံကားသံတွေ နားထဲကြားယောင်လာသည်။