مغرورتي

الحلقه الثالثه...(3)
صباح يوم جديد
وعت رزان علي صوت فونها ايرن
رزان ناضت و بحتت في فونها لقتها أرياف صحبتها
رزان ابــ صوت ناعس: ايوا رفوفه
أرياف ابــ صوت ايقطع وهي تبكي: رزان أنتِ وين قاعده
رزان ابــ فجعه و خوف: أرياف كنك خوفتيني
أرياف منهارة أبكاء: رزان جاوبيني أنتِ وين
رزان: فــ الحوش أحكي كنك
أرياف تبيك: أفتحي الباب أنا قدام باب حوشكم
رزان ابــ صدمه: هيا هي جايه
و صبت تجري و طلعت ابــ سرعه شور باب الحوش و فتحاته
و أول ما فتحت الباب أرياف طول قدمت عليها و ضمتها
رزان ابــ خوف: أرياف يا عمري كنك
أرياف تبكي و بس
رزان: باهي تعالي خشي
سكرت رزان الباب و خشت هي و أرياف جوا المربوعه
طبعاً كانت الساعه 8 ونص الصبح و كانو أهل رزان كلهم راقدين
رزان: قعمزي هنا تو انجي
عدت رزان جابت أميه لِــ أرياف و جت ابــ سرعه و خشت و سكرت
باب المربوعه
رزان مدت لِــ أرياف الميه
رزان: هاكي أشربي و اهدي و فهميني بــ شوية شن صاير أمعاك
أرياف شربت الميه و حطتها جنبها
أرياف: لزوني من الحوش
رزان ابــ ستغراب: كيف
أرياف وخنقتها العبرة: خالي لزني من الحوش
رزان: هيييييييييييي أنتِ فيش تحكي
أرياف انهارة ابكاء: شن ذنبي لو أنا يتيمه و ما عندي حد
شن ذنبي لو ما عنديش حوش انعيش فيه شن ذنبي
يا رزان شن ذنبي قوليلي
و اقعدت أرياف اتخبط علي وجها
رزان ابــ حزن تام: خلاص يا عمري ما أديري في روحك
هكي يا أعيوني
أرياف تبكي: أنا مليت يا زيزو واللهي مليت مش قادرة أنتحمل حياتي
خاطري نعرف شن دايرة في حياتي عشان ربي يبتليني هكي واللهي
من أول ما جيت ع حياة و انا متعذبةة و حياتي مش كيف حياة الناس
رزان: خلاص ياروحي أهدي و كل حاجه ح تنحل خلاص تعالي
اغسلي وجهك و بدلي ادبشك و أرقدي و ريحي راسك من التفكير
أرياف هزة راسها معناها باهي و صبت هي و رزان عداً
للدار عطتها توته و خشت دوشت و بدلة دبشها و فرشتلها
رزان جنبها و رقدت هي وياها
__
تعالو انقوللكم شن قصة أرياف يالي برضو هي
ح اتكون بطلتنا
أرياف يتيمة الأب و الأم ماتو هلها من هي عمرها 5 سنوات
طبعاً لأن عمامها مش عايشين هنا فــ خالها هو يالي تبناها
و رباها بس للأسف كانت عايشه في جحيم مرات خالها
كانت اتعامل فيها و كأنها خدامةة عندها و خالها كان يسمع
في كلام مراته و ايعامل فــ أرياف معاملة مش حلوه بككككل
أرياف صديقةة رزان و سندس وااااااااجد بكل من أيام الأعدادي
و رزان اتحبها كأنها أختها لذالك أول مِكان أرياف تمشيله بعد
تضايق هنا صحباتها رزان و سندس

(و هذي قصةة بطلتنا الثانيةة مختصرة و تفاصيل الأحداث
ح تعرفوهن من خلال الحلقات)
........
عند نبيل
باب الدار ايدق
نبيل وعى من نومه
نبيل ابــ صوت عالي و ناعس: ايواااااااا
مسعوده: نبيل
نبيل: تعالي يا أمي
مسعوده فتحت الباب و خشت
مسعوده: هيييييي راقد خلاص خلاص خليها بعد توعى
تو أنرد عليك
و جت مسعوده تبي تطلع
نبيل: تي عالي يا أمي وين ماشيه بعد إيش بعد نوضتيني
مسعوده خشت و سكرت الباب و قعمزت جنب نبيل
نبيل عدل رقدته: نعم يا أمي شن في علي هــ صبح
مسعوده: من الأخير شن رايك في شيماء بنت عمك
نبيل بــ ستغراب: كنها
مسعوده: تي أنا نسأل فيك شن رايك فيها اتكون عروس لكي
نبيل: واللهي يا أمي أنتِ عارفه أنا ما عنديش خلطة واجد
مع بنات العيلة فــ ما نعرفهنش من بعضهن كيف أنتِ عاجبتك
مسعوده: القنهااااااا ما شالله عليها حره و نظيفةة و ناشطة
و فيها أحترام مش عادي
نبيل: دبينها عاجبتك خلاص توكلي على الله
مسعوده: خلاص نحن بعدين مشيين متغديين عند جدك
تعال أمعانا بيش اتشوفها كان عجباتك خليني نحكي عليها
الــ باتك
نبيل: باهي تمام
مسعوده: هيا رد أرقد آسفه ع أزعاج
و صبت مسعوده طلعت من الدار و نبيل رد رقد
.........
مشى الوقت
تحديداً الساعه 11 إلا
عند رزان
ريناد ناضت من نومها و انفجعت بعد شافت أرياف راقده
ريناد ابــ صوت واطي: ردينه ردينه
ردنيه: هممممممم
ريناد: تي نوضي
ردينه فتحت أعيونها: نعم
ريناد: شوفي من
ردينه: من
ريناد شيرتلها علي أرياف
ردينه انصدمة: أرياف شن جابها هنا بسم الله
ريناد: مش عارفه توا وعيت القيتها راقده
علي نوضت رزان ع صوت خواتها
ردينه: رزان أرياف كيف جت هنا
رزان ابــ صوت واطي: اسسسس تعالاً برا تو نحكيلكاً
و صباً البنات طلعاً برا الدار لقاً امهن و باتهن فــ صاله
قعمزاً و حكتلهم رزان علي أرياف
رزان: بس مش عارفه خالها ليش لزها و كيف لزها
خليل: تؤ تؤ تؤ لا حول ولا قوة إلا بالله العلي العظيم
رابحه: معقوله في ناس هكي
خليل: تي اهاا يا رابحه أنتِ وين عايشه تي في ناس أدير أكثر من هكي
عشان صباياها ولا عشان الفلوس
رابحه: آآآآآآآآه يا مينتي عليها مسكينه
رزان: بابا ممكن نطلب منك طلب
خليل: نعم يا بابا
رزان: ممكن أرياف تقعد عندنا لأنها واللهي ما عندها غيري
و أنا كيف أختها لو ما صبيت امعاها توا وقت الشده أمتى نبي
أنصبي أمعاها
خليل: أكيده يا بابا بدون سوؤال هذي صاحبتك و أنتِ
لازم في كيف هــ الوقت اتصبي امعاها و قوليلها أن الحوش
حوشها و لو ما شالها الحوش أتشيلها أعيونه
رزان صبت و ضمة باتها
رزان: نجك ليا يا أحلى بابا فــ دنيا
خليل ابــتسم: هيا نوضاً ديراً فطور
رزان حطت إيديها علي أعيونها: من هذين يا قلبي
و صباً البنات كلهن للمطبخ و أقعداً ايديراً فــ الفطور
........
عند نبيل
وعى دوش و بدل أدبشه وطلع لقى عصام يشرب في قهوه فــ صاله
نبيل: كيف وين الأهل
عصام: عدو الحوش جدي قالو الغداء غادي اليوم
نبيل: اهاا قالتلي أمي اليوم الصبح لكن نحسابهم مشيين ع ظهر
عصام: لالا عمامك رنو علي باتك و قالوله تعال بدري
نبيل: باهي معناها خليني نمشي انشوف جدك و نعدي شور الشباب
عصام: كلا أنا نبي أنخش انتمرقد هذ ترويحتي من المزرعه
نبيل: باهي هيا سلام
عصام: سلام
و صبى نبيل طلع و عدى شور حوش جده
..........
عند رزان
حطاً الفطور و قعمزو يفطرو
رزان: اووووووف رفوفه هيا عاد نبي نقعد نجدى فيك
عشان اتصبي تفطري امعانا
أرياف: واللهي أنتحشم يا رزان
رزان: رفوفه مافيش حد إلا بابا و ماما و خواتي بس
هيا صبي عاد
أرياف: بس ....
رزان قاطعتها: واللهي لو ما اتصبي تفطري امعانا
حتى أنا ماني فاطرة
أرياف: تؤ أنتِ شن دخلك
رزان: كلمة وحده صبي
أرياف: اوووف ياربي هيا تعالي
رزان ابــتسمت: هيا
و صباً رزان و أرياف طلعاً برا و قعمزاً يفطراً
و خليل قال لِــ أرياف أن الحوش حوشها و أنها كيف بنته
بس مابش ايحسسها أن رزان حكت حاجه
خليل: من زمان قبل ما نزوج أمكاً كنت نبي ناخذ أخت صاحبي
و صاحبي يبي ياخذ عمتكاً
رزان: باهي بعدها شن صار
خليل: لكن ما صار نصيب
ردينه: يعني شن السبب يالي ما خلاكم تاخذو خوات بعضكم
خليل: نحن حكينا في بنتهم و هما حكو في بنتنا و قعدنا
كم سنه و نحن علي نفس الحاله لكن بعد المقابله
ما تريحنا البعضنا فــ قررنا أن ما نغصبو أرواحنا
و بعدين نندمو فــ خلاص ما صارش نصيب
رابحه: باهي وبعدين مع هــ القصةة الزفته هذي
ريناد تضحك: ماما غارت يا حاج
خليل و البنات اقعدو يضحكو
رابحه ابــ نص عين: خلاص سكرو علي هــ سيرة
خليل: باهي حاضر خلاص غيراً الموضوع يا بنات
بعد خطرها سفيان وين
رابحه: طلع اليوم ع فجر قال يبي يستلم طلبيه
خليل: اهاا
رزان ماسكة ضحكتها: بابا هي سمحةة أخت صاحبك
رابحه ابــ عصبيه: رزاااااااااااااان
كلهم اقعدو يضاحكو
أرياف كانت اتشوف لِــ رزان وهلها كيف كانو ايهدرزو
و يضحكو و جوهم حلو كانت اتمنى لو كان عندها عيلة
هكي تجتمع ع فطور و ع غداء و ع عشاء و ايهدرزو
مع بعضهم كانت اتمنى لو أن ربي ايفكها من كربها
و يفرجها عليها
( ربي كريم)
.........
عند نبيل
وصل نبيل الحوش جده نزل لقى الدنيا حايسه عمامه و عماته
خش نبيل للمربوعه سلم علي عمامه و جده و قعمز هدرز امعاهم
أشوية وبعدها جاته رساله من أمه مكتوب فيها
مسعوده (تعال خش سلم و بحت في شيماء)
نبيل (تي أنا شن عرفني بيها بيش أنبحت فيها)
مسعوده ( تو انقعمز جنبها تلقاها علي إيميني)
نبيل (باهي تم)
نبيل صبى
فتح الله: وين ماشي يا نبيل ما اتقول طالع
نبيل: لالا يا جدي نبي نمشي أنسلم علي عماتي
فتح الله: اهاا باهي تمام
نبيل رد لف وطلع من المربوعه و عدى شور الباب الوسطي
و دق الباب و خش
نبيل: احم احم يلا يلا
مسعوده: أنبوله تعال خش ما فيش حد غريب
نبيل خش: السلام عليكم
كلهم: وعليكم السلام
وخش نبيل قعد ايسلم
عمة نبيل: نجي غزال عمته ياربي
و ضبطة نبيل
نبيل: كيف حالك يا عمتي انشالله ابــ خير
و حب علي راسها
عمة نبيل: الحمدالله يا أعيوني عمتك أنت
و كمل نبيل تسليم و صبى امقابل أمه بس ما قدر
ايرفع عينه فيه شيماء
نبيل: كيف حالكم انشالله ابــ خير
كلهم: الحمدالله في نعمه من ربي
نبيل: باهي الحمدالله مش ناقصكم شي ما تبو شي
عمة نبيل: سلامتك يا روحي ما نبو شي
مسعوده خافت نبيل يطلع بدون ما ايبحت في شيماء
فــ حبت تنقذ الموقف
مسعوده: نبيل سلمت علي شيماء بنت عمك
نبيل توتر: سلمت عليهن كلهن
عمة نبيل: قصدك ما ايفرز فيهن
مسعوده: اهاا ما يعرفهنش من بعضهن
عمة نبيل: اهي شيماء يالي جنب أمك
نبيل يا دوبك رفع أعيونه فيها و بحت فيها
نبيل ابــ توتر: خير كيف حالك
شيماء ابــ حشم: تمام الحمدالله
نبيل قعد ايبحت فيها اشوية وبعدين نزل أعيونه
عمة نبيل أغمزة لِــ مسعوده و مسعوده اضحكت
نبيل: أمي ما تبي شي
مسعوده: لالا سلامتك
وطلع نبيل و شيماء أعيونها مزالت مع نبيل
نبيل طلع خش للمربوعه قعد اشوية وبعدين طلع مع أصحابه
و قال ان ح ايرد ع غداء
........
عند رزان
رزان: أرياف أسمعيني أنتِ ح تقعدي عندي
أرياف: أنا مش حابه انثقل عليك و علي هلك تو نمشي اندبر روحي
رزان: بلاش سماطه وهلي هما هلك و أنتِ أختي فهمتي شن معنى أختي
أرياف: بس يا رزان
رزان: أرياف بلاش اعناد باهي أقل حاجه اقعدي عندي نين يكملاً
الأمتحانات بيش نقرو مع بعضنا وبعدين ايصير خير
أرياف اقعدت ساكته وبعدها
أرياف: خايفه انثقل عليكم
رزان: بلاش سماطه شنو اتثقلي علينا خلاص عاد كلمة وحده
تقعدي عندي يعني تقعدي عندي و انتهت القصةة
أرياف ابتسمت و ضمة رزان
رزان ابتسمت و ضمتها بــ قوووووة
..........
عند أهل نبيل
تحديداً فــ المربوعه
فتح الله: سالم نبي نسألك
سالم: نعم يا باتي
فتح الله: معش شفت مرعي صاحبي
سالم ابــ ستغراب: مرعي من
فتح الله: كيف مرعي من مرعي افلان صاحبي
سالم: اهااااااااااااا اوكي عمي مرعي لا واللهي من سفرتك
حتى هو اختفى و كنت انتلاقى أنا و اولده لكن بعد أنا سافرة
للعمل برا قعدت قرابت السنتين بعد رديت القيتهم امحولين من الحوش
و دورت عليه واجد لكن ما القيته
فتح الله: اهاا المهم اليوم صاحبي جمعه عنده فاتحت حفيده نبيك
تمشي امعايا
سالم: باهي تمام تو ع عصر نمشو مع بعضنا
فتح الله: تمام
........
مشى الوقت
عند عيت نبيل تغدو كلهم في حوش جدهم و مسعوده
كملتها تعزق في كلام لِــ سلفتها يالي هي أم شيماء
أنها تبي تاخذها الــ نبيل
أما نبيل جا تغدى و عدى شور حوشهم عشان يرقد
عند عيت رزان
حتى هما تغدو و ضمو حوستهم و خشو عشان ايقيلو
..........
عند أهل رزان
رابحه: خليل العصر إذن
خليل: اهاا ما اتحقيش فيا طالع نبي انصلي
رابحه: باهي سفيان روح
خليل: لالا مزال ما روح هيا تبي حاجه أنا طالع
رابحه: لالا سلامتك
و طلع خليل و عدى شور الجامع
........
عند عيت نبيل
سالم: هيا يا باتي العصر إذن الفاتحه أقريب تنقرى
فتح الله طلع: هيا اطلع
و عدى سالم و فتح الله اركبو فـ سيارة و عدو شور الجامع
....
بعد أشوية وصلو
سالم: باتي أنت أنزل و خليني أنا اندرس السيارة و انجيك
عيب اتأخر أكثر من هكي ع صاحبك
فتح الله: باهي تمام
و نزل فتح الله و قعد سالم ايدرس فــ سيارة
........
عند خليل
وصل للجامع لقى عرم سيارات
خليل: تؤ تؤ تؤ شنو هذا كلا شكلها في فاتحه
و قعد خليل ايدرس في سياراته و فجأة طاااااااف تخبط
فيه سيارة من لاورا
خليل ابــ عصبيه: ينعن جد راسك بكككككل باهي
و فتح خليل باب السيارة و نزل و هو امعصب
.....
عند سالم
حتى هو كان ايدرس فــ سيارة و قدم علي سيارة بــ خطأ
بدون ما ايشوفها و خبطها
سالم ابــ عصبيه: هذا شن درسه هنا فــ المِكان الخطأ
و نزل سالم و هو راقيله
خليل ابــ عصبيه: أنت ما ......... و بعدين سكت
سالم ابــ عصبيه كبيرة: شن هــ تدريسه العوجه يا ......
و قعد ايبحت في خليل
خليل ابـــ صدمةة: سالم😳
سالم ابــ صدمةة: خليل😳

يتبع...
أودي الفرجاني##
أزعما خليل و سالم شن يعرفو بعضهم و هل معرفتهم
ح اتكون خير ولا شر و شن ح ايجي من ورا المعرفه هذي
هل نبيل صح ح يزوج شيماء ولالا و أرياف مسكينه شن ح ايكون
مصيرها و هل قعدتها في حوش رزان ح أتكون خير الها ولا
ح ايصيراً أحداث مش حلوه أمعاها هذا كلا ح نعرفوه فــ الحلقه الجايه

رايكن😉