مغرورتي

رواية {مــغــرورتــي}
للكاتبةة: أودي الفرجاني##

_____
رواية {مــغــرورتــي}
الحلقه الأولى...(1)
رزان ابــ حزن: تحكي جديات
سندس ابــ حزن: واللهي الله غيروه
رزان: عليك قصةة والله أنتِ من قالها لكِ
سندس: امبدري كنت نحكي مع رتاج قالتلي سمعتي
أستاذ محمد غيروه و جبولنا أستاذ ثاني و هو يالي ح ايحط
الأمتحان الجزئي
رزان: يا عليك موال القنهم سمطوها كل مره امغيرين أستاذ
سندس: اهاا امزاط بكل
رابحه اتنادي: رزان رزان
رزان: نعم يا ماما
رابحه: هيا يا بنت باتك أقريب يوصل
رزان: هيا هي سونه حبي أنا توا نبي انسكر نحكو بعدين
سندس: تمام كان فضيتي اليوم تعاليلي
رزان: لا واللهي توا طالعين للمصيف
سندس: صااح خسارة قبل نبيك اتجي تقري امعايا
رزان: خليها بكره
سندس: تمام انتلاقو
رزان: باي
سندس: باي
و سكراً هنا الأثنين
...........
عند نبيل
نبيل ابــ عصبيه: تي شيل اكويس الزح
عصام: تي باهي يا راجل
نبيل: مش عارف أمك شن تبي فيها البمبه فــ البحر
عصام يضحك: أنت عارف هلك مغلى عليهم الكركره
نبيل قعد يضحك علي جيت سالم باتهم
سالم: كملتو تركيب الدبش
نبيل: أحم اهاا كملنا خلاص مزال أشوية حاجات
سالم: هيا ركبوهن ابــ سرعه بيش انعدو قبل ما يدعك المصيف
نبيل و عصام: باهي تمام
و اقعدو ايركبو في باقي الدبش
.............
عند رزان
رابحه: رزان فيسع طلعي الدبش فم الباب بيش خوك ايحطهن فــ السيارة
رزان طالعه من الدار: تي باهي يا ماما وين عقاب بناتك كنهن ما ايساعدني
رابحه: أنظر فيش ايديراً عدي شوفيهن فــ المطبخ
رزان عدت شور المطبخ لقت خواتها ايطلعاً فــ الماعين
أقعدت اطلع امعاهن و طلعو خوتها حطو الدبش فــ السيارة و ركبو
كلهم و عدو شور المصيف
........
عند نبيل
حتى هما كملو تركيب دبشهم و ركبو في سياراتهم
و عدو شور المصيف
.........
تعالو انتعرفو ع أبطال
بطلتنا أسمها رزان م96 تقرى فــ جامعه تخصصها إدارة
عندها 3 خوات
ريهام م90 متزوجه لكن ما عندها اعيال
ريناد م94
ردينة م99
خوتها 2
أدهم م 89 متزوج وعنده أوليد
سفيان م 93
أمها رابحه
باتها خليل
__
بطلنا أسمه نبيل م90 متخرج من كلية الأقتصاد
عنده أختين و أخ واحد
سالمة م 98
عائشه م94
عصام م92
أمه مسعوده
باته سالم
.........
عند رزان
وصلو للشاليه و نزلو دبشهم
ريناد: اهاا نسمع فيك احكي
ريهام: قتلك عطيني بابا ولا سفيان عشان ايصوف الــ عيسى المصيف
ريناد: باهي خليك ع خط
و عدت ريناد شور باتها
ريناد: بابا هاك ريهام ع خط تبيك اتوصف لِــ عيسى المصيف
خليل: باهي هاتي
و خذى منها الفون و قعد ايوصفلهم فــ المصيف
ردينه: زيزو صبي ناخذو ريناد و انعدو نبرو اشويه
رزان صبت: باهي هيا
و عداً اطلعاً برا
رزان: ريناد هيا انعدو ندهورو
ريناد: اصبراً أشوية ريهام أقريب توصل تو نطلعو مع بعضنا
البنات: باهي تمام
و خشاً جوا ايوتاً فــ القهوه
........
عند نبيل
حتى هما وصلو و نزلو دبشهم و قعمزو برا استراحة الشاليه
نبيل يشرب في قهوه: عصام وين
مسعوده: خذى قهوته وطلع قال يبي ايعوم
نبيل: اهاا كذا صبيلي قهوه يا سالمه
سالم: بالك سادك من القهوه ياليد
نبيل: واللهي يا حاج أنت عارف الدخان ما عندي فيه
لكن القهوه حشيشتي
سالمه: مد الفنجان
نبيل عطى سالمه الفنجان صبتله قهوه و اقعدو ايهدرزو
..........
عند رزان
وصلت ريهام هي و راجلها و شربو قهوه و بسبوسه
و اقعدو ايهدرزو
ريهام اتوشوش: بنات البحر منضره ايسهف هيا خلينا نمشو
رزان: امبدري كنه نبو نمشو لكن قلنا خلينا نستنوك هيا صبي
ريهام: هيا
و صباً البنات
سفيان: وين ع الله
رزان بحتت فيه: مشيين نبو انتمشو
سفيان: خليكاً تو نمشو مع بعضنا عشان بالمره انديرو الخيمه ع شط
خليل: سفيان خليهن يمشاً أنتم مزلتو امطولين
سفيان بعد باته دوى هو سكت و كان راقيله بكككل
رزان بحتت فيه و اضحكت و عدت هي و البنات شور البحر
......
عند عصام
كان امقعمز ع شط و ايدخن و ايبحت فــ البنات يالي ماشيه ويالي راده
و فجأة اهلبت من قدامه بنت من جمالها نين صبى علي حيله و نزل نظراته
و قعد ايبحت فيها
عصام ابلم أعيونه فيها: تي حييييي عليا حيييييييي
البنت جت ع شط أقريب البحر و قعمزة و حولت نظراتها ولبست
طاقية السعف و اقعدت اتصور
عصام صبى ع حيلة و عدى شورها
......
عند البنات
رزان: وين ردينه أختفيت
ريهام: سبقتنا تجري ع بحر
ريناد لاوية بوزها
رزان: كنك لاويه وجك أنتِ
ريناد: ليا يومين مش حاكيه مع مؤيد حسني رآيفت عليه
رزان: كذا و نبي سكري فمك مبردك أنتِ و مؤيد
ريهام: كنكم عليش متعاركين
ريناد ابــ حزن: قالي معش تمشي للجامعه و أنا قتله لا
ريهام: وعليش ماتمشيش للجامعه
ريناد: لأن هو وقف قيده لعند السنه الجاية قالي حتى أنتِ
وقفي قيدك امعايا نين نبدى أنا
ريهام ابــ رفعة حاجب: ياعيني عليك أوامر
ريناد: أنفكر انوقف قيدي و خلاص
ريهام: هيييييييييي معقوله تبي اتوقفي قيدك عشانه
رزان: أختك مضحكة كل حاجه ايقولها الها اتقوله حاضر
ريناد تبكي: أنا مش مضحكه أنا أنحبه
رزان ابــ عصبيه: ها بدت ادير فــ الطروح حبيبتي لا حب لا جرب
كذا ونبي اسكتي مافيش حد يستحق اديري اي حاجه عشانه
ريهام: ريناد حبيبتي أقرايتك أهم حاجه و هو امعاك امعاك نين
يرضى بــ الأمر الواقع
ريناد تبكي: بس خايفه ايسيبني
رزان ابــ عصبيه: و كان سيبك يعني شنو هو أخر واحد فــ دنيا
و بعدين يالي شاري ما ايبيع ياروحي و مؤيــ .......
رزان جت تبي اتكمل كلامها علي جيت ردينه ابــ سرعه و كان
باين فيها التوتر
رزان بحتت فيها: كنك
ردينه ابــ خوف: في واحد يلحق فيا
رزان: وينه
ردينه برمت وراها و شيرت علي عصام
رزان حولت ردينه من قدامها و عدت شور عصام
رزان ابــ عصبيه: أنت هااااااي كنك مع أختي
عصام أعيونه أقلوب: نا عليا أنتِ أختها شكلها عيلة أطروف هي
رزان قدمت شوره و اضغطت علي أسنونها
رزان: لم روحك و أحكي امعايا اكويس يا محترم
عصام: غير اهدي كنك فاصله عليا
خوات رزان جاً يجاراً و اقعداً ايهداً فيها
ريهام ابــ خوف: رزان الله يسترك استرينا و فوتيه هيا
رزان: تعرف مره ثانيه اتجي شور أختي ولا اتقوللها
حتى كلمه نعرف نصرف امعاك
عصام: هو يالي ايشوف أختك يقدر ما يحكي أمعاها
رزان زادت عصبة وقدمت عليه بــ زياده علي جيت نبيل
نبيل: عصام كنك شن في
رزان: مزلت صابره عليك و مانبيش اندير شي ما يعجبك
نبيل: كنك يا آنسه شن في
رزان: أخر مره انحذرك و أنقولك أختي ما اتجي شورها
و برمت رزان و عدت هي و خواتها
نبيل: تي كنكم شن في كنها فاصله البنت
عصام يضحك: تي مطرشقه فوتها هيا تعال
و عدى نبيل و عصام شور البحر
........
عند رزان
ادهورت هي و خواتها و بعدين رداً للشاليه و بداً ايوتاً فــ الفطور
........
عند نبيل
حتى هما ردو للشاليه و افطرو و قعمزو فــ الأستراحه
نبيل: عصام
عصام ايبربش فــ الفون: نعم
نبيل: كنها البنت يالي امبدري
عصام: تي وحده امفكيه بكل
نبيل: باهي كنها
عصام: كنت امقعمز ع شط شفت وحده قعمزت قدامي
القنها طرف بككككل عجبتني صبيت شورها قعدت انابش
فيها البنت شكلها خافت وصبت تجري عدت وقعد نلحق فيها
فجأة هدت عليا البنت يالي امبدري و أقريب كلتني
نبيل: شن قالتلك
عصام: معش اتجي شور أختي و مش عارفه شنو تي
شكلها وحده متكبره و مغروره بس انقولك حاجه حتى هي القنها ناااااار
نبيل سكت و بعدها: هيا تمشي اتعوم
عصام: لالا توا قيلة ما فيش اطروف خليها ع عصر
نبيل: القنك فاضي و ربي الكعبه
و صبى نبيل خذى منشفه و مالية بديل و عدى شور البحر
.........
عند رزان
كانو امقعمزين يفطرو علي رنة فونها
ريهام: زيزو فونك ايرن
رزان: اهاا سمعته
و صبت عدت شوره لقتها سندس تتصل بيها فيديو
رزان ردت عليها و اطلعت برا الشاليه و اقعدت اتمشى
سندس: هاااااااااااااي
رزان: هايات يا اقليبي شن الجو
سندس: تمام الحمدالله أنتِ شن دايره شكلكم وصلتو للــ مصيف
رزان: اهاا وصلنا الجو فوق الخيالي
سندس ابــ حزن: يا عوينكم بعك خاطري فيه
رزان: لو تبي انجي ناخذك
سندس أعيونها أقلوب: تحكي جديات
رزان: اهاا والله عادي انجيك أنا و سفيان
سندس: خليها مره ثانيه أساساً نبي نقرى لِــ امتحان الجزئي
رزان: باهي تمام يا روحي
سندس: بيش اتصوريلي البحر باهي
رزان: حاضر من أعيوني
سندس: هيا سلام
رزان: سلام
و سكرت رزان و ابرمت لقت روحها بعييييييييده من شاليهم و قاعده
اقريب البحر
رزان: هيييييييي شن جابني هنا من كثرة ما سرحت مش عارفه كيف
جيت لعند هنا
و جت رزان تبي اترد
الشاب: السماحه هذي كلها كيف طالقينها ابروحها
رزان سمعت الكلمة جت تبي تبرم بعدها فاتت الموضوع
و كملت طريقها
الشاب: غير ابرمي علينا خلينا انشوفو وجك بس
اوي أنتِ يا سمحه بحتي فيا
رزان كانت متنرفزة بكل لكن تغاضت عن الموضوع
الشاب: عندك حق اتكبري علينا القنك طلقه ألمانيه من لاخير
رزان معش اقدرت اتحمل و برمت عليه
رزان ابــ عصبيه: ماتبيش اتلم روحك أنت ولا كيف
الشاب: غير خلي عندك استرس يا حلوه عليش الأعصاب
رزان: تبي تعدي اتخطاني ولا واللهي اتشوف حاجه عمرك ما شفتها
الشاب: كل حاجه منك سمحه
رزان: واللهي مانك راجل لو أنك راجل راه ما تلحق بنات الناس هكي
و برمت رزان تبي تمشي قدم عليها الشاب و مسكها من يدها
الشاب: سكتتلك واجد لكن اطقي في رجولتي لا
رزان بعد مسك يدها و ضغط عليها خافت لكن مابت اتبين انها خايفه
رزان ابــ خوف و عصبيه و صوت عالي: حول يدك يا حقير
الشاب: مانيش امحول شن تبي اديري وريني
رزان ابــ صوت عالي: قتلك حول يدك
الشاب جا يبي يحكي و ما يندري الا و هذك البوكس جاه علي وجه
نين طاح ع وطى
........
عند نبيل
وصل للشط و سلح ماليته و حط منشفه ع شط و جا يبي ايخش
ايعوم سمع صوت هرجه قعد ايدور نين شاف شاب ماسك بنت
مع يدها و هي اتعيط ابــ صوت عالي نبيل ما تحمل
ايشوف البنت هكي و ايسيبها و عدى شورهم ابــ سرعه
.....
الشاب طاح ع أرض و نزل فيه نبيل ضرب
رزان كانت امصبيه و اتشوف فــ يالي صاير
نبيل ابــ عصبيه: بنات الناس مش لعبه يا امسخ
و اضربه نين وجه قعد دم و صبى وسيبه و عدى شور رزان
نبيل و هو داهش: أنتِ اكويسه
و مسكها من يدها من فوق و قعد ايشوف فيها
رزان فكت يدها ابــ عصبيه: حول يدك
نبيل: آسف مش قصدي
رزان: بعدين أنت شن دخلك بيا عليش جاي ادير
في عضلات عليا
نبيل صدماته ردت فعل رزان
(مع العلم نبيل ما كان مذكر انها نفسها البنت يالي تعاركت مع عصام)
نبيل: كنت نبي انساعدك بس
رزان: محد طلب منك مساعده خلي رجولتك الروحك
نبيل استفزه كلام رزان
نبيل ابــ عصبيه: عليش الغرور و تكبر يالي عندك
أنتِ حتى شكر ما شكرتيني ع يالي درته
رزان: أساساً محد طلب منك مساعده
نبيل: علي فكره أنتِ مريضه نفسياً عدي خلي دكتور ايشوفك
رزان: ما دخلكش بيا
نبيل: خزي مغروره
و برم و سيبها
رزان ابــ صوت عالي: ما حد قالك ساعدها المغروره
أساساً هي ماتبيش مساعدت حد
نبيل ابــ صوت عالي: هذا عليش سميتك مغروره يا مغروره
و الا ما ايجي يوم و أنردها لكي
و عدى نبيل خذى منشفه و ادبشه و رد للشاليه و هو راقيله
و برضو رزان عدت ردت للشاليه و هي غمتلها من يالي صار

(يالي يسأل و ايقول رزان ليش دارت هكي رزان ابـ طبيعتها
هكي ما اتحب حد ايساعدها ولا ايديرلها اي شي هي كانت
حتى لما اطيح اتصبي روحها ابــ روحها ما كانت اتحب
حد ايساعدها يعني تقدرو اتقولو هكي شخصيتها لكن
الكل كان ايشوف فيه غرورو و تكبر)

يتبع...
أودي الفرجاني##
نستمر ولا أنوقف☺️💛