مغرورتي

كل عام و أنتم بألف خير و ينعاد عليكم بــ الصحةة
و العافيه يارب💜

الحلقه الثانية عشر...(12)
صباح يوم جديد
تحديداً الســـــــ10ـــاعــه
عند رزان و نبيل
وعى نبيل من نومه لقى رزان راقده ع كنبه في نفس
مِكانها أمس فــ ليل
نبيل ابــ صوت واطي: عليك راس أمسكر الزح
و صبى نبيل خذى منشفه و عدى خش للحمام(حشاكم) و سكر الباب
بــ القوة و من قوة الخبطه رزان ناضت مفجوعه
رزان ابــ فجعه: بسم الله شنو هذا
وبعدا سمعت صوت الميه فــ حمام(حشاكم) عرفاته نبيل
دار هكي بــ العاني عشان اتنوض لأن ما يبيش اينوضها
رزان ابــ عصبيه: خزي هــ المتخلف هذ
وصبت رزان خذت ساكوها و اقعدت اطلع منه في دبشها
و مناشفها و خذت مزيل الميك آب و قعمزة ع زيانه و اقعدت
اتحول فــ الميك آب و بعد كملت اقعدت اتفك فــ التسريحه علي طلعت نبيل
من الحمام(حشاكم)
نبيل: سقدي روحك
رزان ابــ قلبت حواجب: شن اتحق فيا اندير
نبيل: ما المفروض الحاجات هذين من أمس درتيهن
رزان: ما دخلكش
و صبت رزان خذت دبشها و عدت للحمام(حشاكم) سلحت الفيلو
و خشت دوشت و لبسة دبشها و نشفت شعرها و لبسة ويشاحها
و طلعت لقت نبيل حاط الساكوات جنب الباب و مش قاعد
رزان حطت الفيلو فــ الغلاف امتاعه و جت تبي اتلم الميك آب
لقت نبيل لامه هو و المساسك امتاعات التسريحه و حطاهن
فــ ساكو
نبيل فتح الباب و خش
نبيل: هيا كان كملتي اطلعي
رزان: من سمحلك تقرب حاجتي
نبيل بــ ستغراب: حاجت شنو
رزان: يالي كانن هنا و شيرت علي الشوفنيرة
نبيل: واللهي يا أبله وقت عليا و أنتِ اتمرخني لميتهن
و حطيتهن فــ ساكو كيف في مانع
رزان وجهت صبعها شوره: اهاا في مانع و مره ثانيه
معش تقرب حاجه اتخصني فهمت ولالا
نبيل ابــ عصبيه: الحق مش عليك الحق ع كلب يالي لملك حاجتك
و قدم نبيل علي ساكو رزان خذاه و افتحه و كبه كلا ع أرض
رزان: هيييييييييييييييي
نبيل ابــ عصبيه: ها لمي اوحدك و أساساً معش فيها مره ثانيه خلاص
كلها كم ساعه و اتكوني امطلقه و نفتك من فسختك يالي اتجيب الفقر
و برم نبيل خذى ساكوه و نزل و سيب رزان
رزان طبست اتلم فــ الدبش ابــ عصبيه و اتمتم
رزان: خزي متخلف و حق الله متخلف الله ايعين هلك علي واحد
مغولي كيفك
و لمت رزان دبشها و سكرت ساكوها و طلعت من الغرفه و سكرت
الباب نزلت تحت لقت نبيل عند الأستعلامات جابت الساكو و صبت بعيد عليه
نبيل رفع أعيونه شافها جت
نبيل ابــ صوت واطي: تعالي هنا
رزان ابــ رفعة حاجب: نعم
نبيل: تعالي هنا جنبي
رزان: ومن أنت عشان انصبي جنبك
نبيل غمض أعيونه: أستغفر الله اسمعي الكلمه و تعالي
رزان قلبت وجها و مابتش اتعدل عليه
نبيل قدم شورها و مسكها من يدها من فوق و قربها شوره
نبيل و هو راقيله بكككككككل: شكلك ما تفهميش الا هكي
رزان: حول يدك و بعدين مش بــ الغصب مانبيش نقعد جنبك
نبيل: علي أساس غلا في وجك نبيك جنبي لكن يا أستاذه
ما تنسيش أنتِ توا مسميه مراتي يعني عرضي و شرفي
بعد انطلق طيري يقعد كلب(حشاكم) يالي ايدورك
و كرها نبيل و جبها جنبه عند الأستعلمات و بعد اشوية
سلمو مفتاح الغرفه و خذو بِطاقاتهم و حاجتهم و طلعو حطو الساكوات
فــ السيارة و ركبت رزان و ركب نبيل و علقو شور أهل نبيل
.............
عند أهل نبيل
طبعاً بعد ترويحتهم أمس لا مسعوده ولا بناتها حكاً حاجه من يالي
صار لعند ثاني يوم الصبح كلمت مسعوده عمها يالي هو جد نبيل
و سالم و قعمزو فــ المربوعه
سالم: كنك يا مسعوده شن في
فتح الله: كنك وجك ما ايدل علي خير أحكي
مسعوده: نبي انقوللكم حاجه صارت أمس بس موضوع كبير
سالم و فتح الله ابــ خوف: أحكي شن في خوفتينا
مسعوده: أمس لما خش نبيل للقاعه عشان ياخذ العروس .......
و بدت مسعوده تحكيلهم شن صار ليلة أمس بــ تفاصيل
سالم في حالة صدمةة و فتح الله نار و شاطت فيه
سالم مزال مصدوم: باهي ما عرفتي كنهم
مسعوده: لا والله
فتح الله كان راقيله بكككككل: كذا رني عليه و قوليله
ايجيني توا ولا اقولك مد الخارب كذا
سالم خذى الفون و مده الــ فتح الله
فتح الله حط علي رقم نبيل و رن
...
عند نبيل
كان ايسوق و الهدوء عام المكان لعند رن فونه بحت لقاه جده
نبيل رد: ايوا
فتح الله و هو غمتله: تعالي توا توا توا
نبيل: أساساً جايك أنا
فتح الله: عندك عشر دقايق لو ما اتكون هنا خلال عشر دقايق
نعرف كيف نصرف امعاك
و سكر في وجه طبعاً نبيل ما استغرب لأن كان عارف
أن جده ح ايدير هكي بعد يسمع بــ يالي صار و علق ابــ سرعه
شور حوشهم أما رزان كانت سانده راسه ع شباك و ساكته
.........
عند أهل نبيل
مرت قرابت النص ساعه و نبيل مزال ما جا
فتح الله ابــ عصبيه: هذا كنه طول
سالم: بالك زحمه
فتح الله خذى الفون و رد رن عليه
.....
عند نبيل
كان حاصل فــ الزحمه علي رنة فونه
نبيل كانت غمتله: ايوا يا جدي نعم
فتح الله ايهزب ابــ صوت عالي: وينك كنك طولت مش قتلك
عندك عشر دقايق و اتجيني
نبيل: واللهي حاصل فــ الزحمه يا جدي مش مني السيارات فوق بعضهن
فتح الله: سقدلي روحك و تعالي فيسع
نبيل سكر و كانت رقيتله للـ ألف و قعد ايخبط ع دومان و ينفخ
رزان كانت ساكته و اتبحت من الشباك شافت أعيال أصغار
امصبيين ع طريق و ايبيعو فــ بكوات مناديل
رزان جت عينها في عين اوليد أصغير ماسك باكو مناديل
رزان ابــتسمة و شيرتله يعني تعال
الوليد ابــتسملها و جا شورها
طبعاً نبيل كان مش فاطن الــ رزان
رزان جت تبي تفتح الشباك لقاته امسكر من عند نبيل
رزان بحتت في نبيل: افتحلي الشباك
نبيل بحت فيها: شنووو
رزان: قتلك افتحلي الشبااااك
نبيل برم وجه و فتحلها الشباك و قعد عنده فضول
يعرف شن تبي ادير فــ أقعداً أعيونه أمعاها
رزان: تعال كنك خايف تعال
الوليد جا شورها و صبى عند الشباك
رزان مبتسمه: شن أسمك يا قلبي
الوليد: عبدالرحمن
رزان: أسمك أيجنن
عبدالرحمن: شكراً
رزان: العفو هذومه خوتك يالي ايبيعو غادي
عبدالرحمن: اهاا انبيعو فــ مناديل
رزان: وين حوشكم أنت
عبدالرحمن: هنا بعيد
رزان: اهاا باهي ابــ كم باكو المانديل
عبدالرحمن: ابــ 4 أجنية
رزان: كم عندك باكو أنت
عبدالرحمن: 5
رزان: تمام حطيهن ليا كلهن
و خذت رزان شنطتها وطلعت منها 50 أجنيه ورقة وحده
و خذت من عبدالرحمن المناديل و عطاته الفلوس
عبدالرحمن: أشوية انكلم خويا عشان ياخذ حقنا و يعطيك الباقي
رزان: لالا خلاص خليهن امعاك
عبدالرحمن: بس واجد هذا
رزان: لالا مش واجد يا قلبي خلاص خليهن عندك
و أشري بيهن يالي أنت خاطرك فيه تمام
عبدالرحمن ابتسم: تمام
رزان مسكاته من خده و حباته: هيا باي
عبدالرحمن وخر: باي
رزان وخرت و ردت كيف ما كانت و نبيل
يالي كان امركز علي الحديث يالي دار بين رزان و عبدالرحمن
علق و عدى شور حوشهم وبعد ربع ساعه تقريباً وصلو
نبيل: هيا انزلي
رزان: وين جايبني أنت أنا نبي حوش هلي
نبيل مابش ايناقشها و فتح الباب و نزل و رزان رقالها و فتحت الباب
و نزلت ورا نبيل و خشو للحوش
.........
عند أهل رزان
ناضو افطرو و اقعدو ايحولو فــ الفرش عشان يبو يغسلوه
ريهام: بنات ماما كنها من الصبح مش عاجبتني
ريناد: أكيده اتفكر في رزان و شن صار امعاها
ردينه: بس واللهي حرآم علينا مفروض نمشو انقولولها سبب يالي صار
ريهام: هيييييييي لالا فكينا منها أكيده ح تمسح ابــ رزان الأرض ع يالي دراته
ريناد: ريهام كلام ردينه صااح حرآم تقعد اتفكر وهي مش عارفه السبب
ردينه: خلينا انقولولها
ريهام: بس ...
ريناد: ما فيهاش من بس هيا تعالاً
و عداً البنات شور أمهن و قعمزاً حكنلها يالي صار
رابحه ابــ عصبيه: نعممممممم
ريهام ابــ خوف: هذا هو السبب
رابحه ابــ عصبيه: و قسماً بالله بنت متخلفه و مطيورة
و عقلها مش في راسها تي معقوله عشان يالي صار هذا ادير هذا كلا
ردينه: أنتِ حكيتي الــ بابا يالي صار
رابحه: لا محكيتلا تبي الضغط يرقى عليه أنتِ ولا كيف
ريناد: باهي ازعما شن ايصير توا
رابحه: ما فيها ما يبي ايصير اتقعمز هي و ساكته عند راجلها
و اتفكني من النوطره
ريهام: بس حتى نبيل ما يبيها
رابحه: يرضى غصباً عنه شنو بنتنا لعبة يا خذها وبعدين
ايرد يعزقها علينا و هي اتقعمز و تسكت و اتحمل بلاش حركات
أعويله صغار
و صبت رابحه و هي راقيلها بكل خشت للدار و سكرت الباب
.........
عند أهل نبيل
كانو امقعمزين و يرجو فــ نبيل علي خشته عليهم
مسعوده شافتهم صبت تجري
مسعوده ابــ توتر: اهلاً اهلاً نورتو خشو تفضلو
فتح الله ابــ صوت عالي: نبيييييييييييل
مسعوده اقعدت ترعش: انبوله يمي خش أنت عند جدك
و أنتِ يالي رزان تعالي انشيلك فوق اتشوفي شقتك
رزان جت تبي تحكي مسعوده حكرتها و ركبتها فوق حطتها
فــ الشقه و هي ردت انزلت طولة ابــ سرعه
أما نبيل سلح كاويشه وخش قعمز امقابل باته و جده
فتح الله: تفضل احكي تقريباً أنت عارف نحن شن نبو نسمعو
نبيل: من النهاية وبلاش كثرة كلام و لف و دوران نبي انطلق
و البنت معش نبيها
فتح الله: تي شن اطلق امتى حلك ازوجة عشان اطلق أنت
نبيل ابــ صوت عالي: القنك يا جدي فوت الموضوع أنا و البنت
مش البعضنا و القنه لا هي تبيني ولا أنا نبيها
فتح الله: وليش ما قلت الكلام هذا قبل ما نطلبوها
نبيل: ما كنتش نعرفها
سالم: ما قنالك نحن دير مقابله شرعيه و خش شوفها يوم
الفاتحه لكن أنت سكرت راسك
نبيل: علي أساس كانت شفتها يوم الفاتحه و عرفتها كنتو
خليتوني انسيبها ما هي هي كانت مراتي فــ هذك اللحظه
فتح الله: نبيل خليني ماسك أعصابي و ما اتخليني انفش غلي فيك
احكي عليش ما تبوش بعضكم شن في بيناتكم
نبيل: يا جدي الموضوع بدى يوم ......
و حكاله القصةة كلها
نبيل: و هذا كل الموضوع و القنه يا جدي بنت كيف هذي
ما نقدرش انعيش امعاها قليلة آدب و شايفه روحها و اللسانها طويل
فتح الله ابــ عصبيه: احترم نفسك و لم روحك يا فرخ شن حركات المعيلة
يالي ادير فيهن هذين
نبيل جا يبي يحكي باته قاطعه
سالم ابــ عصبيه: أنت تبي اتحشمنا مع العرب تي كنك أنت هبل ولا كيف
نبيل: يا جدي
فتح الله فاصل بككككل: لا جدك لا نو أسمعني هي كلمه وحده توا هذ
اتعدي تاخذ البنت و تمشو شور المطار جحزتلكم فــ سفرة الــ تركيا
اتعدو شهر عسل و تستسمح من البنت و أتغيرلها جوها مانبيش
باتها و جدها يعلمو بــ القصةة و موضوع الطلاق هذا طلعه من راسك
نبيل: تي أنت فيش تحكي شن أنسفرها و نستسمح منها تي تحلم حلم
كان أعتذرتلها علي حاجه أنا مش غلطان فيها
فتح الله صبى علي حيله و ابــ علو صوته
فتح الله: و قسماً بــ ذات الله و جلالت الخالق لو ما درت يالي
قتلك عليه أنِ اتبرى منك و ناخذ منك أسم العيلة و لا أنت ولدنا
ولا نحن نعرفوك و عدي دور من ايلمك بعدها
مسعوده كانت امصبيه هي و البنات جنب الباب و يسمعاً
و لما فتح الله حكى الكلام هذا اشهقت و حطت يدها علي فمها
سالم ابــ صدمه: باتي تحكي من جدك
فتح الله: كلمة وحده قلتها ومش ح انرد انعاودها ولا أنقول غيرها
نبيل صبى و طلع برا الجنان و قعد يبرم و عرم أفكار في راسه
فكره اتقوله فكك منها و طلقها و خليهم ايتبرو منك فــ لاخير هذوم هلك
و مش ح ايتخلو عليك و بعد فترة ح يرضو و أترد كل حاجه كيف ما كانت
و فكره ثانيه أتقوله أن جدك كلمته وحده و عمره ما كسرها اي حد
و كان طلقتها تو ايتبرى منك خليها علي ذمتك و تحملها و خلاص
خير ما تخسر هلك عشان خاطر ولية
و قعد نبيل يبرم فــ الجنان و حاير شن ح ايدير
.........
عند رزان
كانت فوق فـ الشقه و امقعمزة ع كرسي يالي جنب الباب
و طبعاً ما جاها فضول أبداً أنها أتشوف الشقةة أو اتفرج حتى علي دار النوم
رزان: اوووووووو تي شن يالي قاعد ايصير هذا وينه كنه معش ركب
أنا خلاااااااص مش قادره أنتحمل نبي انروح الهلي مليت من يالي قاعد ايصير
و اقعدت رزان امقعمزة و ترجى
.........
عند نبيل
كان مزال فــ الجنان طلعتله أمه
مسعوده: الله ايربحك يا اوليدي أسمع كلام جدك و دير يالي
قالك عليه أقل حاجه عشان خاطر عشان خاطر أمك أنا مانبيش
نخسرك يا عمري
نبيل ابــ صوت عالي بكككككل: أنا طول عمري ماشي علي راياتكم
و طول عمري أندير فــ يالي تبوه أنتم و كل حاجه أندير فيها عشان
خاطركم و عشان محد فيكم يزعل لكن عشان مره وحده جيت نبي
ناخذ قرار ابــ روحي قعدتو تبو اتبرو مني ماشي ماشي
مسعوده جت تبي تحكي نبيل خش جوا و سيبها و ركب الشقته
........
عند رزان
كانت امقعمزة و قالقه علي فتحت باب الشقه صبت لقاته نبيل
نبيل ابــ صوت مخنوق: خشي جيبي ادبشك و اطلعي
رزان: تي وين نطلع حكيت الهلك و قتلهم أن نحن نبو انطلقو
نبيل: خشي جيبي ادبشك و اطلعي قدامي
رزان دفاته من كتفه: أنا نحكي امعاك رد عليا حكيت الهلك علي ...
و قبل ما اتكمل دوتها نبيل سيبها و عدى شور الدار فتح الدولاب لقى فيهن
شنطنه كبيرة خذاها و طلع
رزان: تي هاااااااااااي هذي شنطتي وين ماشي بيها
نبيل بدون ولا كلمه مسك رزان من يدها من فوق و كرها برا الشقه
و سكر الباب و نزل و هو ماسك الشنطه ابــ يده اليمين و رزان ابــ يده اليسار
أهل نبيل أمه و خواته و باته و جده كانواْ امصبيين فــ سقيفه(الصاله البرانيه)
نزل نبيل و طلع للسيارة فتح الباب و دف رزان جوا السيارة و هي اتهزب
و اتعيط كيف العاده لكن نبيل ما حكى ولا كلمه عزق الشطنه فــ السيارة
و سكر السيارة بــ المفتاح عشان رزان ما تنزل و رد نبيل للحوش
نبيل: التذاكر وين
فتح الله: تعال
و طلع هو و نبيل شور سيارته فتحها وطلع منها تذكرتين
و عطاهن الــ نبيل
فتح الله: و هذين الجوازات و هذين الفلوس
نبيل خذى الجوازات و برم: عندي افلوس ما نبيش
فتح الله: اعتبرهن هدية من جدك
نبيل: لالا عندي بــ زياده ما عندي ما نبي فيهن هذين
و عدى نبيل و سيب جده و ركب السيارته و علق شور المطار
و طول الطريق رزان تحكي امعاه و تسأل فيه لكن هو ما حكى ولا كلمه
بعد مرور نص ساعه رزان اسكتت و فكرت أن هو خذى شنطتها
و شكله متعارك مع هله فــ أكيده حكالهم علي طلاقهم و توا ح ايشيلها
الحوش هلها فــ تريحت و اسكتت
..........
عند أهل رزان
كانن البنات يغسلاً فــ الفرش برا الجنان علي طلعت
ردينه تجري
سندس: بسم الله كنك تجري هكي
ردينه و هي داهشه: أمـ .. أمـ .. امـ ..
ريهام: تي أم من
ردينه: أم نبيل توا كلمة ماما
البنات قدماً شورها ابــ سرعه: باهي
ردينه: و قالتلها أنهم حلو الموضوع بين نبيل و رزان
و توا خذو حاجتهم و سافرو شهر العسل الــ تركيا
ريهام: هووووف باهي الحمدالله واللهي قبل كنت خايفه
أرياف: حتى أنا كنت خايفه أنهم يطلقو بس تعرفاً حاجه
البنات: شنووو
أرياف: الموضوع فيه أن
ريناد: ليش
أرياف: لأن رزان أنتاً عرفاتها في المواقف يالي زي هذين
مستحيل اتنازل ولا ترضى و بعدين معقوله ايسافرو هكي
من ثاني يوم و هما حتى مازالو ما تأقلمو ع جو مع بعضهم
و خصوصاً أنهم شبه كانواْ أعداء
سندس: علي فكره كلام أرياف منطقي ميه فــ الميه
ريناد: اهاا صح والله كلامك منطقي فعلاً رزان مستحيل
اتوافق اتسافر بــ السرعه هذي و مع من مع نبيل
ريهام: لالا فعلاً الموضوع فيه أن
ردينه: توا أهم حاجه أنهم مش ح يطلقو و أنهم سافرو
بالك ربي يهديهم و ينسجمو مع بعضهم
البنات: أنشالله ياربي
و رداً البنات يغسلاً فــ الفرش
...........
عند نبيل
وعى من نومه علي حس هرجة البنات برا الجنان
لأن شباك المربوعه كان ايطل ع الجنان
صبى سفيان و حس أن جسمه امكسر من ع نومه ع الكنبه
سفيان: آآآآآآآآآه ياربي تؤ تؤ تؤ جسمي متكسر الزح
صبى سفيان و فتح الباب طاحت جاكته يالي كانت امعلقه ع يد
المانيلا سفيان طبس و رفعها و طول أذكر شن صار أمس
رد خش للمربوعه و عزق الجاكه ع كنبه و طلع عدى خش الداره
لقى أمه اتضم فيها صبح عليها و خذى منشفه و عدى للحمام(حشاكم)
غسل وجه و طلع للمطبخ لقى الدنيا حايسه
سفيان: تؤ تؤ تؤ تي شنو هذا كلا الواحد كيف يبي يفطر
علي خشت أرياف و بعد حقت سفيان قلبها رعش
سفيان ابتسم: صباح الخير
أرياف ابــ توتر: صباح النور
سفيان: كنها الدنيا شايله هكي
أرياف: الله غالب حوسة الفرح اهو قاعدين انضمو
سفيان: باهي ربي يعطيكاً الصحةة
أرياف: سلمك
سفيان جا يبي يطلع
أرياف: كنك أنت تبي حاجه
سفيان رد برم: قبل نبي قهوه لكن بعد القيت الدنيا حايسه فتتها
أرياف: عادي لو تبي انديرلك
سفيان: لالا ما نبيش انتعبك
أرياف: لا واللهي ما فيها من تعب عادي
سفيان: باهي بس ياريت ساده
أرياف: تمام
سفيان جا يبي ايقعمز لكن ما لقى وين ايقعمز جا شور الفريز
و ركب قعمز و طلع فونه و قعد ايبربش فيه
أرياف بعد سفيان قعمز امعاها فــ المطبخ توترة و أقعدت كل
كا تمسك حاجه اطيح منها و ترعش بككككل و مش قادره
حتى اتنفس لكن سفيان ما كان أمركز امعاه كانن أعيونه ع فونه
..........
عند البنات برا
الباب ايدق
سندس: بنات الباب ايدق
ردنيه ابــ صوت عالي: هيا هي
و عدت شور الباب تجري
ردينه: من
أمل: افتحي
ردينه ابــ صوت عالي: بنات عيت عمي جو
و افتحت الباب لقتهن بنات عمها و مرات عمها
سلمو علي بعضهم و استقبلوهم جوا الحوش
خديجه اتوشوش لِــ ريهام
خديجه: سفيان قاعد
ريهام: اهاا قاعد عدي الحقي عليه قبل لا يطلع
خديجه: وين قاعد باهي
ريهام: يا في داره يا فــ المطبخ يفطر بس أظن أن فــ المطبخ
لأن داره قاعده فيها ماما اتضم
خشو كلهم جوا و استقبلتهم رابحه و سلمت عليهم
و قعمزو كلهم فــ المربوعه و خديجه اقعدت اشوية
و بعدها صبت بدون ما حد يفطن و عدت الــ دار سفيان
لكن ما لقت فيها حد فــ عرفت ان قاعد فــ المطبخ و عدت
شور المطبخ
........
عند أرياف
كملت دورت القهوه و ايديها ما بطلوش رعيش
صبت القهوه و جت شور سفيان
أرياف: تفضل
سفيان رفع أعيونه فيها: شكراً
و ابتسملها
طبعاً سفيان كان امقعمز ع الفريز يعني اطول من أرياف
و أرياف تحته بــ زبط
أرياف أول ما سفيان ابتسم جتها رعشه غريبه لأنها
كانت أقريبه منه و بسمته كانت أقرب الها و في لحظه
بدون أحساس سيبت فنجان القهوه من يدها و ايطيح
و ينكب كلا علي يد سفيان و كرعيه
سفيان غمض أعيونه و سكر أسنونه: آآآآآآآآه
أرياف ابــ خوف: آسفه آسفه واللهي آسفه
و عدت تجري جابت المنشف و اقعدت تمسحله
فــ القهوه من علي كرعيه و بعدين امسكت يده و اقعدت
تمسح فيها لاه و سفيان امغمض أعيونه و ساكت
أرياف تمسح علي يده و أتهف و في نفس اللحظه أتخش
عليهم خديجه للمطبخ و جت عينها علي أرياف و سفيان
خديجه😟
.........
عند نبيل و رزان
كل الطريق الأثنين كانواْ ساكتين و رزان كانت تحساب
نبيل شايلها الحوشهم وقعدو علي نفس الحالة نين وصلو للمطار
نبيل درس السيارة: هيا انزلي
رزان: وين ننزل أنت وين جايبني مش قتلك شيلني الهلي
نبيل: أستغفر الله أنا قتلك أنزلي
رزان ابــ صوت عالي: تي وين ننزل وين جا يبني أنت
نبيل بحت فيها: للمطار
رزان أقعدا أتبحت فيه
نبيل: نبو أنسافرو شهر عسل التركيا
رزان افتحت أعيونها عشرة عشرة: نعمممممممم😳
نبيل: ..........

يتبع....
أودي الفرجاني##