مغرورتي

الحلقه الرابعه عشر...(14)
بعد مرور أسبوع
روحو نبيل و رزان من السفر و طبعاً طول
الفترة يالي افتت ما حكو مع بعضهم بكل
رزان عدت عند هلها و حصلت هزيبة سمحه من أمها
أولاً لأن ما رنت عليهم و هي في تركيا و سبب كان لأنها
كانت متعاركه مع نبيل فـ مابت اتقوله عطيني انكلم هلي
و هزبتها ع يالي صار فــ يوم الفرح و قالتلها أنها ما تحلم
أنها تطلق من نبيل و أنها لو حكت الباتها ح تغضب عليها طول العمر
رزان لما أمها قالتلها هكي ما قدرت تحكي الباتها ولا حاجه و سكتت
.........
يوم الأربعاء
تحديداً عند رزان
كانت دوبها واعيه من نومها و أول ماوعت حست
روحها تعبانه و أجنابها يوجعاً فيها و صداع
رزان ابــ وجع: آآآآه ياربي كني أنا اليوم
وصبت رزان بــ شوية و جت ع شوفنيرة و اقعدت ادور
فــ المساكه
رزان: خرفي من أول ما أزوجة هــ الراجل و مساسيكي ريحات
و أقعدت تضحك
وبعد أشوية ما لقت مساكتها فتحت باب الدار وطلعت علي
طلعت نبيل من المربوعه تقابلو مع بعضهم
طبعاً رزان كانت لابسة توته ورديه أمخططه بــ الأبيض و شعرها
كان كيف الحرير و لونه كيف شعاع الشمس مطلوق و كشكش أشوية
و أعيونها الزرقة و وجها يالي ايجنن من دون ميك آب
رزان مابتش تحكي مع نبيل بكل و عدت شور الحمام(حشاكم)
و كانت حاطه يدها علي جنبها
نبيل كان ايبحت في رزان من تحت الــ تحت نين خشت و سكرت الباب
قعمز نبيل فــ صاله و ولع الــ Tv  و قعد ايتفرج أشوية وطلعت رزان
و خشت شور المطبخ اقعدت ادور نين لقت عصير صبت طاسه
و قعمزت ع كرسي يالي ع بار و اقعدت تشرب فــ العصير
و ساكته نبيل كان ايتفرج ع الــ Tv  لكن أعيونه كانن عند رزان
و ستغرب أنها ساكته و هاديه و حس أن فيها حاجه لكن مابش يسألها
بعد اشوية صبى نبيل دار قهوه فطر و بدل ادبشه علي رنة فونه
لقاه صاحبه ماهر و قاله أن قاعد يرجى فيه تحت خذى نبيل فونه
و مفاتيحه و نزل تحت
......
نبيل نزل تحت لقى صاحبه ماهر جنب الباب
ماهر: اوووووو عريسنا
نبيل: لك وحشه يا غالي
ماهر: و أنت أكثر تعال تعال قولي شن جو السفره
نبيل ايحك في راسه
ماهر: اهاا تمام فهمت دبينك حكيت راسك معناها في موضوع
نبيل: بــ الضبط
ماهر: باهي احكيلي شن صار
نبيل: تعال خش
وخش نبيل هو و ماهر لِــ مربوعة هله و قعمزو يحكو
و حكاله نبيل شن يالي صار أمعاه من الأول
ماهر: حي علي أمه حي قصدك هي نفس البنت
نبيل: هي نفسها حصلت فيها يا راجل حصلت فيها حصله سوده
ماهر: باهي باتك و جدك شن صار فيهم
نبيل: شن صار يعني كل ما واحد فيهم ايشوف فسختي
ايذكرني لو طلقتها شن يبي ايصير فيا واللهي مرات الفرخه
اديرلي في حركات نين اترقيلي فــ ضغط انقول القني
خليني انطلقها ويالي ايصير ايصير
ماهر: بس انقولك حاجه البنت بنت أصل حاول تكسبها
نبيل: بنت أصل هه و انحاول نكسبها تي قيسك هبل أنت
واللهي نكرها كره العمى جالطه و مغروره واللسانها اطول من جثتها
ماهر: صدقني يا راجل البنت بنت أصل
نبيل: تي كيف عرفتها بنت أصل و أنت أساساً حتى الشوف مانك شايفها
ماهر: سؤال
نبيل: اسأل
ماهر: دبينك كيف ما قلت أن حتى هي تكرهك و أنتم الأثنين
ما اتقابلو بكل هي ليش اقعدت امعاك و ما اصرت ع طلاق
ولا مشت رفعة قضية و علي قولتك أن باتها و خوتها
ما عندهم علم بــ يالي صار
نبيل أستغرب السؤال و قعد ايفكر فيه
ماهر: ها جاوبني باهي من امتى معش حكت علي موضوع الطلاق
نبيل: بعد تعاركت أنا وياها و قتلها أن جدي و باتي ح ايتبرو مني
و أن علي خاطر أمي يالي فرحانه بيا و خواتي يالي ما عندهن غيري
لأن عصام مزال اصغير و طايش مش امتاع مسؤوليه
ماهر: باهي ما فكرت هي ليش بعد الدوه هذي معش حكت ع طلاق
نبيل سكت
ماهر: لأنها بنت أصل و خافت تخسر هلك من وراها هي
تخسر أمك و خواتك يالي ما عندهن غيرك علي قولتك الها
و تخسر العيشه بين هلك يعني هي كان في مقدورها تمشي
الهلها و تحكيلهم كل حاجه و صدقني ح ترفع عليك قضية الطلاق
و تطلق غصباً عنك و اتقول ما دخلنيش بيه يطربق هو وهله
نبيل ساكت و يسمع
ماهر: حاول تكسبها في صفك حتى لو اللسانها طويل
مش مشكله تحملها و عاملها اكويس لأن واللهي لو ح تقعدو
كارهين بعضكم هكي مش ح يصير منكم و حاتكم ح اتكون كلها مشاكل
نبيل سكت و قعد ايفكر في كلام ماهر
.........
عند رزان
بعد كملت فطور أخطراً عليها سندس و أرياف
لأنها من الفرح معش شافتهن بكل ولا حكت امعاهن مسكت فونها
و رنة علي سندس
رزان أعيونها أقلوب: نوسه غلاتي
سندس: زيزو رآيفتلك يا شفشه
رزان: و أنا أكثر حبي كيف حالك وكيف حال رفوفه
سندس: تمام الحمدالله و أرياف اكويسه اتسلم عليك واااااااااجد
رزان: سلمك و ايسلمها
سندس: زيزو صوتك فيه حاجه أنتِ مريضه
رزان: تعبانه أشوية من نوضتي و حاسه روحي متكسره
سندس: غير بالك من حوسة الفرح ريحي روحك بس
رزان: اهاا ممكن
سندس: امتى تبي اتردي للجامعه
رزان: خلاص الأسبوع الجاي بإذن الله
سندس: شن يبي ايصبرنا للأسبوع الجاي
رزان: باهي تعالاً كسداً عندي فــ الحوش
سندس: لالا بتي عيب مزلتي عروس
رزان: هه عروس فرقت عروستي تعالاً تعالاً
سندس: اهاا صاح شن صار فيك بعد خطرها ريناد
قالتلي مش ح تطلقو صاح
رزان: للأسف اهاا
سندس: عليش
رزان: موضوع طويل تبيله قعميزه
سندس: باهي امتى انجوك
رزان: اممممم تعالاً بكره
سندس: باهي خليني انكلم أرياف و انقولها الها
و بكره بابا تو اجيبنا بعد العصر
رزان: خلاص تمام نرجى فيكاً
سندس: تمام باي
رزان: باي
سكرت رزان من سندس و صبت ردت للدار
خشت للفراش و تغطت و رقدت
.......
عند نبيل
هدرز هو و ماهر أشوية وبعدين صبو طلعو للكفي
.......
عند أهل نبيل
كانت عندهم خالتهم جاية من برا بنغازي
تحديداً عند البنات فــ دار
سالمه: خزي يا بارده وعدتينا أنك تحضري فرح نبيل
لكن ما جيتو
أسيل: واللهي شن نبي أندير أنتِ عارفه الظروف
و حتى سيارة ما عندنا سيارة الله غالب ربي قدر أن
أنجوكم بعد فرح نبيل
عائشه: يلا مش مشكله أهم حاجه جيتو
أسيل: نجك ليا واللهي رآيفتلكاً
عائشه و سالمه: و نحن أكثر
أسيل: باهي قوللي شن جو مرات نبيل
عائشه: أتهبللللل عسل بكل
أسيل: اهاا شكلها عسوله من الصور يالي دزيتهن ليا
سالمه: عارفه ع واقع أحلى و أجمل وااااااجد من الصور
أسيل: شوقتني أنشوها
عائشه: هي أكيده وعت توا أشوية تو نركبولها
سالمه: بس تعرفي حاجه صح نحن فرحانين بــ رزان لأنها مرات
نبيل لكن فرحتنا ما كملت
أسيل: عليش انشالله خير
عائشه: رزان و نبيل ما ايحبو بعضهم
سالمه: اتصدقي أنها طلبت منه الطلاق يوم الفرح فــ القاعه
أسيل في حالة صدمه: تي فيش تحكاً أنتاً
سالمه: واللهي كيف ما نحكيلك
أسيل: باهي فهمني شن في ولا شن السبب
عائشه: يا حنه يالي قاله نبيل أن هو و رزان .........
و حكتلها القصةة كلها
أسيل: يا نعليا عليك كارثه باهي توا شن الوضع
سالمه: لالا الحمدالله نبيل ما يبي ايطلقها
أسيل: باهي بالك مع الأيام ايحبو بعضهم
عائشه: تي شن ايحبو بعضهم أنقولك ما ايطيقو بعضهم بكل
أسيل: باهي ما حاولتو اتقربوهم من بعضهم
سالمه و عائشه بــ ستغراب: كيف يعني
أسيل: كيف كيف يعني قصدي أنتاً ولا خالتي ليش ما اتحاولو
اديرو حاجات اتقربهم من بعضهم
سالمه: كيف شنو يعني
أسيل اقعدت ساكته أشوية وبعدها
أسيل: عندي فكره هذي ح اتخليهم ايتقربو من بعضهم
عائشه: باهي شنو أحكي
أسيل: بس خالتي لازم اتساعدنا
سالمه: باهي احكي شنو
أسيل: أسمعني أكويس .......
و حكتلهن شن ح ايديراً و بعدها طلعاً حكاً الــ مسعوده
و هي وافقت اتساعدهن و برضو خالتهن شجعتهن
عشان اينفذاً الخطه و ايخلاً رزان و نبيل ايقربو من بعضهم
.........
عند رزان
وعت حست روحها أحسن صبت تبي اتبدل دبشها
علي دقت باب الشقه صبت فتحت لقتهن البنات
رزان مع ابــتسامه: اهلاً
البنات: اهلين
عائشه: انشالله ما انكونو زعجناك بس
رزان: لالا أساساً من امبدري واعيه خشاً تفضلاً
خشاً البنات جوا و قعمزاً فــ صاله
سالمه: هذي أسيل بنت خالتي يسكنو برا بنغازي هذا كيف جونا
رزان: اهاا مرحبتين بيك
أسيل: سلمك حبيبتي ابــصراحه أنتِ ع واقع أجمل
ابــ 100 مرة من الصور
رزان تحشمت: ميرسي حبيبتي هذا من ذوقك
أسيل: واللهي نحكي جديات أتهبلي والله
رزان أخدودها انحمرو: ميرسي يا قلبي
سالمه: نبيل طلع
رزان: اها من امبدري شن تشرباً
عائشه: لالا ما اتعبي روحك نحن جيات انهدرزو امعاك اشوية
رزان: آسفه عشان شفتني بــ توته لكن اليوم حسيت روحي تاعبه
أشوية ما جتني نيه انغير أدبشي
سالمه: لالا عادي أسيل من أهل البيت
و اقعداً البنات ايهدرزاً و انجسماً فــ الهدرزة مع بعضهن
علي دقت باب الشقه
جت رزان تبي اتصبي
سالمه: لا واللهي اتقعمزي تو نفتح أنا
رزان ردت قعمزت
و عدت سالمه فتحت الباب لقتها أمها و خالتها
خشاً سلماً علي رزان و قعمزاً
خالة نبيل: لا قوة إلا بالله علي كنتك يا مسعوده ماشالله عليها
رزان: ميرسي خالتي هذا من ذوقك
مسعوده: أكيده حتى هي كنتي عاد
رزان اقعدت تضحك
أسيل غمزت الــ مسعوده
مسعوده: بعد خطرها يا رزان
رزان: نعم
مسعوده: بكره جيين هلي ديرين لمه عشان ايشوفوك
و ايتعرفو عليك قلت انقولك بيش اتوتي روحك
رزان: باهي تمام حاضر
خالة نبيل: كنها حنتك طارت فيسع
رزان: لأني حنيت حنه بسطه منحبهش أصلاً
مسعوده: لا اليوم دزيتلها علي حنايه اتجي اتحنيها عاد بكره
يباً ايشوفنها خواتي و صبايا خوتي
رزان ابــ صدمه: كيف
مسعوده: وتي روحك بعد المغرب اتجيك الحنايه اتحنيك
رزان: بس يا عمتي أنا ما أنحبها
مسعوده: عادي يا بتي تحمليها حتى ساعتين عشان العرب
ايحقوها بكره
و طول غيرت مسعوده الموضوع عشان رزان ما اتناقشها
طبعاً رزان تعقدت لأنها حطتها فــ الأمر الواقع وهي أساساً
ما أتحب الحنه
و اقعدو ايكملو في باقي هدريزهم
..........
مشى الوقت
تحديداً الساعه 8 الليل
كانت رزان امقعمزة فــ المربوعه و متقعده لأن البنات
فرشنلها فــ المربوعه عشان اتحني أشوية و جتها الحنايه
حنتها إديها و كرعيها و لفتها الها و روحت الحنايا
سالمه اتغطي في رزان: خلاص ارقدي اشويه بيش تصبغ
رزان: كيف انتاً تباً تنزلاً
سالمه: اهاا راجل خالتي يبي ايجي هو اعيال خالتي
نبو انحطو العشاء و كان بعد العشاء فضينا تو انجوك
رزان: باهي تمام
سالمه: ما تبي حاجه
رزان: لالا شكراً
و عداً البنات نزلاً و اقعدت رزان ابــ روحها
رزان: اوووووووووو عليك يوم هو مش عارف من قاللهم
حنوني بس أنا ما انحبها بكل و من الصبح حاسه روحي مريضه
مش وقتها بكل الحنه ولا ما حنني إلا علي افراش المتخلف هذا
بعد أشوية رزان حست روحها زادت اتعبت و بنطها ليه قوية
و أجنباها يوجعاً فيها و راسها صداع
..........
عند نبيل
اتفق هو و الشباب انهم يسهرو مع بعضهم
و قاللهم أن ايروح للحوش ايبدل ادبشه و ايجيهم
روح نبيل للحوش خش لقاهم كلهم امقعمزين فــ صاله
سلم عليهم و حمد الــ خالته ع سلامة و عدى ركب فوق
نبيل فتح باب الحوش و خش شم بنتة الحنه
نبيل بــ ستغراب: امنين جاية بنت الحنه
عدى شور المربوعه فتح الباب شاف رزان امحنيه و متغطيه
و راقده علي أفراش
نبيل: أنتِ فيش اديري هنا
رزان ابــ صوت واطي: شن اتحق فيا اندير أحنيه
نبيل: و ما القيتي اتحني غير هنا ما عندك دار تنطمري فيها
رزان: واللهي عدي أسأل أمك تو تحكيلك أنا شن قتلهن و هنا شن قللي
نبيل: أمي
رزان: أنا أصلاً ما نبيش انحني لكن عمتي زرت عليا و أنا
حنيت عشان خاطرها و هي قالتلي ما اتلبزي دارك بــ الحنه
و حنتني هنا
نبيل خش خذى ادبشه (مع العلم نبيل يرقد فــ المربوعه و حتى ادبشه فــ المربوعه)
و عدى نبيل للحمام(حشاكم) دوش و بدل ادبشه و طلع صبى ع المرايه
و قعد يمشط في أشعره فجأة
رزان ابــ صوت مخنوق: نبيل نبيييييل
نبيل: ايواااا
رزان: تعال ابــ سرعه
نبيل حس صوت رزان فيه حاجه حط المشطه ع طاوله و عدالها
نبيل خش: ايوا
رزان ابــ صوت مخنوق: جيبلي حاجه نبي نستفرغ فيها
نبيل عدى ابـ سرعه قعد ايدور نين لقى سطل جابه
و جا ابــ سرعه الــ رزان
نبيل قدم شورها و قعد ايقعمز فيها و مسكلها الــ سطل وهي اقعدت
تستفرغ(حشاكم)
رزان: آآآآآآآآآآآآه مش قادره
نبيل: كملتي
رزان هزت ابــ راسها يعني اهاا
نبيل رد حطها ع الفراش و عدى شال السطل غسله و رد عندها
من جديد أول ما خش لاحظ أن رزان وجها أصفرررررررر بكل
نبيل: أنتِ اكويسه
رزان ترعش و أدموعها ينزلو: لالا
نبيل جاها و قعمز جنبها و حط يده علي راسها وبعدين
طبس و حط فم .. علي جبهتها عشان ايشوف حرارتها
رزان أول ما لمس فم .. نبيل راسها جسمها تقشعر
و شعر جسمها صبى
نبيل: لالالا حرارتك مرتفعه بكل
رزان اقعدت تبكي لأن الحراره كانت عاليه و حاسه راسها ثقييييييل
نبيل معش عرف شن ايدير خذى الفون و رن علي عائشه
..........
عند أهل نبيل
مسعوده: نبيل معش نزل
خالة نبيل تضحك: تلقيها اتقوله نبي الحمام نبي اميه
و هو ايزازي بيها
كلهم اقعدو يضحكو
أسيل: انشالله ايصير منهم بس
عاشه: انشالله
علي رنة فونها بحتت لقاته نبيل
عائشه: هذا نبيل ايرن
أسيل: ردي ردي
عائشه: ايوا نبيل
نبيل ابــ عصبيه: تعالي اركب تفكي الهايك يالي
حطيتوه للبنات امرضة عليا
عائشه: هيييييييييي كنها
نبيل ابــ صوت عالي: تي مش وقت تعالييييييييي
عائشه سكرت و صبت تجري
مسعوده: كنه نبيل
عائشه ابــ خوف: قالي تعالي فكي الحنه رزان امرضة عليا
كلهن: هييييييييييييي
و ركباً البنات يجاراً فوق اقعداً ايدقاً فتحلهن نبيل
و خشاً البنات جوا الدار و اقعداً ايفكاً الــ رزان فــ الحنه
أما نبيل قعد امصبي جنب باب المربوعه و ايحوس
أسيل اتفك فــ الحنه و خايفه: عطنا ما يرزينا شن درنا فــ البنت
عائشه ابــ توتر: اسكتي انا ابــ روحي ميته خوف
نبيل ايعيط: شن صار كملتاً
البنات ابــ خوف: اشوية بس
نبيل: تيييي هيا راه البنت اتموت عليا
البنات: هيا هي
و بعد اشوية كملاً البنات و لبساً رزان جاكه طويلة و ويشاح
سالمه: نبيل تعال
نبيل خش: كملتاً
سالمه: اهاا
نبيل نزل شمرها و شالها بين ايديه و نزل بيها يجري
قبلاته أمه و خالته امصبيات عند الباب و خيفات
مسعوده ابــ خوف: كنها رزان شن صارلها
نبيل طلع يجري: الله أعلم يا أمي الله أعلم
و طلع نبيل ابــ سرعه فتح السيارة و حط رزان قدام و عدى
ركب هو مشى ابـ سرعه شور المستشفى
..........
بعد نص ساعه
وصل نبيل ابــ رزان للمستشفى نزل فتح باب رزان
و شالها بين ايديه و خش بيها للمستشفى
نبيل و هو داهش: الدكتور وين
الممرضه: كنها شن عندها المريضه
نبيل ابــ خوف: مش عارفه كنها جيت لقيتها تعبانه
بس هي كانت امحنيه
الممرضه: اهاا تمام تعال
و خذاته الممرضه و عدو القسم الجلديه خششو رزان
كشف عليها الدكتور لكن ما طلع عندها شي شور الحنه
نبيل ابــ خوف: معناها كنها يا دكتور
الدكتور: الله أعلم شيلها للكشف العام
نبيل: باهي وين نلقاه
الدكتور: خليك متريح ح انكلم الدكتور هو يالي ح ايجيكم
و عدى الدكتور و نبيل قعد ايحوس جنب الغرفه بعد اشوية
جا الدكتور الثاني وخش كشف علي رزان و بعد ربع ساعه طلع
نبيل: دكتور انشالله خير كنها
الدكتور: لالا ما اتخاف هبوط بسيط هي فــ العاده تاخذ في اباري؟
نبيل بــ ستغراب: أباري شنو
الدكتور: أباري مسكن و فيتامينات
نبيل: دكتور أنا مش فاهم حاجه مسكن شنو و فيتامينات شنو؟
الدكتور: عشان الــ ## الشهريه
نبيل بــ أحراج: آه واللهي ما نعرف نحن متزوجين جديد
و ما نعرفش فــ الحاجات هذين عليها
الدكتور: تمام توا أنا عطيتها أبره و كتبتلك هنا مسكن
و نوع أبر ثاني لو اتعبت من جديد عطيها حبت مسكن
و اضربلها أبره و ياريت تعطيها مشروبات ساخنه يعني كمون
نعناع و أشوية عسل
نبيل: تمام
الدكتور: تقدر تاخذها
نبيل: تمام يعطيك الصحةة انشالله
الدكتور: سلمك
و عدى الدكتور و نبيل خش لقى رزان يا دوبك فاتحه أعيونها
نبيل جاب الكرسي و قعمز جنبها
نبيل ابــ صوت واطي: أنتِ اكويسه توا
رزان هزت راسها معناها لالا و اقعدت تبكي بدون صوت
يعني ادموعها بس يالي ينزلو
نبيل: اسسس عليش تبكي توا ح نطلعو و انجيبلك دواء تاخذيه
تقعدي اكويسه باهي
رزان هزة راسها يعني باهي
نبيل قرب و قعد يمسحلها فــ أدموعها و بعدها صبى
قعد ايساعد فيها عشان اتصبي و لف يده على أكتوفها
و يده الثانيه ماسك يد رزان و ايمشي فيها بــ شوية
نين وصلو للصيدله (مع علم أن في صيداليه جوا المستشفى)
نبيل: معلش نبيك تصرفيلي الدواء هذا
و مدلها الروشيته
الممرضه: امممم أستاذ الدواء هذا كمل من عندي هنا
كان تقدر ترجى نمشي للمخزن انجيبلك و انجي
نبيل طبس بحت في رزان يالي كانت حاطه راسها علي كتفه
نبيل: تقدري ترجي أشوية
رزان ابــ صوت هادي: باهي
نبيل رد بحت فــ الممرضه: تمام بس الله يسترك ما اطولي
الممرضه: تمام عشر دقايق بس
وعدت الممرضه
رزان ابــ صوت يادوبك طالع: نبيل
نبيل طبس عليها: نعم
رزان: مش قادره انصبي
نبيل قعد ايبحت فــ الممر لقى كرسي واحد جاب رزان
و جا شور الكرسي و قعمز عليه رزان و هو صبى جنبها
رزان مسكت يده نبيل بحت فيها
رزان: ما اتخلينيش ابروحي
نبيل حط يده الثانيه فوق يدها: ما اتخافيش قاعد امعاك
رزان: لالا تعال هنا
نبيل: باهي صبي اشوية
رزان صبت و جا نبيل قعمز ع كرسي و جابها جنبه
و رقدها علي صدره و قعد يمسحلها علي شعرها
نبيل: هكي اكويس
رزان هزة راسها يعني اهاا
و اقعدت رزان حاطه راسها علي صدر نبيل
و نبيل ضامها شوره و يمسحلها علي راسها
بعد عشر دقايق جت الممرضه صرفت الدواء لِــ نبيل
و خذى نبيل الدواء و الأباري و عدى هو و رزان للسيارة
و ردو شور الحوش
.........
عند أهل نبيل
كانو كلهم علي نار و خايفين علي رزان و ايرنو
علي نبيل لكن ما يبي ايرد عليهم
عائشه: حس سيارة نبيل
و صباً كلهن يجاراً عند الباب علي خشت نبيل
و امعاه رزان
مسعوده: الحمدالله ع سلامه كنها شن صارلها
نبيل: مش حاجه خطيره أشوية هبوط
مسعوده و البنات: باهي الحمدالله
نبيل ركب هو و رزان فوق فتح باب الشقه و خششها
للدار سلحها الماليه و الويشاح
رزان صبت بــ شوية
نبيل: كنك تبي حاجه
رزان: و أنت شن دخلك نبي نمشي للحمام (حشاكم)
نبيل ضحك: حتى و أنتِ مريضه جالطه و اللسانك طويل
تعالي خليني انساعدك
صبت رزان و نبيل ايساعد فيها نين وصلو للحمام (حشاكم)
خشت رزان و نبيل رد للدار فتح الدولاب دور فيه نين لقى
روب خفيف لونه أبيض و عليه طرف خفيف خذاه و خذى منشف
و شاله لِــ رزان دق عليها عطاه الها و عدى للدار وتالها الــ فراش
و بعدين خش للمطبخ قعد ايدور لقى نعناع يابس اطبخه و حط عليه
عسل علي طلعت رزان خشت للدار و قعمزت ع سرير
جا نبيل و في يده سفره فيها طاسة النعناع و أميه و حبوب المسكن
نبيل قعمز ع سرير جنب رزان و عطاها تشرب النعناع و بعد كملت
عطاها الدواء و الميه
نبيل ايشرب فيها فــ الميه: خلاص
رزان: اهاا
نبيل: صحه
رزان: سلمك
نبيل: هيا ارقدي بيش اترحي
رقدت رزان و نبيل غطاها و خذى السفره و قبل ما يطلع
نبيل: تبي اي حاجه كلميني
رزان: باهي
طلع نبيل و سكر الباب حط السفره فــ المطبخ و خش بدل
و كلم أصحابه قاللهم أن مش ح ايجي طلعله عمل
و قعمز نبيل فــ صاله ع الــ Tv
طول الليل قعد نبيل واعي خوفاً من أن رزان تمرض ولا تبي
حاجه و ما تلقاه و قعد كل أشوية ايخش ايشوفها و بعد يلقاها
راقده يطلع و ايسكر الباب
.........
صباح يوم جديد
ناض نبيل مفجوع لأن خفى علي فتحت باب الدار
و طلعت رزان
رزان: صباح الخير
نبيل: صباح النور
رزان جت قعمزت ع كنبه يالي جنب نبيل
نبيل: كيف حالك توا اكويسه
رزان: اهاا الحمدالله خير من أمس ابــ واجد
نبيل: باهي الحمدالله
رزان: انشالله ما كلمتش هلي بس
نبيل: لالا ما كلمتهم قلت ليل ما فيش داعي نفجعهم
رزان: باهي الحمدالله ما كلمتهم
نبيل: متأكده تمام أنتِ
رزان: اهاا واللهي تمام فطرت
نبيل: لالا هذي النوضه
رزان صبت مشت شور المطبخ بعدين وقفت
رزان: أنا نبي اندير فطور لو تبي انديرلك امعايا
نبيل: لالا ما اتعبي روحك كولي أنتِ بس
رزان: لا عادي ما فيهاش تعب
نبيل: باهي علي راحتك
عدت رزان وتت الفطور و بعدها كلمت نبيل
و قعمزت هي وياه ع سفره و اقعدو يفطرو
و الصمت هو سيد الموقف
نبيل يا كل و نظرته من تحت الــ تحت علي رزان
برضو رزان كانت اتبحت فيه من دون ما يفطنلها
و قطع صمتهم و نظراتهم الجميلةة الباب يالي ايدق
نبيل: ايوا هيا جاي
صبى نبيل فتح لقاها أمه و خواته
مسعوده: كيف حال رزان توا
نبيل: تمام الحمدالله خشاً اهي قاعده تفطر
و خشاً مسعوده و البنات حمداً الــ رزان علي سلامتها
و قالتها مسعوده أنها ح تلغي اللمه اليوم لكن رزان حلفت
أنها ما تلغيها و أنها أقعدت اكويسه و تقدر تنزل للمه
أما نبيل بدل ادبشه و خذى حاجته و عدى طلع للكفي
المهم نزلاً مسعوده و بناتها و بعدهن ركبت أسيل
اطمنت علي رزان و نزلت أما رزان دزت لِــ سندس
رساله قالتها أن جيتهن اليوم مش ح ايصير منها لأنها عندها لمه و سندس
ردت عليها قالتلها عادي امتى ما تفضى ح ايتلاقاً عدت رزان
لمت حوسة الفطور و خشت للمربوعه لمة جرت الحنه و بعدها
طلعت ضمت دارها و لمة الأدويه و الأبر و أذكرت رزان أمس
نبيل كيف كان جنبها و قعد امعاها لحظه ابــ لحظه و ما سيبها
بكل ابتسمت رزان و عدت شور الدولا خذت دبشها و عدت
دوشت و طلعت شور الدار ذهنت جسمها و لبسة روب خفيف
و نشفت شعرها و قعمزت تستشور فيه و بعد كملت صبت
ع دولا و اقعدت تختار في فستان عشان تلبسه و بعد ساعه
من الأختيار اختارت فستان شمواء نص كم لونه عسلي داكن
و عليه اكسوار ذهبي و سندل لونه بني و اقعدت رزان اتشوف
فــ اللبسة عليها
.........
مشى الوقت
فــ العشيه تحديداً الساعه 7
كانت رزان ادير الــ شعرها فــ الفير و بعد كملت اقعدت
اتحط في ميك آبها و بعد اشوية كملت و لبسة فستانها
و لبسة سندلها و اكسوارها و حطت عطرها و اقعدت
اتسقم في شعرها
.......
عند نبيل
كان فــ الكفي طول اليوم
و ع ساعه 6 ونص سكر الكفي و روح شور الحوش
لقى الدنيا حايسه و ملتمه كلها جا يبي يركب قبلاته أمه
مسعوده: نبيل نبيل
نبيل: نعم
مسعوده: هيا قول الــ رزان تنزل كنها طولت
نبيل: باهي حاضر
و ركب نبيل فوق عشان ايقول الــ رزان تنزل تحت
نبيل فتح الباب و خش قبلاته رزان لابسه العبايه
و حاطه الويشاح علي راسها
رزان رفعت أعيونها بحتت فيه و بعدين نزلتهن
نبيل قدم: احم كملتي
رزان بحتت فيه: اهاا انصلي المغرب بس
نبيل: باهي هيا كلهم جو تحت
رزان فردت الصلايا و بدت اتصلي و نبيل قعمز ع كنبه
و طلع فونه قعد ايبربش فيه لكن فــ الحقيقه أعيونه كانو عند رزان
كملت رزان صلاتها و لمت الصلايا و خشت خذت فونها
و بخت عطرها و طلعت
رزان وصلت عند الباب وبعدين
رزان: يييييييييييي
و ردت خشت للدار و جابت ازمالتو و جت
نبيل مابش يحكي و قعد ايراقب فيها كيف ادير
رزان اقعدت اتزملت و بعد كملت ردت حطاته فــ دار
و طلعت و يشاحها زرحق من علي راسها
اقعدت ترفع فيه و خايفه ع الزمالتو ايتلبز
و اقعدت أقريب ساعه و هي ترفع فيه لكن ما عرفت
نبيل صبى قرب شورها و جا من وراها مسك الويشاح
و حطه الها علي راسها و جاب يده من قدام و مسك الويشاح
ولفها الها علي لاورا
رزان كانت حاسه ابــ نفس نبيل على أرقبتها لأن كان وراها بـ ضبططططط
رزان قلبها قعد ايدق ابــ سرعه غريبه و جسمها سخن
نبي فم .. أقريب من وذن رزان
نبيل يحكي ابــ هدوء: هكي تمام
رزان حست رقيها جاف و قلبها يرعش
رزان ابــ توتر و صوت يرعش: اهاا اوكي
و قدمت رزان ابــ سرعه و فتحت باب الشقه و نزلت
نبيل صبى وقعد ايحك في راسه
نبيل: نبيل كنك شن صايرلك شن الحركات يالي ادير فيهن❤️
و عدى نبيل سكر باب الشقة و نزل ورا رزان

يتبع...
أودي الفرجاني##
في الحلقه الجايةة ح ايصير حدث يقلب الموازين القصة
كلها أنتظروني😍❤️
الحلقه الــ 15 ح اتكون بإذن الله بعد العيد😊❤️