مغرورتي

الحلقه الثانيه و الثلاثون...(32)
كانت رزان في حوش عيت سندس و امعاهن أرياف
كانن ايوتاً في الضيافه و التقديم للرجاله و الأذاعه كانت
شايله فــ الحوش و أهل سندس كانو فرحانين و ايوتو
كــأن الفرح الهما
سندس و رزان كانن ايضماً فــ المربوعه
رزان: سندس اشمري من هنا خلينا انحطوه تحت الشباك يا بنتي
سندس: تي بلاش اهبال حولي أنتِ حامل شن اشمري تو اتجي وحده
من البنات اتساعدنا
رزان: باهي خليني نمشي انشوف أرياف و انجي
سندس: تمام كلميلي امعاك سمر اتجي اتساعدني
رزان: باهي تمام
و عدت رزان شور الدار خشت لقت أم سندس ادير
لِــ أرياف فــ فتله و حواجب
رزان: هاي
أم سندس و أرياف: اهلين
رزان: شنو مزلتو ما كملتو
أم سندس: لالا خلاص اشوية و انكمللها
رزان: باهي تمام يعطيك الصحه يا عميمه
أم سندس: سلمك يا بنيتي
رزان: سمر تبيك سندس قالتلك تعالي شيلي امعايا الصالون
سمر: هيا ماشيه
أم سندس: رزان ليش ما قعدتي مع هلك اليوم فاتحت خوك
و نحن مش ح انقصرو مع أرياف
رزان: مستحيييل انخلي أرياف ابــ روحها في يوم زي هذا
حتى لو فاتحت خويا بعدين هلي كلهم قاعدين و خواتي قاعدات
أرياف ابتسمت: نجك ليا حبيبت قلبي أنـــا
رزان قرصت أرياف من خدها
أم سندس: ربي ايدومكاً البعضكاً انشالله واللهي
قديش فرحانه أن بنتي عندها صحبات كيفكاً
أرياف و رزان: تسلمي يا عميمه
و بعد أشوية ردت رزان عند سندس و اقعداً ايكملاً
فــ الضم
...........
عند أهل رزان
حتى هما كانو يجارو و ايضمو و ايوتو للفاتحه
و برضو كانو فرحانين لأن كسرو الحزن يالي كان
مالي الحوش
طبعاً عيت عمهم كانو عندهم و انصدمو بكككككككل
بعد عرفو أن سفيان ح ياخذ أرياف لأن كانو يعتقدو
أنه ح يرجى خديجه بس طلع اعتقادهم غلط
أمل: كيف رزان وين
رابحه: عند أرياف صحبتها
أمل: هييييي مفروض تقعد عند خوها مش عند الكنه
رابحه: رزان تعتبر في أرياف أختها وبعدين البنيه
مسكينه يتيمه ما عندها حد سلم صحباتها صباً امعاها
و ما خلنها ابــ روحها
أمل: و سفيان شن قال
رابحه: ما عنده ما ايقول لما ايشوف خواته و أمه فرحانات
بــ البنت يالي ايحبها أكيده ح يفرح
أمل سكتت و معش بت تحكي
..........
مشى الوقت
تحديداً الساعه 5 العصر
كانواْ العيلتين فرحانين و الأغاني و الزغاريت ماليه الحوشين
عند رزان
كانت عيلة سندس كلها قاعده و امقعمزين ايدربكو و ايغنو
فــ صاله و أرياف امقعمزه و متحشمه
رزان رن فونها صبت بعدت من البنات و ردت
رزان امسكر وذنها: ايوا سفيان
سفيان: رزان تسمعي فيا
رزان ابــ صوت عالي: اهاا سفيان نسمع فيك شن صار
سفيان: الفاتحه أنقرت الحمدالله
رزان: لوووووووووووووووووووووولي
مبروك يا خيي مبروك
سفيان ابــ فرحه: الله ايبارك فيك يا غاليه اسمعي
رزان: نعم
سفيان: قوليلها اترن عليا بيش انباركلها
رزان: باهي حاضر جبتو حاجات الدفع
سفيان: اهاا تو ايروحو بيهن أهل سندس
رزان: باهي تمام اوكي
و سكرت رزان و عدت قالتلهم أنهم قرو الفاتحه
و كلهن يقعداً ايزغرتاً
البنات: لووووووووووووووووووولي
لووووووووووووووووولي
لووووووووووووووووووولي
البنات ايغنن: الليله دفع أرفوفه قالو العقبال اللي مازالو
الليله دفع أرفوفه قالو و العقبال اللي مازالو
البنات: اياااااااااااااااااااي
رزان ابــ صوت عالي: قيسك ع صلاية ديمه حصلتي سمح التبسيمه
البنات: اياااااااااااااااااي قسيك ع صلايه ديمه حصلتي سمح التبسيمه
أرياف اقعدت تضحك
رزان طبست علي أرياف
رزان: حبي قالك رني عليا
أرياف ابــ حشم: من
رزان اضحكت: كيف من سفيان
أرياف اضحكت و صبت ابــ سرعه خذت فونها و خشت للدار
أما البنات اقعداً ايغنن و ايصفقاً علي جيت الرجاله
جابو الدفع و جو للحوش و جو امعاهم رجالة عيت رزان
و بداً البنات ايطلعاً فــ الضيافه
..........
عند أرياف
خشت للدار و سكرت الباب و جت تبي اترن علي سفيان
لكن هو سبقها و رن عليها
أرياف ردت: حبيبي
سفيان: يا روح حبيبك مبروك علينا يا أعيوني
أرياف ابــ حشم: الله ايبارك فيك واللهي فرحانه قد الدنيا
سفيان: و أنا مش عاطي فرحتي الحد والله و الحمدالله
ربي جمعنا بــ الحلال
أرياف: الحمدالله ياربي الحمدالله
رزان جت تبي اتخش علي أرياف سمعتها تحكي
سفيان: فرحان بيك قد الكون والله
أرياف: و أنا فرحانه أكثر يا قلبي سفيان أنحبك والله
سفيان: و أنا أنموت فيك يا مرات سفيان
أرياف اضحكت: خلاص نحكو بعدين تمام
سفيان: تمام حبيبي سلام
أرياف: سلام
رزان بعد سمعت دوة أرياف مع سفيان خطر عليها
نبيل و حست روحها ميته شوق عليها
أرياف طلعت لقت رزان امصبيه و أعيونها امدمعه
أرياف: زيزو كنك امدمعه يا قلبي
رزان تمسح في ادموعها: لا شي يا روحي غير فرحانه بس
أرياف ابتسمت: نجك ليا يا أعيوني
و عدت أرياف و رزان مع البنات و اقعداً ايساعداً فيهن
..........
عند أهل رزان
حتى هما كانت الدنيا ملتمه عندهم مع العلم أن أهل نبيل
كانو قاعدين لأن رزان كلمتهم و لزمت عليهم ايجو
و قالت أن حتى نبيل بعد ايكلمه سفيان يمشي عشان محد
ايحس أن في حاجه ساد أنها قاعده عندهم قرابت الــ شهرين
و هلها شاكين أن في حاجه لكن هي كانت اترقع فــ الموضوع
مسعوده: رابحه شنو رزان مش جايه اليوم
رابحه: لالا توا كلمتها قالت قاعدين ايضيفو فــ الرجاله بعد
ايروحو اتساعد البنات و اتجي
مسعوده: اهاا تمام نسألك العشاء للصبايا و الرجاله ولا صبايا بس
رابحه: لالا للصبايا و جزء من الرجاله يعني اصحاب سفيان
مسعوده: اهاا باهي هيا تعالي خلينا نمشو نبرمو ع عشاء
رابحه: هيا تعالي
و صبت رابحه و مسعوده عداً شور المطبخ و أمل امقعمزه
و مش عاجبها الوضع
...........
عند رزان
ع ساعه 7 ونص
بدى حوش أهل سندس يفضى و الناس اتروح
سندس خشت للدار لقت رزان تلبس
سندس: زيزو امروحه
رزان برمت عليها: اهاا حبي نبي نمشي انساعدهم
فــ العشاء
سندس: باهي كان قعدتي درنالك شعرك و لبستي
رزان: مافيش داعي
سندس: لا واللهي تقعدي أنتِ من الصبح اتساعدي فينا
و حتى لبس و ميك آب ما حطيتي اكويس أقل شي ع سريع
انديرولك أشوية جو كيف اتخشي ع عرب هكي أكيده
ح ايكون في صبايا عندكم
رزان: اووووووف سندس
سندس: اسكتي كلمه وحده هيا تعالي قعمزي
رزان: باهي ارجي أشوية سفيان يبي ايشوف أرياف
و بالمره عشان يبي يعطيها افلوس دفعها
سندس: احسن حاجه دارها أن ما عطاهن الخالها
رزان: لا وراسك أنتِ كلمته و قتله الفلوس تعطيهن
لِــ أرياف بيدك ما تعطيهن الخالها هذا عليش قالي نبي
انشوفها بــ المره
سندس: هو وصل سفيان
رزان: لالا مزال
سندس: معناها خلينا نبرمو علي أرياف قبل و بعد
ايجي سفيان نبدو فيك أنتِ
رزان: باهي هيا كلمي أرياف
و طلعت سندس كلمت أرياف و بدت رزان اتحطلها
فــ الميك آب و سندس اديرلها في شعرها
...........
عند نبيل
كان قاعد فــ الحوش يشرب في قهوه علي رنة فونه
بحت لقاه عصام
نبيل: ايوا عصام
عصام: تي وينك يا راجل سفيان يسأل عليك و عمي مرعي حتى هو
نبيل: لالا قوللهم مش جاي
عصام: كيف مش جاي باتي شن قال
نبيل: لا باتي لا نو كذا فوتوني خلاص الفاتحه و شلتوني
بــ الغصب عشان ما يفطنو أهل رزان بــ الموضوع
و أنا عديت عشان خاطر رزان و سفيان مش عشان
شي ثاني
عصام: بلاش حركات أعيال يا راجل سفيان عابي علينا
هي كلها ساعتين انتعشو و انروحو بلاش كلط يا راجل
نبيل: عصام
عصام: لا عصام لا شي هيا صبي تعال سفيان اشوية
و ايجي عيب ايرد يسأل عليك
نبيل: زمري باهي باهي خلاص أشوية تو انجي
عصام: هيا شوف حتى ماهر
نبيل: ماهر شن دخله
عصام: سفيان اعزمه شوفه جاي ولا لا
نبيل: باهي تم
عصام: هيا نرجى فيك
و سكر عصام و نبيل رد يشرب في قهوته
علي خشت تقوى
تقوى: و أخيراً شفتك و أنت 24 ساعه برا الحوش
نبيل غمض أعيونه: أستغفر الله يعني لازم أنشوف فسختك
كل ما جيت
تقوى ابــ عصبيه: أنت ليش تحكي امعايا هكي و كل ما
اتشوفني تستغفر اتقول شايف جن معلش يا اوووي أنت
عندك مرا و عيل مش لازم تسأل عليهم و تهتم بيهم
نبيل صبى و مسكها من يدها بــ القوة
نبيل ابــ عصبيه: لا اتهميني لا أنتِ لا أولدك فهمتي
تقوى فكت يدها من يد نبيل
تقوى ابــ عصبيه: أنا مش امدورني اوكي تمام لكن
فــ نهاية شوف اولدك سأل عليه أهتم بيه أنت حتى أسمه
ما تعرفه واللهي لوله عصام راه قاعده طراطيش
نبيل ايبحت فيها و ساكت
تقوى: العيل مريض عنده الصدر و كل بعد يومين لازم
يمشي ياخذ بخار و عصام مسكين كل بعد يومين ايشيل فيا
و مرات يتعب العيل فــ ليل ما نلقى الا عصام ايشيلني
كلا أنت  مش هنا بكل حتى بعد تقعد قاعد عقلك يقعد
مع الهانم رزان يالي ناسيتك و مش امدورتك بكل
نبيل ابــ عصبيه: سكري فمك و أسم رزان ما اتجيبيه علي اللسانك
تقوى ابــ هزوة: هه توا حكيت الكلام يالي قلته كلا انسيته و سكتت عليه
الا لما جبت سيرة رزان قفزة و ما سكتت
نبيل: عارفه مش أنتِ يالي غلطانه أنا الهبل يالي قاعد امعاك لعند توا
و برم نبيل خذى فونه و مفاتيحه من ع طاوله و عدى طلع
تقوى: نقعد كلبه كان خليتك اتريح يا نبيل و يالي سماها الله رزان
هذي واللهي انطفشها و انخليها ما عاد اتفكر اتردلك حتى بــ الكذب
و طلعت تقوى من المطبخ و عدت شور الدار عند ولدها
أما نبيل بعد طلع ركب سيارته و رن علي ماهر و سأله
و ماهر قاله أن ماشي للعشاء و عدى نبيل خذى ماهر
و عدو شور حوش أهل رزان
............
عند سفيان
وصل الحوش أهل سندس نزل من السيارة
و رن علي رزان قاللها أن جا و بعد اشوية طلع
استقبله خو سندس و خششه للمربوعه هدرز امعاه
أشوية وطلع خمس دقايق و دق باب المربوعه
سفيان رفع راسه انفتح الباب و خشت أرياف
سفيان أعيونه أقلوب أقلوب
أرياف خشت و كانت لابسه عبايه و ويشاح و بعد
سكرت باب المربوعه اقعدت تسلح فــ العبايه و الويشاح
سفيان صبى و قعد ايبحت فيها وهي تسلح
أرياف كانت لابسة فستان أسود راسملها جسمها و من
عند اليد اليمين فيه كيف الورده الملفوفه ع كتف كلا لونها أبيض
و لابسه عليه كعب أسود و دايرة شعرها فير و ميك آب خفيف
أرياف جت شور سفيان و هي متحشمه سفيان قرب شورها
و هو مبتسم و مسك ايديها الأثنين
سفيان: مبروك حبيبي
أرياف امطبسه راسه ابــ حشم: الله ايبارك فيك
سفيان ابــ صوت حنون: رفعي راسك بحتي فيا
أرياف: حبيبي متحشمه مش قادره
سفيان مسك حنك أرياف و رفعلها وجها
سفيان: حبيبي رفعي أعيونك فيا
أرياف رفعت أعيونه بــ شوية و بحتت فيه
سفيان مع ابتسامه: أنـحـبـكـ
أرياف ابــ صوت هادي بكككككككل: حتى أنــا
سفيان قدم و حبها في راس خشمها
سفيان ابــ صوت هادي: حتى أنتِ شنو
أرياف: حتى أنا أنـحـبـكـ
سفيان رد طبس و حبها ابــ لطف على فم ...
سفيان جا يبي ايرد أرياف مسكت راسه و رداته
شورها و حباته علي فم ..
و بعد أشوية و خرو هما الأثنين و حط سفيان يده
في جيبه و طلع بوكس فتحه و طلع منه دبله و قدم
مسك يد أرياف و لبسها الها
سفيان: شن عجباتك
أرياف اتبحت فــ دبله: اتهبلللللللللل حبيبي اتجنن
سفيان قرب يدها من فم .. و حبها و جابها و جا
قعمز هو ياها ع كنبه و اقعدو ايهدرزو مع بعضهم
..........
عند رزان
كانت جوا مع سندس دارتلها ميك آب و دارتلها شعرها
كيرلي و عطتها فستان عشان تلبسه
رزان: هييييييييييي شنو هذا لالالالا عار الفستان بكل
سندس: اسكتي بلاش اوفر البسي و أنتِ ساكته خلي العرب
اتشوفك و بعدين عادي أنتِ مرا متزوجه تلبس يالي تبيه
رزان: لا متزوجه لا شي كذا اسكتي و حولي البلا
من قدام وجي يا عطيني حاجه اكويسه يا خليني انروح ناخذ
حاجه من عندي
سندس فطنت أن رزان تقعدت من كلمة متزوجه و حاولت
اتغير الموضوع
سندس: واللهي العظيم تلبسيه تلبسيه كلمه وحده
رزان: سندس ليش تحلفي
سندس: أنا قتلك البسيه خلاص عاد
رزان: مدي مدي يا بارده
و خذت رزان فستان من يد سندس و اقعدت تلبس فيه
طبعاً كان فستان فضي و فوقه شاش فضي كان عند الركبه
و الكمام طويل بكل
علي خشت أرياف قالت الــ رزان قالك سفيان هيا
و لبسة رزان عبايتها و يشاحها و سلمت علي البنات
و علي أم سندس و طلعت لقت سفيان يرجى فيها ركبت امعاه
و عدو شور الحوش
..........
عند نبيل
وصل هو و ماهر الحوش أهل رزان طبعاً عشاء
الرجاله كانو دايرينه فــ الجنان خش نبيل و ماهر سلمو
ع الرجاله و قعمزو
نبيل أعيونه كانت اتلاقط على الحوش علي أمل يلمح رزان
حتى ابــ نظره لأن فعلاً كان ميت أرياااااااااف عليها بعد أشوية
نبيل: عمي مرعي
مرعي بحت في نبيل: نعم
نبيل: نبي انصلي العشاء مافيش مِكان فاضي
مرعي: خش للمربوعه يالي فــ سقيفه ما فيها حد
نبيل: تمام
و صبى نبيل خش للحمام البراني(حشاكم) توضى و خش للمربوعه
(طبعاً الباب الوسطي يالي ايخشش ع الصبايا كان امسكر)
قعد نبيل ايدور فــ صلايه نين لقاها فردها و بدى ايصلي
...........
انردو عند الرجاله
مرعي: يا أدهم مافيش ضي ثاني اتولعوه
أدهم: لالا يا جدي هذا حده
عصام: كان هذا انركبو ضي واحد ثاني من فوق اسطوح
أدهم: ايصير منه
عصام: اهاا شوري غير جيبولي خيط و بورتو لانبمه
أدهم: تعال في فوق اسطوح كل حاجه و كان في حاجه
ناقصه انجيبوها
عصام صبى: هيا
و عدى هو و أدهم فوق اسطاح
............
عند رزان
بعد نص ساعه وصلت هي و سفيان للحوش
لقو الدنيا امعبيه رجاله
سفيان: يييييييييي عليك قصه كيف تبي اتخشي توا
رزان: عادي شن فيها تو انغطي وجهي و انخش ع سريع
سفيان: باهي هيا انزلي فيسع
و انزلت رزان و امعاها سفيان خشو للحوش سفيان عدى شور
الرجاله و رزان خشت جوا الحوش ابــ سرعه و طول خشت
للحمام البراني(حشاكم) شافت الــ روحها فــ المرايه و سقمت أكسوارها
و طلعت تبي اتخش جوا الحوش سمعت حس رجاله نزلين من فوق اسطاح
رزان: هيييييييييي
و خشت تجري للمربوعه و سكرت الباب و اقعدت اتبحت من
فتحت الباب شافت عصام و أدهم نازلين
رزان حطت يدها علي قلبها: اووووووف الحمدالله ما شافوني
.........
عند نبيل
كمل صلاته و صبى ايلم في صلايته
فجأة انفتح الباب و خشت وحده تجري و اقعدت اتبحت
من الباب نبيل قعد امصبي و مستك نين برمت و سلحت عبايتها
و ويشاحها و اقعدت اتسقم في شعرها شافلها لقاها رزان
نبيل شاف رزان قعد مصدوم و ايبحت فيها
رزان اقعدت اتسقم في شعرها و جت تبي تطلع حست أن
في حد ايبحت فيها برمت بــ شوية شافته نبيل امصبي
و مصدوم و ايبحت فيها
رزان بعد شافت نبيل جتها الجمطه و كأنها جمره
و طاحت فــ ميه
اقعدو هما الأثنين علي نفس الحاله اقريب عشر دقايق
رزان فطنت الــ روحها لبسة عبايتها و ويشاحها ابـ سرعه
و جت تبي تطلع نبيل قدم شور ابــ سرعه و مسك يدها
نبيل: رزان اصبري
رزان لما نبيل مسك يدها غمضت أعيونها و خنقتها العبره
رزان: حول يدك
نبيل: رزان اصبري دقيقه بس نبي نحكي امعاك كلمتين
رزان: مافيش بيناتنا كلام حول يدك
نبيل: رزان أنــا .....
و قبل ما ايكمل نبيل كلامه رزان فكت يدها
و فتجت الباب و جت تبي تطلع نبيل رد مسكها
و دفها شوره بــ القووووووة نين رزان خبطت في صدره
و جها لصق في وجه نبيل و أعيونهم أقعداً في أعيون بعضهم
رزان اقعدت اتشوف لــ عيون نبيل و قلبها يرجف
نبيل ابــ صوت واطي: رزان ....
رزان فكت روحها ابــ سرعه و طلعت من المربوعه تجري
و خشت جوا أما نبيل قعد ايحوس فــ المربوعه و بعدها طلع برا
و رد عند الرجاله
...........
عند رزان
خشت جوا لقت البنات قعدات فــ المطبخ خشت و اقعدت
اتسلم عليهن
ريهام: رزان كنه انفسك عالي بسم الله
رزان ابــ توتر: لا شي غير داهشه
سالمه: طالعه اتهبلييييييييييي
رزان ابتسمت: شكراً يا أعيوني
سالمه ابــ صوت واطي: رآيفنا عليك والله
رزان: و أنا أكثر والله وين اعويشه
سالمه جت تبي تحكي عائشه خشت للمطبخ
عائشه: رزاااااااااان
و قدمت شورها و اضبطاً بعضهن
عائشه: رآيفتلك يا قلبي
رزان: و أنا أكثر يا روحي
سالمه: رزان شوفي لكِ كم عند هلك معش
رديتي ولا درتي حل في هــ القصه
رزان: خلاص القصه معش ح اطول اكثر من هكي
بكره كل حاجه ح تنحل
عائشه ابــ خوف: شن تبي اديري يا رزان
رزان: تو اتشوفي بكره
سالمه: باهي اقل حاجه قوليلنا نحن
رزان: خلاص حبي بكره ح اتشوفاً لأن أنا ابـروحي
مليت من القصة و مليت من كثرة ما دسيتها علي هلي
و مليت من كثرة كل ما يسألوني ليش معش روحتي الـ حوشك
نكذب كل مره في كذبه خلااااااص كفايه أنا ليا شهرين و أنا
أنفكر و قررت قراري بكره ح ننهي كل المواضيع يالي صايرات
سالمه و عائشه سكتاً و اقعداً ايفكراً رزان شن تبي ادير
و شن قصدها أنها ح تنهي جميع المواضيع
............
عند عصام
كان امقعمز و يحكي مع ردينه مسج