مغرورتي

الحلقه الرابعه و الثلاثون...(34)
عائشه ابــ خوف: رزان شن صار
رزان ادور: اصبري أشوية
و اقعدت رزان ادور فــ دولاب تحت الدبش
نيييييييييييين لقت ملف و فيه أوراق
رزان طلعاته و فتحاته و اقعدت تقرى فــ الأوراق يالي فيه
عائشه: رزاااان شن صار
رزان تقرى و أعيونها أقريب يطلعو من مِكانهم وقلبها
قعد ايدق ابــ سرعه
رزان ابــ صدمه: عائشه تعالي شوفي
عائشه: شنو كنك
رزان: تعالي فيسع
عائشه جت تجري رزان مدتلها الأوراق و اقعدت تقرى
عائشه ابــ صدمه: نعمممممم ربيع ولد أسامه خوها
رزان حطت يد في نصها و اليد الثانيه حطتها علي فم ..
و اقعدت تبرم فــ دار
عائشه: لالالا نبيل لازم ايشوف الكلام هذا
رزان جت تجري و مسكتها
رزان: تي أنتِ وين ماشيه يا هبله
عائشه: نبي انوري نبيل الأوراق عشان يعرف الحقيقه
رزان: اسكتي كذا تبي تمشي الــ نبيل شن تبي اتوريه
أشوية أوراق و تحاليل مكتوب فيهن أسم العيل و هو
امسجل علي أسم أسامه خوها
عائشه: اهاا هذا دليل كافي عشان يعرف حقيقتها
رزان: لالا هذا مش دليل كافي ولاهو دليل قوي عشان انواجهو
بيه وحده زي تقوى عائشه ركزي امعايا تقوى ملعوبها أكبر من هكِ
ابـ وااااااااجد يعني وحده كيف تقوى شن مصلحتها من أن اتجيب
ولد خوها و اتبلى علي نبيل و اتقول أن هو اعتدى عليها و حملت منه
عائشه بــ ستغراب: اهاا جديات كيف هي اتبلى علي نبيل حاجه كيف هذي
رزان: أنا متأكده تقوى هذي وراها حاجه كبيييييييييرة و أنا يالي ح نكشفها
عائشه: باهي توا ناخذو الأوراق ولا شنو
رزان: لالا لو دورتهن ولقتهن مش قاعدات ح اتشك فــ الوضع
فــ انا عندي فكره ح نطبعوهن و ناخذو النسخه الأصليه
و انحطولها المقلده
عائشه: تمام اسمعي عصام عنده طابعه لكن أنا ما نعرف انشغلها
أنتِ تعرفي اتشغليها
رزان: ساهل تو انخشو ع قوقل و نسألو كيف انشغلوها
و نطبعو هيا تعالي
و عدت عائشه و رزان لِــ دار عصام و خذاً امعاهن التحاليل
و خشاً الدار عصام ولعاً الطابعه و فتحاً ع قوقل و اقعداً ايطبقاً
فــ يالي مكتوب ع طابعه و بعد تعصيد كبير طبعاً التحاليل
و رداً ابــ سرعه الــ دار تقوى حطاً التحاليل مِكانهن و خذت
رزان النسخه الأصليه و ركبت هي و عائشه فوق
عائشه: توا مافيش داعي للتحليل صح
رزان: لا لازم منه يقعد دليل ثاني لأن مرات ادير اي شي
و تنكر التحاليل يالي دارت كل القصه هذي تقدر اتطلع روحها
من قصة التحاليل كيف الشعره من العجين
عائشه: اوكي تمام
علي دقت باب الشقه عدت عائشه فتحت لقتها سالمه
قعمزاً كلهن فــ صاله و حكن الــ سالمه ع يالي صار
سالمه: هيييييييييي يعني العيل ولد خوها
رزان: مش عارفين لعند توا هو كلام علي ورق مافيش
اي شي يثبت الكلام هذا ممكن اتقول حتى الأوراق هذين
جزء من لعبتها
سالمه: بس أنقوللكاً حاجه
رزان و عائشه: شنو
سالمه: حاسه أن في طرف ثاني فــ الموضوع
رزان بــ ستغراب: طرف ثاني كيف من يعني
سالمه: مش عارفه بس أحساسي ايقولي أن في حاجه ثانيه
فــ القصه هذي
عائشه: لو كان نعرفو مِكان أسامه خوها بس
رزان: هو أسامه راس الخيط لو نلقوه ح تنكشف لعبة تقوى كلها
سالمه: بس لقيت أسامه مش ساهله تبي راجل ايكون امعانا
رزان: الراجل قاعد
سالمه و عائشه: من
رزان: سفيان خويا
سالمه و عائشه اقعداً سكتات و ايبحتاً في رزان بــ ستغراب
رزان: أنا ما حكيتلكاً يالي صار امعايا في حوش هلي
سالمه: شنو قولي شن صار
رزان: أنا حكيت الــ سفيان يالي صار كلا
سالمه و عائشه ابــ صدمه: احلفييييي
رزان: واللهي العظيم
سالمه: بس كيف هو خلاك اتردي و ما حكى مع نبيل ولا بابا
رزان: أنا فهمته و قتله أن شاكه فــ الموضوع و حكيتله الكلام يالي
قلته لكاً أمس كلا و قتلك راضي اتصبي امعايا و اتساعدني
قالي أنا اضراعك الــ يمين و اسندك و جبل ولا ظهرك
و يالي تبيها حاضر هو وافق ايكون امعايا و ايساعدني
عائشه: تحكي جد
رزان: اهاا و قسماً بالله كيف ما نحكيلكاً
سالمه: باهي يعني توا شن ح انديرو
رزان: توا مش ح نقدرو انتحركو نين انديرو التحليل
و يطلع بعدين انفكرو شن انديرو
سالمه: بعد خطرها خطرتي عليا هاكي
و حطت سالمه يدها في جيبها وطلعت منها منديل
رزان بــ ستغراب: شنو هذا
سالمه: جبتلك شعر العيل
رزان خذاته منها: تمااااااام بكل يعني اليوم نقدر نعطي سندس
العينات بيش يبدى خوها فـ تحاليل
وصبت رزان جابت المنديل يالي فيه شعر نبيل و جت
عائشه بــ ستغراب: شعر نبيل كيف جبتيه
رزان ارتبكت: آه
سالمه: صح شعر نبيل امينين حصلتيه
رزان: ااااااااااااا خذيته من المشطه امتاعته
سالمه و عائشه: اهاااااااااااا
و بحتاً هنا الأثنين في بعضهن و اضحكاً لأنهن عرفاً
أن رزان مشت الــ نبيل
...........
تسريع الأحداث
كلمت رزان سندس وهي جتها فــ الحوش و خذت منها العينات
بس قالتلها خبر مش حلو بكل قالتلها أن خوها قاللها أن التحليل
ح ايطول لأن تحليل سري و محد يعلم بيه يعني ياخذ أقل شي
اشهرين و رزان ازعلت لأن الموضوع ح ايطول لكن كانت اتصبر
في روحها و اتقول هذا طلا عشان خاطر ادافع علي حبها
و كلمت سفيان و قالتله أنها تبيه ايدورلها علي اي حد يقرب
الــ أسامه و أخته تقوى و يعرف منهم قصة عيت تقوى كلها
و ليش هما سافرو و يعرف مِكان أسامه و كيف يقدر يوصله
نبيل كان طول الوقت برا الحوش و لما ايرد كان يسأل علي رزان
و كان حكت حاجه و البنات كملهنا ايقولاً في نفس الكلام
لِـــ نبيل و مسعوده و سالم أن رزان ماتبيش تحكي مع حد
ولا تبي تحكي الــ حد علي سبب جيتها و مسعوده حاولت اتكلمها كم
مره هي و نبيل لكن سالم كان يمنع فيهم و ايقوللهم ان ما ايزرو عليها
اهم شي هي قاعده في حوش راجلها و مطمنين عليها
أرياف كانت طول الوقت هي و سندس فــ سوق اتبتت
و اتجيب فــ دبشها و كانت فرحانه بكل و سفيان قاللها
أن احتمال ايطلع الفرح الشهر الجاي بس بعد عرف
سفيان ابــ قصة رزان غير رايه ع تطليعت الفرح بس
ما قالها الــ أرياف
.............
في يوم كان يوم جمعه
تحديداً عند أهل نبيل
عصام خش للمطبخ لقى أمه و خواته ايديراً فــ الغداء
عصام: أمي
مسعوده بحتت فيه: نعم
عصام: باتي وين
مسعوده: كنك عليش
عصام: نبيه في موضوع
مسعوده: شن الموضوع
عصام: غير قوليلي وينه توا بس
مسعوده: قاعد ايوتي في روحه عشان صلاة الجمعه
عصام: باهي تم
وطلع عصام برا
سالمه: كنه عصام لاه يومين مش طبيعي
مسعوده: يستر الله خوتك هذوم كل مره جاييني ابـ كاينه
....
عصام طلع للصاله لقى باته طالع من الدار
عصام: صباح الخير
سالم: صباح النور
عصام: وين طالع
سالم: لالا مزال بدري ع صلاة كنك تبي حاجه
عصام: اهاا نبيك في موضوع
سالم بــ ستغراب: انشالله خير
عصام: تعال انقعمزو فــ مربوعه
سالم: باهي هيا تعال
و طلعو عصام و سالم قعمزو فــ المربوعه
...........
عند رزان
كانت قاعده فــ شقتها توضت و لبسة بدلت الصلاه
و قعمزة تقرى فــ قرآن علي رنة فونها
رزان بحتت فــ الفون لقتها عمتها سكرت القرآن و مسكت
الفون و ردت عليها
رزان: ايوا عمتي صباح الخير
مسعوده: صباح النور حبيبتي كيف حالك
رزان: الحمدالله أنتم شن ديرين
مسعوده: ابــ خير الحمدالله قتلك
رزان: نعم
مسعوده: عشان خاطري ما تكسريني المره هذي
رزان: كنك يا عمتي قولي
مسعوده: تعالي انزلي تغدي امعانا واللهي ما ح نسألوك ولا
ح نحكو اي حاجه أنتِ بس أنزلي تغدي و هدرزي امعانا
رزان اسكتت
مسعوده: الله ايربحك مش عشان خاطر اولدي لكن عشان خاطر
أنا و عمك نوعدك أن مش ح نسألوك اي حاجه ع الموضوع
رزان: باهي تمام تو انجي
مسعوده ابــ فرحه: نجك ليا هيا نستنو فيك
رزان ابتسمت: خلاص اشوية تو ننزل
مسعوده: تمام اوكي
رزان: اوكي
سكرت رزان من عمتها و ردت تقرى فــ قرآن
كملت و صبت بدلة دبشها لبسة فستان أبيض فيه ورد أزرق
و عليه ويشاح سمائي خفيفه و بندان أبيض و حطت أشوية
ميك آب و خذت فونها و مفاتيح الشقه و نزلت تحت
...........
عند عصام
سالم: عصام أحكي لكِ ساعه اتقول في مقدمات و مش فاهم
منك شي أحكي من الأخر هيا
عصام: تبي من الأخر من الأخر
سالم: اهاا قول
عصام: القني نبي نزوج
سالم: نعممم
عصام: كيف ما سمعت يا باتي القني نبي نزوج شقه و عندي
شقه شهاده و عندي شهاده و عمل ساهل انحصل في يومين
خلاص نبي اندير وليه و نستقر
سالم: وااااااااااااو يعني خلاص أنت هكي تحساب روحك جاهز
شهاده و عندك و شقه و عندك يعني أنت هكي كامل
عصام: باتي و راس أمك فكني من دسكت أنت مزلت أصغير
و أنت مزلت مش امتاع مسؤوليه و مزلت هبل و و تربت الغوالي
فكني من هــ الدسكه مليت منها
..........
عند رزان
كانت نازله تحت اسمعت عصام و سالم يحكو
ابــ صوت عالي و سمعت كلام سالم
...
تقوى حتى هي سمعت صوتهم طلعت برا شور المربوعه
و بعد شافت رزان امصبيه حتى هي صبت
تقوى ابــ صوت واطي: هذي شن نزلها و فيش ادير هنا
و اقعدت امصبيه تسمع في سالم و عصام و اتراقب في رزان
..........
عند عصام
سالم: يا عصام القصه مش قصة أنك مزلت الصغير
أنت اولدي و أكيده في خاطري انزوجك و نفرح بيك
عصام: ها معناها شن في أخرى
سالم: أنت مش شايف يالي صاير في حياتنا , قصة خوك
يالي معش بت تنتهي كل مره طالعتلنا بـ موضوع جديد
عصام: باتي أنا امقدر يالي يالي قاعد ايمر بيه نبيل
لكن يا باتي قصته طولت و هو معش تحرك ولا دار
الــ روحه حل قتله أنا مستعد انساعدك انصبي امعاك نمشو
اندورو اي دليل بالك تطلع البنت تكذب لكن هو سكر راسه
و قالي فوت الموضوع و اطلع منه خلاص شن نبي انديرله
يعني أنا خلاص نبي نمشي انشوف حالي كيف نقعد هكي
عشان خاطر خويا يالي مش امعدل ولا امدور وضعه
يالي كل يوم فــ نازل
سالم: عصام مهما كان يقعد نبيل خوك ولازم اتصبي امعاه
عصام جا يبي يحكي سالم قاطعه
سالم: هي كلمه وحده من دون نقاش زواج مافيش نين
تنحل قصة خوك
رزان ما قدرت اتحمل أكثر و قدمت شور الباب و دقت
رزان من ورا الباب: عمي أنا رزان ممكن انخش
سالم: تعالي يابنتي خشي
رزان فتحت الباب و خشت وهي مبتسمه
رزان: صباح الخير نهاركم سعيد
عصام و سالم: صباح النور
سالم: تعالي خشي
رزان خشت و سكرت الباب
تقوى بعد خشت رزان طلعت و قدمت شور الباب
و اقعدت تسمع فيهم فيش يحكو
سالم: كنك يابنتي تبي حاجه
رزان: عمي أنا كنت نازله من فوق ومن دون قصد
سمعتكم تحكو
سالم و عصام ايبحتو فيها
رزان: عمي عصام كلامه صح هو مش مضطر يجرى
قصتي أنا و نبيل نين تنحل هو من حقه يزوج و ايشوف
حياته أساساً نبيل مش امدور القصةة ليش عصام
ايدورها ويقعد يستنى
سالم طبس راسه و عصام قعد ايشير الــ رزان
يعني اقنعيه
رزان هزت راسها يعني باهي
رزان: عمي كان اتغاليني و أتعز بابا الله يرحمه وافق
علي كلامي خلي عصام يفرح و عمتي حتى هي مسكينه
سادها هم خلاص خلونا نكسرو الحزن و نفتكو و كان
عليا أنا و نبيل نوعدك يا عمي كلها فترة أقصيرة
و انتريح من هــ القصه
سالم بحت فيها: كيف نبي انتريح
رزان: هذا حد يالي نقدر انقوله لكِ توا بس صدقني حتى
أنا ملييييييييييت من هــ القصة خلاص ح تنتهي و نفتكو
منها عن قرييييب
سالم قعد ساكت
رزان: ها عمي شن قلت
سالم: باهي باهي انشالله خير نحكي مع مسعوده
و بعدين ساهل
عصام فرح بككككل
رزان ابتسمت و قربت علي عمها و حباته علي راسه
رزان: ربي ما يحرمني منك يا عمي
سالم حب رزان علي راسها: يحفظك يا بنتي
رزان ابتسمت و اسكتت
سالم برم بحت في عصام
سالم: ها عاجبك هكي
عصام قعد ايحك في راسه و امطبسه و يضحك
سالم و رزان ضحكو
تقوى: خزييييي شن هــ لفعه هذي بارمه ع عيلة كلها
مش امخليه حد ما ايحبها مش عارفه ليش ايحبوها شن
فيها زود عليا بس كني أنــا كيفي كيفها و أحسن منها أخرى
غير آآآآآآآآآآه عيلة طايحه علي راسها
و برمت تقوى و خشت جوا الدار و قعمزت ع سرير
تقوى: بس تعالي هنا يا تقوى الفرخه هذي شن قصدها
ابــ قولت كنها فترة و كلنا انتريحو من هــ القصه حي علي
أمي ازعما فاطنه الحاجه ولا عارفه حاجه حي حي كان اعرفت
و قسماً بالله كل شي يخرب أحسن حاجه نمشي انكلم شيماء
و انقوللها شن يالي سمعته
و عدت تقوى ابــ سرعه خذت فونها من الدرج و رنة
علي شيماء
شيماء ابــ جعونه: ايوااا
تقوى: وين قاعده
شيماء: كنك شن في
تقوى: صار موضوع شخشبني أشوية
شيماء ابــ خوف: ها شن في راه اتقولي حد عرف حاجه
تقوى: تي لالا لالا
شيماء: ها املا
تقوى: أنا حاسه أن رزان عارفه حاجه
شيماء ابــ صدمه: كيف عرفتي
تقوى: توا كنت ........
شيماء: بس ما أعتقد أنها عرفت حاجه المشكله يالي
امهبلني لعند توا لييييش ردت للحوش ليش بس
تقوى: أنا فكرة و قلت بالك عشان خايفه من خوتها
يعلمو هذا عليش ردت هنا لأن نبيل قال خوها مش باين
عليه أن عارف حاجه
شيماء: ممكن هذا هو السبب لكن أسمعي أنا مزلت
مش متريحه للموضوع
تقوى: باهي شن أندير أنا توا
شيماء: اسمعي خليلي عينك علي رزان و بذات
كان حد جاها خلي عينك امعاها و وذنك حتى هي امعاها
و قوليلي تحركاتها أول بأول تمام
تقوى: بس السعر ح ايزيد هكي
شيماء: اووووووف كلا أنتِ مغلى عليك الفلوس
تقوى: واللهي يالي أندير فيه مش ساهل عدي كان القيتي
وحده تاخذ ولد خوها و اتجي الحوش ناس غرب و اتقوللهم
ولدكم اعتدى عليا و أنا حملت منه و عندي منه عيل واللهي
العظيم ما عاد واخذه منك أفلوس لأن أساساً مش ح تلقي
وحده أديرها
شيماء: باهي باهي خلاص فهمت يالي تبيه تاخذيه غير
ديري كيف ما قتلك
تقوى: خلاص تم أي خبر انديرلك فون
شيماء: تم اوكي
تقوى: اوكي
و سكرت تقوى من شيماء و اقعدت اتفكر فـ يالي سمعاته
..........
عند مسعوده
مسعوده: سالمه وطي ع تقليه و أنتِ يا اعويشه ديريلنا قهوه
قبل لا يمشو باتك و خوتك للجامع
عائشه: باهي حاضر
رزان خشت: السلام عليكم
مسعوده ابــ فرحه: وعليكم السلام هلا هلا بــ أبنيتي
رزان ابتسمت و جت شور عمتها وحبت علي يدها وراسها
مسعوده ضمتها شورها علي خشت تقوى
مسعوده مزالت مضبطتها: أبنيتي الغاليه ربي ما يحرمني
من هــ الخشه السمحه
رزان: تسلميلي يا روحي
سالمه و عائشه ايبحتاً فيهن و مبتسمات
و تقوى اتبحت و مش عاجبها
مسعوده: دبينك جيتي معناها تعالي ديريلنا انتِ القهوه
من تحت ايدياتك
رزان: من أعيوني حاضر
مسعوده: حضرلك الخير حبيبتي
رزان: عمتي عمي و عصام برا يبوك
مسعوده: هيا مشيتلهم توا
وطلعت مسعوده برا و رزان خشت سلمت ع بنات
و اقعدت ادير فــ القهوه و دارت روحها ما اتشوف
فــ تقوى بكل و تقوى امصبيه اتبحت فيها و راقيلها منها
............
عند نبيل
كان برا الحوش و بعدها جا خش طول الداره خذى ادبشه
و دوش و بعدين لبس جلابية عربيه و مشط شعره و لحيته
و بخ عطره و طلع من الدار و عدى شور الصاله لقى أمه
و باته و عصام أمقعمزين برا الصاله و يحكو و مسعوده
باين عليها أنها فرحانه
نبيل: السلام عليكم
كلهم: وعليكم السلام
نبيل قعمز: كنكم باين أن في حاجه
سالم: خوك يبي يزوج
نبيل: باهي ماشالله ع بركه انشالله
سالم: باهي يعني مافيش حاجه ثانيه اتقولها خاطي
الكلام هذا
نبيل بــ ستغراب: شن نبي انقول يعني
سالم: يعني ماتبيش اتقول حاجه كيف أنك تبي اتحرك
و اتحاول اتصالح مراتك و اترضيها معناها مستحيل
ترضى بعد يالي درته ولا اتحرك روحك و ادير حل
الــ مراتك الثانيه و اولدك مش عارفه كيف امبرد هكي
و ماد وجك ولا كأن في حاجه صايره عازق المرا
و العيل هكي و خلاص و ماتندري علي ريحهم وين اتهب
نبيل صبى ابــ عصبيه: علي أساس في حد حاسبيا أمبرد
ولا نحرق كذا ونبي محد يدخل في أمي و فتوني و معش
تفتحو أمعايا الموضوع هذا بككككل ما دخلكمش بيا
و صبى نبيل شور المطبخ و راقيله بككككل
نبيل كان يمشي ابــ عصبيه و قوة علي طلعت رزان من المطبخ
و في يدها سفرة القهوه ونبيل يمشي ابــ قوة و هوووووووووووب
يخبطو في بعضهم و تنقلب سفرة القهوه كلهاااا علي رزان
رزان: آآآآآآآآآآآآآآآآآآه
نبيل قرب شورها ابــ خوف
نبيل ابــ خوف: رزان أنتِ أكويسه مش قصدي واللهي ما شفتك
رزان ابــ وجع: انحرقت انحرقت
نبيل مسك يد رزان و شالها شور الحمام(حشاكم) فتح الباب
و خش هو وياها
نبيل: ارفعي القفطان خليني انحطلك اميه امصقعه
رزان ابــ رفعت حاجب و وجع في نفس الوقت: نعممم شنو
نبيل: بلاش تسكير راس توا مش وقته حولي خليني انحطلك
اميه امصقعه
رزان ربعة ايديها و عطاته ابــ ظهرها: مانبيش اطلع برا مالكش دخل
نبيل: زمري
و قدم عليها و فتحلها سوسة القفطان
رزان ابــ صدمه: أنت فيش ادير
نبيل يفتح فــ سوسته: اسكتي
و فتحلها نبيل السوسته و نزللها القفطان و برمها شوره
و فتح الميه المصقعه و قعد يسمحلها مِكان الحرق
رزان كانت ساكته و اتشوف الــ نبيل كيف يمسحلها
نبيل قعد ياخذ فــ الميه ابـيده و يمسح فيها علي مِكان الحرق
نين وصل عند البطن حط يده علي بطنها و و فطن نبيل أن
بطن رزان يا دوبك طالعه
رزان أول ما نبيل حط يده علي بطنها حست و لِــ أول مره
أن الــ بيبي تحرك
رزان أول ما الــ بيبي تحرك أعيونها دمعو و جسمها تقشعر
نبيل حتى هو حس بيه و رفع أعيونه في رزان و هو مندهش
و مبتسم
نبيل ابـ اندهاش: حسيتي بيه
رزان ابــ صوت يرعش و أدموعها ينزلو: اهاا حسيت
قعد نبيل حاط يده و رزان ساكته و اتحسس فــ البيبي بعد ايتحرك
بعد أشوية الــ بيبي وقف ع حركه نبيل صبى و قعد لاصق في رزان
نبيل أعيونه حمره و مليانه أدموع: ليش تحرمي فيا منك
رزان و العبره خنقتها: من يالي حرم الثاني منه
نبيل: رزان أنتِ عارفه أن أنا ...
رزان قاطعاته: نبيل مانبيش نحكي حول
نبيل: مش كنتي اتعطي و اتقولي احكي و برر هيا توا نبي نحكي
رزان: بعد ايش يا نبيل بعد ايش جاي تبي تحكي ليش مش من الأول
جيت و حكيت ليش اتخلينا نوصلو للحاله هذي ليش نوصلو لِــ نقطه
زي هذي أسمعني لو مزلت اتعز الأيام يالي عشناهن مع بعضنا
ما تمنع عصام من الزواج صبي امعاه و خلي باتك ايوافق
خلي كل حد ايعيش حياته و ما ايوقفو حياتهم علينا نحن
و لفت رزان ردت لبسة قفطانها و اقعدت اتحاول اتسكر السوسته
لكن ما قدرت و كانت اتكابر و ما تبي اتقول الــ نبيل ايسكرها الـها
نبيل قعد ايشوفلها و بعدين قدم شورها و سكرها الـها
رزان طلعت ابــ سرعه برا لقتهم كلهم امصبيين قالتلهم أنها اكويسه
و ركبت فوق عشان اتغير دبشها
أما نبيل طلع و عدى هو وباته و عصام للجامع عشان الصلاه
أما رزان بدلت دبشها و صلت الظهر و نزلت تحت و اقعدت اتوتي
فــ الغداء مع عمتها و صبياتها أما تقوى كانت بس امقعمزه و اتشوفلهم
.............
عند نبيل
كملو صلاه و طلعو من الجامع
عصام: أنا ماشي للدكان انجيب مشروب و انجي
سالم و نبيل: باهي تمام
و عدى عصام شور الدكان و نبيل و سالم اقعدو
يمشو شور الحوش
نبيل: احم باتي
سالم: ايوا
نبيل: عصام
سالم: كنه عصام
نبيل: باتي ما اتسكرها في وجه خليه يزوج و ايشوف
حياته مانبيش حد ايوقف حياته عشاني أنا ما اتفكرو فيا
سالم: بس كيف ...
نبيل: باتي الله يسترك ما اتزيدها عليا كيف ما قتلك
شوف من البنت و احكي مع جدي و عدو اخطبوها لاه
و لمو الموضوع ابــ سرعه بيش العيله تفرج اشوية
سالم سكت ومع بى يحكي
روحو للحوش و روح عصام لقو الغداء واتي قعمزو
كلهم و اقعدو ايتغدو
نبيل طول الغداء كان ايشوف الــ رزان لكن هي كانت
امطبسه أعيونها و ماتبيش اتشوفله و تقوى طبعاً أعيونها
امعاهم و راقيلها
سالم: من بنت الناس يالي تبيها
كلهم سيبو الوكال و بحتو في سالم
عصام: آه
سالم: شنو يالي آه قتلك من البنت يالي تبيها
عصام: احم وحده يعني هي وحده
سالم: تي شنو وحده عارفها وحده من هي الوحده هذي
عصام: ردينه
رزان رفعت رزان و حتت الــ عصام
سالم بــ ستغراب: ردينه من
عصام: احم ردينه بنت عمي خليل الله يرحمه
مسعوده و البنات انصدماً
رزان اقعدتت اتشوف الــ عصام ابــ صدمه
رزان ابــ صدمه: ردينه أختي
عصام بــ أحراج: اهاا ردينه أختك
مسعوده ابــ فرحه: و نعمه من أخترت يا اوليدي خلاص
سالم أحكي الــ باتك و من بكره نمشو نخطبو رسمي و نتفقو
ع فاتحه و الفرح
سالم: غير اهدي اهدي شن فاتحه وشن فرح لالا ما ايصير شي
عصام و هو غمتله: كيف ما ايصير شي يا باتي مش توا كنت اموافق
سالم: اوكي كنت اموافق بس بعد عرفت البنت تغيراً حاجات وااااجد
عصام ابــ عصبيه: حاجات شنو يا باتي
سالم جا يبي يحكي رزان حكت
رزان: عمي ممكن نحكو ابــ روحنا اشوية
سالم: تعالي
و صبى سالم خش هو و رزان للدار
رزان: عمي لو كان قصدك ع حاجات الواجد أنها طلعت ردينه
أختي و عشاني أنا تبي تأجل أنا انقولك من توا توكلو على الله
و عدي احكي مع عمي فتح الله
سالم: تي كيف رزان كيف الكلام هذا كيف تبي اتخلينا
انديرو الفرح و أنتِ هكي حالتك و مش عارفين شن يالي في راسك
رزان: عمي الله أيخليك أرجوك خليهم يفرحو يا عمي
عمي أنا وعدت بابا الله يرحمه أن ح اندير بالي علي خوتي
كلهم أنا اليوم كنت انخطط أن انكلم سفيان بيش ايطلع الفرح
مانبيش اي حد ايوقف حياته عشاني أنا
سالم: بس سفيان حتى لو يبي ايطلع الفرح هو مش عارف
ابــ قصتك لو كان عارف راه مستحيل ايطلعه و اخته فـ الحاله هذي
رزان فطنت للوضع و أنها اقريب زلقت و قالت الــ عمها ان سفيان
عنده العلم فــ حاولة اتلم الموضوع
رزان: حتى لو يا عمي و اللهي العظيم حتى لو سفيان كان عنده
العلم كنت زريته عشان ايطلع الفرح عمي الله ايربحك خلي عصام
يفرح و امشو اخطبوله مرات نتفقو مع بعضنا و نطلعو فرحهم و فرح
سفيان مع بعضه هيا يا عمي عشان خاطري لو اتعدني بنتك دير
يالي انقولك عليه
سالم: أستغفر الله منك يا رزان أنتِ كيف باتك الله يرحمه
بــ ظبط كان ايبد فرحت الكل علي فرحته هو سبحان الله
وقت تحكي كأنِ شايف خليل الله يرحمه قدامي
رزان ابتسمت: يعني اموافق
سالم هز راسه يعني اهاا
رزان ابــ فرحه: شكراً يا عمي شكراً
و طلعت رزان و عمها من الدار و قعمز سالم و قال
أن اموافق و أن اليوم ح يمشي يحكي مع باته و ان
بكره ح يمشو الــ جد رزان و يطلبو ردينه رسمي
و رزان قالتلهم أنها ح تمشي الـ هلها و اتقوللهم ع بكره
و اقعدو ايكملو فــ غداهم و طبعاً تقوى طوووول وصلت
الأخبار الــ شيماء
............
مشى الوقت
فــ ليل تحديداص الساعه 9
عدى سالم عند باته عشان يحكي امعاه علي خطبة عصام
و رزان قالت الــ عصام أن ايشيلها الحوش هلها عشان
تحكيلهم و نبيل كلمه ماهر و قاله نبي انجيك قاله تعالي فــ الكفي
...........
عند ماهر
وصل للكفي نزل لقى نبيل امقعمز برا
ماهر: سلام
نبيل: سلام
و سلم ماهر علي نبيل و قعمز
نبيل ايبحت في ماهر: كنك لاوي وجك شكله في حاجه
ماهر و هو غمتله: أمي يا نبيل أمي
نبيل ابــ خوف: كنها أمك صايرلها حاجه
ماهر: لالا بس امرقيتها ليا يا راجل
نبيل: كنها شن دايرتلك
ماهر: سكتنلي علي موضوع الزيزه زقبتلي زقبه شينه
نبيل: باهي و أنتِ شن يالي امضايقك فــ الموضوع
و بعدين تبي الحق أمك اصدقت خلاص كبرت أنت
مش أصغير أقريب اتسكر الثلاثين يالي في عمرك
عندهم أعيال
ماهر: تي يا راجل مشكلتي مش فــ الزواج
نبيل: ها امالا شن مشكلتك
ماهر: المشكله أن أمي امسكره راسها تبي تاخذلي
بنت صحبتها ولا مندرعنه وحده تعرفها
نبيل: باهي دبينه هي عجبتها شن المشكله و أنت حتى
حب ما عندك عشان تزوج يالي اتحبها
ماهر بحت فيه: ومن قالك ماعنديش وحده أنحبها
نبيل: اووووو جديده هذي من امتى يا امسخ عندك وحده
ماهر طبس راسه و ضحك: من زمان
نبيل: خزي يا تافه و أنا أخر من يعلم تي أنا كل حاجه اتصير
امعايا انجي انقولها لكي و أنت تطلع أتحب وحده و ما اتقولها ليا
ماهر: اسكت يا راجل حتى البنت ابــ روحها ما تندري علي حبي الها
نبيل: كيف صار شكله الموضوع مشوق أحكيلي باهي شن القصه
ماهر: مافيش من قصة وحده شغلت عقلي من أول مره شفتها
و بعد شفتها ثاني مره طحت فيها و حبيتها و خلاص لا هي تعرف
ولا حد ثاني يعرف أنت أول واحد يعرف بــ القصه هذي
نبيل: باهي من هي البنت هذي
ماهر: ريناد
نبيل بــ ستغراب: ريناد من
ماهر: ريناد أخت رزان
نبيل فنص أعيونه ابــ صدمه
ماهر: كنك بسم الله
نبيل قعد ساكت
ماهر: تي شن في احكي البنت فيها حاجه
نبيل: لا مافيها شي غير عصام اليوم يحكي علي الصغيره
و أنت حكيت فــ الثانيه هكي انصدمة من الصدفه
ماهر: كيف مافهمتش
نبيل: عصام اليوم حكى مع باتي عشان يخطب أخت رزان
الصغيره ردينه
ماهر: ماشالله ماشالله ع بركه انشالله
نبيل: سلمك بس قولي عليش ما قلت الأمك عليها
ماهر: أنت عارف يا نبيل الصبايا تو اتقوللها متزوجه و مطلقه
من قبل تقعد اتقولي أنت شن ناقصك عشان تاخذ مطلقه و كلام
كيف هــ الكلام
نبيل: بس البنت أصغيره أصغر منك و ما اطلقت هكي
و خلاص يعني العيب كان في راجلها
ماهر: عارف يا راجل عارف بس أنت عارف الصبايا
و تفكيرهن كيف
نبيل: باهي غير اسمعني شن رايك توا اتروح تحكي
امعاها و قوللها تمشي اتشوف البنت و تحكي امعاها
و مع أمها و لو عجبتها خلاص أنكلم باتي و جدي و بعد يمشو
يطلبو ردينه يطلبولك ريناد بــ المره
ماهر: تي أمي أول ما تسمع أنها مطلقه ح ادير نهارات
و مش ح تابى تمشيلهم
نبيل: أسمعني عندي فكره عديلها و قوللها البسي نبي انشيلك
المشوار و شيلها الحوش أهل ريناد و قوللها فــ سيارة كل حاجه
و هي ح تظطر تنزل خصباً عنها و صدقني مرات تنزل و تحكي
امعاها تعجبها و اتغير رايها
ماهر: نبيل أنت مش عارف أمي تحسابني هكي زريتها
تي واللهي ما ح تابى تنزل
نبيل: تبى تنزل بعد اتقوللها يا تنزلي اتشوفي البنت هذي
يا مانيش واخذ غيرها
ماهر سكت
نبيل: اسمعني أنت مش ح تعصيها ولا تكسر كلمتها
بس هكي زرها بيش تنزل و اتشوف البنت غصباً عنها
مرات اتغير رايها بعد اتشوفها
ماهر: و كان ما غيرت رايها
نبيل: توا أنت عليش سابق الأحداث صبي شيلها وبعدين
انشوفو شن ايصير
ماهر بــ ستغراب: انشيلها توا
نبيل: تي اهاا صبي حتى رزان قاعده غادي عشان تحكي
الهلها يعني بــ المره خلي أمك تمشي تلقاهم كلهم قاعدين
ماهر: بس ...
نبيل: بلا بس هيا صبي فيسع خير ما ايجي غيرك و يحكي فيها
ماهر ابــ عصبيه: غير عينك شن غيري
نبيل يضحك: صبي صبي
ماهر صبى: تو انقولك شن ايصير
نبيل: تم نرجى فيك
ماهر: تم

و ركب ماهر سيارته و عدى شور حوشهم
(يالي يسأل كيف بات نبيل و جده هما يالي ح يطلبو
ريناد الــ ماهر طبعاً ماهر ما عنده عمام لا خوال
باته كان وحيد هله و خواله مش في نفس المدينه
فــ هذا عليش سالم و فتح الله هما يالي ح يطلبوله)

بعد نص ساعه وصل و نزل خش للحوش لقى أمه
امقعمزه فــ صاله و اتعشي فــ أعيال خوه
ماهر: أمي
هنيه: بسم الله كنك فجعتني
ماهر: صبي البسي ع سريع
هنيه: هيييي الستر شن نلبس
ماهر: أنتِ صبي البسي بس عندي مشوار ضروري
هنيه: باهي و اعيال خوك وين انخليهم
ماهر: غير صبي تو انحطوهم عند ورده(جارتهم)
هنيه صبت: أستغفر الله منك مش عارفه شن يالي في راسك بس
و خشت هنيه للدار بدلة دبشها و طلعت هي و ماهر حطو العيال
عند جارتهم و عدو شور حوش أهل ريناد
هنيه: ماهر وين شايلني في هــ الليل
ماهر: تو اتشوفي يا أمي مشوار بسيط
هنيه: باهي أقل شي قولي وين بيش نعرف راسي من كرعيا
ماهر: وااااااااو عليك يا أمي وسعي بالك كلها ساعه و تعرفي
هنيه ابــ عصبيه: أستغفرالله ياربي العظيم عليك ليلة هي
ماهر يضحك ابــ صوت واطي: مزلتي ما شفتي منها شي الليلة
هنيه: نعم
ماهر ابــ خوف: لا شي نحكي ابــ روحي
و سكت ماهر و كمل طريقه
بعد ادعاك دام ساعه و نص وصلو الحوش أهل ريناد و درسو
هنيه بــ ستغراب: وين جايبني أنت
ماهر: أمي نبي نحكيلك و ياريت تسمعيني أكويس
هنيه بــ ستغراب: احكي شن في وين جايبنا
ماهر: أمي ..........
هنيه😠😠

يتبع...
أودي الفرجاني##