مغرورتي

الحلقه الخامسه...(5)
نبيل: أنا أستاذكم الجديد بدل أستاذ محمد أسمي نبيل أفلان
تخصص أقتصاد و ح نعطيكم مادة المحاسبة
رزان كانت امطبسه راسها و أتراجع فــ شيت لأنها خافة
الأستاذ يسأل و أول ما قعد نبيل يحكي خاصتاً بعد حكى ابــ صوت
عالي حست روحها سامعه الصوت هذا اكوييييييس
و رفعت رزان راسها عشان اتشوف للــ أستاذ
رزان مصدومه
سندس: كنك
رزان ابــ صدمه: كنها القاعه مليانه هكي نين الأستاذ مش باين
سندس: لأن خشينا متأخر فــ كلهم خذو الكراسي يالي فــ البداية
رزان ابــ نص عين: من يالي خششنا متأخر
سندس و أرياف اقعداً يضحكاً
نبيل: فــ ياريت تلتزمو الهدوء و أنا نشرح و فكوني
من الدوه الجانبيه و يالي مش حاب يحضر المحاضره ايتفضل
يطلع من توا مافيش داعي للأحراج
و طلع نبيل الشيتات و الخطاطات
نبيل: نبدى
كلهم: اهاا تفضل
و بدى نبيل يشرح و كلهم أذان صاغيه
........
عند سالم
وصل عند باته نزل سلم عليه و قعمز ايهدرز امعاه
سالم: كيف حالك اليوم يا باتي
فتح الله: تمام الحمدالله القني قعدت أحسن بعد شفت
مرعي و تلاقيت أمعاه
سالم يضحك: عاد رفيق العمر عمي مرعي
فتح الله: أكيده هذا أخ العمر
سالم: ربي ايدوم المحبةة بينكم انشالله
فتح الله: انشالله
سالم: أمتى نعزموهم يا باتي
فتح الله: بعد بكره كان ايناسبكم
سالم: عادي ما عندك مشكله بكل
فتح الله: خلاص كلمهم قوللهم بعد بكره عازمينكم ع عشاء
سالم: خلاص تو انكلم خليل بعدين
فتح الله: بعد خطرها نبي نسألك
سالم: نعم يا باتي
فتح الله: هو خليل عنده بنات
سالم: اهاا علي حسب علمي عنده 4
فتح الله: متزوجات
سالم: أخر معلوماتي أنها وحده بس يالي مزوجه
لكن الفترة يالي فاتت زوج أخر ولا لا الله أعلم
فتح الله: اهاا
سالم: عليش كنك
فتح الله: القنه نبي أناسبهم و النسب هذا كان خاطري
فيه من زمان لما كنا نبو نعطو بناتنا البعضنا لكن النصيب
ما قسم أمعاكم لا أنت في بنتهم ولا هما في بنتنا
سالم بــ ستغراب: أتناسبهم بــ من
فتح الله: القنه كان بناته مزلاً قعدات ناخوذ وحده منهن الــ نبيل
سالم اصدمه كلام باته و سكت
فتح الله بحت فيه: كنك في حاجه
سالم: آه لالا شي
فتح الله: اسأل نبيل كان ما في , في باله وحده معينه
و كان وافق نخطبله وحده من بنات خليل انتوكلو
على الله نبيل خلاص كبير ماهوش أصغير
سالم: باهي يا باتي يالي تبيها حاضر
فتح الله: معناها اليوم أفتح امعاه الموضوع
سالم: باهي حاضر توا تبي حاجه
فتح الله: لالا سلامتك المهم راك تنسى اتكلم خليل
سالم: لالا أنشاء الله مش ح ننسى
و صبى سالم طلع و هو ايفكر شن ح ايقول الــ مسعوده
يالي كانت عجبتها شيماء و طايرة بيها
........
عند أهل رزان
رابحه كانت فــ المطبخ علي خشت سفيان
سفيان: صباحك سمح يا حاجه
رابحه: صباح النور يمي
سفيان: كيف وين البنات يالي قاعده ابروحك
رابحه: رزان فــ جامعه و ردينه فــ المعهد و ريناد راقده
سفيان: كيف ريناد ما عندها جامعه
رابحه: لالا اليوم عطلتها
سفيان: اهاا شن الغداء
رابحه: واللهي ماني عارفه بعد عيت عمك اليوم
جيين متغديين عندنا
سفيان أعيونه أقلوب: أحلفي
رابحه: شن اتحق فيا نكذب عليك
سفيان انحرج: احم لا حشاك
رابحه: وبعدين عليش أحلفي
سفيان: لا شي غير تفاجأة
رابحه ابــ رفعة حاجب: وعليش تفاجأة
سفيان قعد ايحك في راسه: شي ليا زمان علي أعيال عمي
رابحه: اهااااا أعيال عمك
سفيان حب ايغير الموضوع لأن أنحرج فطن أن أمه فطنت للوضع
سفيان: أحم باهي ماتبي شي من السوق
رابحه: لالا باتك جابلي كل حاجه اهاا بعد خطرها
قالك باتك بيش الساعة 10 أتروح بــ البنات من الجامعه
سفيان: أين بنات هي رزان بس و ريناد قلتيلي مامشت
رابحه: رزان و أرياف
سفيان: اهاا اوكي انسيتها بكل
رابحه: عدي اغسل و بدل علي ما حطيتلك الفطور
سفيان: باهي تم
و طلع سفيان شور الحمام(حشاكم) و رابحه دارتله فطور بدت
أدير فــ الغداء
.........
عند ريناد
كانت راقده وعت علي حس فونها
ريناد ابــ صوت ناعس: ايوا
مؤيد: شمسك عاليه
ريناد: صباح النور
مؤيد: وينك اليوم
ريناد: كيف ويني
مؤيد: قصدي كنك ما جيتي للجامعه
ريناد: انت عارف اليوم عطلتي وبعدين أنت مش وقفت
قيدك شن شيلك للجامعه
مؤيد: جاي ع ساس أنشوفك
ريناد: مش مشكله بكره تو انتلاقو
مؤيد: ريناد
ريناد: نعم
مؤيد: كنك متغيره عليا
ريناد: كيف متغيره عليك
مؤيد: يعني معش اترني عليا كيف قبل ولا ادزيلي في رسائل
و لا تحكي امعايا بــ رومنسيه ولا عاد اتقوليلي في كلام سمح
ريناد:لا تهيالك أنا مزلت كيف قبل ما تغيرت
مؤيد: باهي نبي أنشوفك رآيفت عليك ما نقدر نصبر عند بكره
ريناد جت تبي اتقوله ايجيها عند باب الحوش و هي تطلعله لكن
أذكرت كلام رزان
ريناد: أصبر لعند بكره
علي خشت رابحه
رابحه: ريناد هيا نوضي ساعديني فــ الغداء عيت عمك
جايين ايتغدو عندنا
ريناد: هيا جايه
رابحه اطلعت و سكرت الباب
ريناد: توا نبي انسكر
مؤيد: باهي تمام بعد تفضي دريلي رنة
ريناد: انشالله خير
مؤيد جا يبي يحكي ريناد سكرت عليه
ريناد: هييييييي حسه كان يبي يحكي حاجه حي عليا
كنها معاملتي رايحه هكي واللهي بعدين ح ايهزبني
علي وجي عشان سكرت عليه
و جت ريناد تبي أترد اترن عليه جتها رساله
ريناد: هيييييييي حي عليا أكيده رساله مليانه هزايب
و افتحت ريناد الرساله و صدمها محتواها
مؤيد( أنحبك يا سمحةة رد بالك اطولي عليا)
ريناد افتحت أعيونها عشرة عشرة
ريناد: حي عليهم حي سبحان مغير الأحوال عمره ما دزلي رساله
فيها كلام حلو ولا عمره دزلي أنحبك و توا بعد سكرت عليه
و هو مزال يحكي حق شن دزلي القنك أستاذه يا رزان
رابحه اتعيط: يا ريناد هيا يا بنت الشغل عند فوق راسي
ريناد ابــ صوت عالي: هيا يا ماما جايه جايه
وصبت ريناد غسلت وجها و فطرت و بدت أتساعد في أمها
........
مشى الوقت
وطلعت رزان و صحباتها من المحاضره
و برضو نبيل طلع و طول روح شور حوشهم
و رزان رنت علي سفيان و قاللها أن أشوية و ايكون عندهن
بس رزان و نبيل ما شافو بعضهم
........
عند أهل نبيل
مسعوده كانت أدير فــ الغداء علي خشت سالم
سالم: السلام عليكم
مسعوده: و عليكم السلام
سالم: نبيل روح
مسعوده: لالا مزال شن صار حكيت مع عمي علي زواج نبيل
سالم: لالا
مسعوده: هييييي و عليش ما حكيتله
سالم: تعالي خلينا انقعمزو و تو نحكيلك
مسعوده: كنك شن في
سالم: غير تعالي بس
و طلع سالم و مسعوده برا الصاله و قعمزو
مسعوده: احكيلي كنك
سالم: جيت نبي نحكي الباتي لكن هو فتح الموضوع قبلي و قالي .......
و حكالها سالم كل يالي صار
مسعوده: نعممممممممم أنت فيش تحكي كيف يعني باتك
يبي ايزوج نبيل وحده من بنات صاحبه
سالم: مش بناته حفيدات صاحبه
مسعوده ابــ عصبيه: سوا بناته سوا حفيداته هنا الأثنين
نفس الشي يعني هو يالي ح يختار عروس نبيل
سالم: استهدي بالله يا وليه
مسعوده: لا إله الا الله محمد رسول الله كيف الكلام هذا
و اللهي ما ايصير منه كيف اولدي يالي طول عمري نحلم
أني انزوجه و نختارله عروسته ايجي باتك و ايخرب كل حاجه
سالم: باهي أنا شن نبي أندير باتي ما نقدر انردله طلب أنتِ عارفه
مسعوده: كيف هو اولدك لعبة في يد باتك ولا لعبة في يدي
كل مره واحد قايل راي
سالم: نبيل ما عليك فيه تو أنا نحكي أمعاه و بعدين هو
ايحب جده و مش ح يرفض طلبه
مسعوده: باهي بالك البنت يالي اختارها باتك ما عجبتني
كيف ايصير
سالم: أنتِ غير استهدي بالله هما بكره جايين ايتعشو عندنا
و هو عنده 3 بنات شوفيهن و أنتِ يالي ح تختاري منهن يالي تعجبك
مسعوده: اووووووووف عليك هم وحق المصحف
و صبت مسعوده و ردت للمطبخ أما سالم سمع نبيل جا طلعله
سالم: نبيل
نبيل خش و سكر باب الحوش
نبيل: ايوا باتي
سالم: تعال نبيك
نبيل جاه ابــ سرعه: كنك انشالله خير في حاجه
أمي فيها حاجه ولا جدي صارتله حاجه
سالم: لالا ما في شي نبيك في موضوع ضروري
نبيل: باهي تعال
و طلعو قعمزو فــ الجنان ع كراسي
سالم: نبي نحكيلك موضوع ممكن تضايق من كثرة ما حكينا فيه
لكن الله غالب لازم نحكو فيه
نبيل: احكي يا باتي شن في واللهي خوفتني
سالم: جدك قال .... وسكت
نبيل: كنه جدي شن قال تي احكي يا باتي شغلتني
سالم: جدك قال ........

يتبع....
أودي الفرجاني##
شن ح اتكون ردت فعل نبيل بعد يسمع أن جده يبي يختارله
وحده من بنات صاحبة و اهاا صااح العيلتين البكره مجتميعن
ع عشاء أزعما شن ح اتكون ردت فعل نبيل و رزان لما
ايتلاقو و هل ح يذكرو بعضهم و زعما مسعوده من ح تختار
من بنات خليل تخايلو أتكون رزان و لو كانت رزان هي العروس
المختارة هل ح اتوافق بعد تعرف أن العريس نبيل و هل نبيل
ح ايوافق بعد يعرف أن العروس رزان باهي سفيان
ليش فرح لما سمع عيت عمه جيين ازعما شن الحاجه يالي خلاته
يفرح أرياف ازعما ح أتحب سفيان ولا غير فترة و اتعدي
هذا كلا ح نعرفوه في الحلقة الجايه كونواْ فــ الأنتظار
💙💙💙💙💙