مغرورتي

#يالي يسأل ع حلقه الأخيرة ح اتكون الــ حلقه 40
و ياريت محد ايقولي ع الحلقه أقصيرة لأنِ
امرتبه كل حلقه بــ أحداثها يعني لا نقدر انزيد
لا انقص .😇🌸💙
_______
الحلقه الخامسه و الثلاثون...(35)
هنيه ابــ عصبيه: أستغفرالله ياربي العظيم عليك ليلة هي
ماهر يضحك ابــ صوت واطي: مزلتي ما شفتي منها شي الليلة
هنيه: نعم
ماهر ابــ خوف: لا شي نحكي ابــ روحي
و سكت ماهر و كمل طريقه
بعد ادعاك دام ساعه و نص وصلو الحوش أهل ريناد و درسو
هنيه بــ ستغراب: وين جايبني أنت
ماهر: أمي نبي نحكيلك و ياريت تسمعيني أكويس
هنيه بــ ستغراب: احكي شن في وين جايبنا
ماهر: أمي أنتِ مش تبيني نزوج
هنيه: اهاا نبيك تزوج
ماهر: خلاص أتشفي فيه الحوش هذا
و شير علي حوش أهل ريناد
هنيه بحتت فـ الحوش: اهاا شفته كنه
ماهر: توا تنزلي و اتسلمي علي أهل الحوش
و اتقوليلهم أولدي صاحب نسيبكم نبيل
هنيه بــ ستغراب: اوباهي
ماهر: و تسألي على بنتهم أسمها ريناد اتشوفيها
و تحكي امعاها لأنها عجبتني و نبي نخطبها
يعني ح تقعد كنتك يا أمي
هنيه بــ اعصبيه: شنو يالي درته أنت يا ماهر
يعني تبي اتحطني في الأمر الواقع
ماهر: أمي أسمعي من الأخير و بلا كثرة دوه أنا يا البنت
هذي يا مانيش مزوج لو تطبق السماء ع وطى
هنيه ابــ عصبيه: نعمممممممم شن قلت
ماهر: زي ما سمعتي يا أمي القني نبيها و رايدها
هنيه: للدرجه هذي غسلتلك مخك و امخليتك تنقلب عليا
ماهر: و ربي الكعبه و عزته و جلالته أن البنت ما تندري عليا
ولا تعرف أنِ أنحبها ونبيها
هنيه: اسمعني يا تحكيلي القصه من أولها و اتفهمني
شن الخليطه يالي أنت حطيتني فيها يا أما روح بيا للحوش
ماهر: باهي تو نحكيلك أسمعيني أول مره ...........
هنيه فنصت أعيونها: مطلقه و كانت حامل أخرى
ماهر: واللهي يا أمي البنت ما عندها ذنب في شي
راجلها كان مريض نفسي و ايتعاطى و مش طبيعي
يعني هي مش ذنبها حرآم واللهي لو اتشوفيها كيف الملاك
ملامحها و هدوءها بنت ناعمه والله
هنيه اقعدت اتبحت فيه ابــ رفعة حاجب
ماهر يضحك: كنك اتبحتي هكي
هنيه: لا شي
ماهر: أمي أنتِ عارفه أنا شن عندي من مسؤوليه
أعيال خويا عاتق علي ارقبتي يتامى يبي من يهتم بيهم
يعني مش اي وليه ح اتوافق عليا
هنيه: مش محتاجه الحد العيال انا انربيهم
ماهر: أمي أنتِ مش دايمتيلهم بعد عمر طويل يعني
يبو وليه تشقى بيهم
هنيه اشهقت: هيييييييييييييييييي اتفاول عليا يا ماهر
ماهر: تي كنك اتبلي عليا يا أمي من تفاول عليك
قتلك بعد عمر طويل كيف ما سمعتنيش
هنيه اسكتت
ماهر: أمي الله يسترك أنا عشت طول عمري انعاني
و خلاص يعني بعد موتت باتي و زواج خويا أنا مسكت
مسؤولية الحوش و بعد توفى خويا و مراته أنا يالي
مسكت مسؤولية اعيالهم اليتامى و قعدت نشتغل ليل
نهار عشانهم و عشان ما ينقص عليهم شي يعني اخسارة
فيا نفرح مره وحده و ناخذ البنت يالي انحبها
هنيه ساكته
ماهر: أمي ردي عليا اخسارة فيا
هنيه: باهي خلاص خلاص سكر فمك
ماهر ابـ فرحه: يعني ح تنزلي
هنيه: جايب حاجه انخش بيها للعرب
ماهر: اهاا اهو جايب عصير و بكلاوة
هنيه فتحت الباب و نزلت و ماهر مدلها الحاجات
و هي دقت ع باب و خشت و ماهر قعد يستنى فــ سيارة
علي نااااااااااااار
............
عند رزان
كانت عند هلها و حكت لِــ أمها و سفيان علي عصام
و سفيان قال أن أحسن نسب و ما يلقو خير من عصام
الــ ردينه و طلع عصام عند جده عشان ايقوله ع القصه
و رابحه طلعت برا الجنان اقعدت اتصلي فــ العشاء
رزان: يا كلبه يا ردينه ليش ما قلتيلي علي علاقة مع عصام
ردينه ابــ خوف: واللهي خفت أنقولك اتهزبيني
رزان: خزي اليوم قعدت كيف الهبله لما حكى عصام
ريناد: نا عليا قوليلنا شن قال و شن صار
رزان اقعدت تحكي للبنات شن قال عصام و كبف صار
و بعد أشوية سمعاً حس أمهن تحكي مع وحده و اتأهل و اتسهل
و خشاً للمربوعه
رزان بــ ستغراب: من حسه جا
ردينه و ريناد بــ ستغراب: مش عارف حس وليه
............
عند رابحه
كانت اتصلي كملت صلاتها قعمزة اقعدت تستغفر
علي دقت باب الحوش صبت تفتح فيه
رابحه: هيا هي
و عدت شور الباب فتحت لقتها هنيه
هنيه: السلام عليكم
رابحه: وعليكم السلام تفضلي من تبي
هنيه: مش حوش المرحوم خليل افلان
رابحه بــ ستغراب: اهاا اوصلتي تفضلي خشي
و خشت هنيه استقبلتها رابحه جوا المربوعه
خشاً و قعمزاً مع بعضهن
رابحه: اهلاً و سهلاً
هنيه: اهلين بيك أنا أسمي هنيه افلان
رابحه: مرحبتين أشرفنا بس ابــ سلامتك واللهي ما عرفتك
هنيه: مش أنتم نسيبكم نبيل افلان
رابحه: اهاا نبيل واخذ بنتي الوسطانيه رزان
هنيه: اهاا أنا نقعد أم صاحبه ماهر
رابحه: اهاا مرحبتين بيك
هنيه: الحقيقه و من الأخر اولدي شايغ ابنيتكم
و رايدها و أنا القني رفضت
رابحه بــ ستغراب: كيف ما فهمتش
هنيه: ماهر اوليدي الوحيد و ماعندي غيره بعد موتت
خيه هو و مراته في حادث ما قعدلي غير ماهر و اعيال
اولدي المتوفي و القني قلت ازوج ماهر نفرح بيه و كنت
نبيله أبنيه عجبتني جارت وحده صاحبتي لكن هو جابني
هنا و قال عجبتني بنتهم كان صدقني الله أسمها ريناد
رابحه: اهاا ريناد
هنيه: ايوا حكالي عليها و قالي أن يبيها و رايدها
بس هي مطلقه و كانت حامل و أنا بعد علمت الكلام هذا
رفضت و قتله لا
رابحه اقعدت اتبحت فيها و ساكته
هنيه: أنتِ أم ليبية كيفي كيفك يعني عارفه و حاسه أن يقعد
عندك عيل و تبي تفرحي فيه و مش ناقصه شي عشان تخذيله
وحده مطلقه أكيده أنتِ حاسه بيا
رابحه: توا أنا عندي سؤال أنتِ جايه تبي تخطبي ولا جايه
عشان اتقوليلي أنك ماتبيش تاخذي بنتي الــ ولدك و اتروحي
هنيه: لا آسفه فهمتني غلط أنا جيت عشان انشوف البنيه
و نحكي امعاها و انقوللها علي ظروفنا و ظروف اولدي
رابحه: معناها عليش الكلام هذا كلا
هنيه: يعني أنا نبي انوضحلك أن نبي انشوف البنت
و نحكي امعاها انشوف عقليتها و كلامها مرات تعجبني
و انغير رايي
رابحه: شوفي يا هنيه هنا كلمتين بنتي مش زايده عليا
عشان نعطيها لِــ ولد وحده جايه اتقولي ما ناخذش الــ اولدي
وحده مطلقه فــ نهاية أنا امربيه بنتي احسن تربيه و برضو باتها
رباها أحسن تربيه و صدقيني لو المرحوم كان عايش ما كان
سمحلك تقعدي و تكملي كلامك
هنيه: سامحيني ما كنت نقصد كيف ما أنتِ فهمتي
رابحه: سوا كنتي تقصدي ولا ما كنتي تقصدي المعنى و فهمته
خلاص و بنتي مش للزواج انشالله تلقي الــ ولدك عروس كيف
ما تبي أنتِ و اهم حاجه مش مطلقه و مش حامل من قبل
هنيه: يا خيتي واللهي ما تزعلي مني راني وليه فقدت اولدي و هو
في عز شبابه
رابحه بحتت في هنيه يالي صوتها تغير و بدو ادموعها ينزلو
هنيه: أنا جبت عيلين و ربيتهم كل شبر ابــ نذر و بعد كبرو
زوجة الكبير و فرحت بيه أنا وباته و جوه أبنيه و أوليد
و ياما فرحت بيهم كنتي كانت كيف أبنيتي كانت اتعاني
فيا كان أمها بعد نمرض لا عمرها اتففت مني ولا لوة
وجها عليا ولا عمرها زعلتني ابــ حاجه توفى راجلي
و انقهرت عليه و ماهر هو يالي مسك مسؤولية الحوش
لأن خوه كان برضو عنده حوش و مهتم بيه و في يوم
كان عيد زواج اوليدي جاني وقالي يا أمي بكره عيد زواجي
أنا و مها و نبي ناخذها انسفرها و انغيرو جو
قتله عدي يا اولدي طريقك بيضه بس العويله خليهم امعايا
خلي مها مسكينه اتريح و اتغيرو جو بلا هرجه و اتردو أيام
الخوالي ضحك و قالي يعني مش ح تضايقي قتله لا وراسك
الغالي أعيالك في أعيوني و ما نضايقك منهم و هذي كانت أخر
ضحكه و ابتسامه أنشوفهن من اوليدي خذى مراته و عدى
و فــ ليل جتني غصه في قلبي نضت توضيت و قلت انصلي
كم ركعه بالك انتريح و انا انصلي سمعت ماهر امعلي السبيكار
و يحكي بـ الفون و سمعت حد ايقوله خوك و مراته في ذمة الله
يا نا عليييييييييي يا خيتي عليك ليلة كانت يا نا عليييييا انشالله
ما اتجربيها يا خيتي
و اقعدت هنيه تبكي
رابحه خنقتها العبره و قدمت علي هنيه و اقعدت اتهدي فيها
هنيه تبكي: نبي نفرح بــ اوليدي يالي قاعد نبيله المراه الزينه الكويسه
يالي اتريحه و اتريحني عليه واللهي لما حكيت هكي ما قصدي حاجه
أنا ما نعرفكم لا نعرف أبنيتك لكن قلت هكي عشان اوليدي
رابحه: خلاص يا خيتي أهدي أهدي
و اقعدت رابحه اتناد
رابحه ابــ صوت عالي: ريناد يا ريناد جيبي طاسة أميه
ريناد ابــ صوت عالي: هيا هي جايه يا ماما
و جابت ريناد طاسة الميه و جت ابــ سرعه
ريناد دقت علي باب المربوعه و خشت
ريناد: السلام عليكم
هنيه تمسح في ادموعها: وعليكم السلام
رابحه شيرتلها يعني عطيها الميه
ريناد شيرت عليها بــ ستغراب يعني منو
رابحه فنصت فيها يعني اسكتي
ريناد قدمت شور هنيه
ريناد: تفضلي يا اعميمه
هنيه رفعت راسها بحتت فيها و خذت منها الميه
هنيه اقريب تاكلها بـ أعيونها: سلم يدك
ريناد: سلمك
رابحه: تعالي قعمزي
ريناد: نعم
رابحه: تعالي قعمزي هنيه تبي تحكي امعاك
ريناد كانت مستغربه يالي قاعد ايصير و جت قعمزت
جنب هنيه و رابحه صبت طلعت برا عند رزان و ردينه
...........
عند رزان
كانت هي و ردينه امصبيات جنب الباب الوسطي
علي جيت أمهن
رزان: ماما من الويله هذي
رابحه: تعالاً جوا
و خشت رابحه و في جرتها رزان و ردينه
قعمزاً و حكتلهن رابحه القصه
رزان: توا كيف يبي ايصير
رابحه: مش عارفه هي توا قاعده تحكي هيا وياها
ردينه: بس ما اعتقد ريناد اتوافق لأنها مزالت متأثره بــ يالي صار
رزان: لالا انشالله ح اتوافق
رباحه: كيف تبي اتوافق
رزان: توا غلونا انخشو امعاهن جوا و انشوفو
شن ح ايصير و بعدين ساهل
رابحه و ردينه: باهي تمام
و صباً عداً للمربوعه و قعمزاً مع هنيه و ريناد
طبعاً هنيه اقعدت تحكي مع ريناد بدون ما اتقوللها اي شي
علي موضوع الخطبه هنيه انصدمة بكل من ريناد
لأنها ما توقعتها اتكون هكي جميلة و أصغيرة و راقيه
و أسلوبها حلو و الحمدالله هنيه عجبتها ريناد بككككككككل
و قررت أنها تخطبها الــ ماهر و بعد اشوية
هنيه مع ابتسامه: ماشالله علي ابنياتك ربي يحفظهن
رابحه: سلمك ياربي
ريناد كانت مزالت مش فاهمه من هي هنيه و شن تبي
كانت اتهدرز امعاها و مش فاهمه شي
هنيه: ريناد
ريناد بحتت فيها بــ ستغراب امتاع كيف عرفت أسمي
هنيه: أكيده أنتِ مستغربه من أنا وليش جايه وكيف نحكي امعاك
المهم أنا نقعد أم ماهر صاحب نبيل
ريناد اقعدت ساكته أشوية وبعدها: اهاا اوكي عرفته هذا يالي
شالني للمستشفى
هنيه: اييييييييوا هو هذ أنا أمه أسمي هنيه
ريناد: أشرفت بيك يا اعميمه
هنيه: سلمك نبي نحكي أمعاك في الموضوع يالي أنا جايه عشانه
ريناد: أكيد احكي تفضلي
هنيه: ماهر أوليدي الوحيد و ........
و حكتلها هنيه قصتها وقصة أعيالها و كيف مات ولدها
و عاودتلها كل الكلام يالي قلاته الــ رابحه
هنيه: وكيف ما قتلك أنا نبي ناخذ الــ وليدي وحده اتهنيني عليه
و القنه اولدي جابني هنا و قالي عندهم بنتهم شفتها مره و قعدت
24 ساعه و انا انفكر فيها و ثاني مره شفتها عرفت روحي انحبها
و قالي انزلي احكيلي فيها
ريناد بــ ستغراب: من
هنيه: أنتِ
ريناد ابــ صدمه: أنـــا
هنيه: اهاا يا ريناد ماهر اوليدي ايحبك و يبيك اتكوني
مراته اليوم قبل بكره
ريناد: هو إيحبني أنا
هنيه: اهاا واللهي ايحبك و تعرفي شن قالي , قالي
يا هي يا مانيش متزوج بكل
ريناد اقعدت مصدومه و ساكته و مزالت مش مستوعبه
كلام هنيه الها
هنيه: ماهر حكالي ع يالي صار امعاك و عارفه يالي صار
مش ساهل لكن واللهي لو أزوجتي ماهر مش ح تندمي
ح اينسيك كل يالي عشتيه من قبل صح ماهر ما عنده افلوس
و لا حوش كبير لكن عنده قلب أطيب منه مافيش و حنية
العالم كلها فيه مش اتقولي اولدي و نشكر فيه لا واللهي
هذا الحق صدقيني يا بنتي أنا ما كنت مقتنعه أبداً أن ناخذ
أي وحده الــ اولدي و ما تعتبريها إهانه لكِ لكن كنت انقول
مستحيل ناخذ وحده مطلقه الــ ولدي لكن بعد شفتك و حكيت امعاك
غيرت رايي بكككككل أنتِ أبنيه اصغيره و احليوه و هاديه أسلوبك
حلو و محترمه ممكن اتقولي كيف عرفت هذا كلا في خمس دقايق
بس أنا ياما عشت و ياما شفت نعرف الناس من أول نظره
و أنتِ القنك خشيتي قلبي
ريناد اقعدت ساكته
هنيه: ها شن قلتي اموافقه انجيبو رجاله و أنتقدمو رسمي
ريناد مزالت ساكته
رابحه: ريناد ردي علي الوليه تسأل فيك
ريناد صبت: تسلمي علي كل الكلام الحلو يالي قلتيه عليا
لكن أنا آسفه لأنِ امطلعه موضوع الزواج من راسي
و مش امفكره فيه أبداً
هنيه: بس اولدي ايحبك
ريناد: أنا آسفه والله و ماهر ربي يرزقه بــ بنت الحلال
يالي اتحبه و ايحبها
هنيه جت تبي تحكي ريناد برمت وطلعت من المربوعه
رزان: ردينه عدي في جرتها
ردينه: باه
و صبت ردينه ابـ سرعه في جرت ريناد
رزان صبت شور هنيه و قعمزت جنبها
رزان: عمتي معلش سامحينا ع يالي صار بس أنتِ عارفه
ريناد بيش مرت أكيده عرفتي أن ردت فعلها طبيعيه
هنيه: لا عادي يا بنتي مش زاعله بس واللهي اولدي مش ح ايكون
كيف راجلها الأولي واللهي ح ايريحها و كان ازعلت منِ أنا
ع كلام يالي قلته واللهي ما نقصد كنت نبي انحطها فــ الصوره
و إن انفهمها كيف كان رايي من قبل و كيف بعد شفتها و حكيت
امعاها تغير رايي أنا واللهي ما نقصد حاجه
رزان: لا يا عمتي أنتِ فهمتي غلط ريناد ما زعلت من كلامك
بس كيف ما قتلك هي مزالت متأثره بــ يالي صار من قبل
مع راجلها الأولي
هنيه: باهي يعني توا شن ايصير
رابحه: خليها اليوم نحكو امعاها و انحاولو نقنعوها
هنيه: ولو ما اقتنعت
رزان: انشالله خير يا عمتي و انشالله كل حاجه
ح تقعد تمام
هنيه صبت: انشالله ياربي هيا خليني نطلع توا
و بكره ايصير خير
و سلمت هنيه علي رزان و رابحه و عطتهم رقمها
و قالولها أن بكره ايكلموها و ايقولولها شن صار
و طلعت هنيه لقت ماهر يرجى فيها ركبت امعاه
و علقو شور الحوش
...........
عند رزان
خشت هي و أمها لقاً ردينه طالعه من الدار
و اتسكر فــ الباب
ردينه برمت و جت شور رابحه و رزان
رزان: شن صار
ردينه: ماتبيش تحكي و لزتني برا
رزان: خلاص خلوها ما اتزرو عليها انا بكره
انرد نحكي امعاها
رابحه: بس ...
رزان: ماما كيف ما قتلك خليها توا ما تضغطو عليها
بكره ايصير خير
و قعمزاً رزان و ردينه و رابحه برا الصاله و اقعداً يحكاً
...........
عند ماهر
ماهر: أمي أقريب نوصلو للحوش و أنتِ مزلتي ما حكيتي ولا كلمه
هنيه: وووووه عليا شن تبيني انقولك يعني خلاص البنت عجبتني
ماشالله عليها كلمت أمها و حكيت امعاها حتى هي لكن البنت
مزالت مش قابله فكرة الزواج من جديد قالولي ايحاولو يحكو امعاها
و يقنعوها و بكره ايردو عليا
ماهر درس السيارة: كيييييييف
هنيه: الستر كنك وقفت و بعدين شن انطرشت ما تسمع
كيف ما قتلك البنت مزالت مش متقبله فكرة الزواج من جديد
خلاص هلها يحكو امعاها و انشالله يقدرو يقنعوها
ماهر: تؤ عليك قصة باهي و كان رفضت
هنيه: أستغفر الله ماهر الله يسترك مش وقتك روح بيا للحوش
طولنا و العيال توا وقت نومهم هيا ولع السيارة و روح بينا
و كان علي ريناد انشالله هلها يقدرو يقنعوها و تقعد من نصيبك
ماهر غمتله و ولع السيارة و علق روح شور الحوش
..........
تسريع الأحداث
روح سالم من حوش باته و قال الــ مسعوده أن باته
وافق علي زواج عصام و قال أن بعد بكره يمشو يخطبو
البنت رسمي من خوتها و جدها
و طبعاً عصام من الفرحه مش امصدق
أما سفيان حتى هو جا من حوش جده و قال الــ أمه
أن جده فرح بعد علم أن عصام يبي يخطب ردينه
و قال أن مش ح يلقو راجل الــ ردينه كيف عصام
و برضو ردينه كانت مش عاطيه فرحتها الــ حد بذات
بعد كلمها عصام و قاللها أن بعد بكره ح ايجو يطلبوها رسمي
ماهر روح للحوش و كلم نبيل و حكاله يالي صار و نبيل
قاله أن ايضن بالله خير و أن بإذن الله ريناد ح اتوافق
و أنها ح اتكون من نصيبه
............
صباح يوم جديد
وعى ماهر بدري بحت فــ ساعه قلها الساعه 10
صبى طلع برا لقى أمه اتنقي فــ الرز
ماهر: صباح الخير
هنيه: صباح النور
ماهر قعمز جنب أمه و اتكى علي يده و قعد ايبحت فيها كيف
انتضف فــ الرز
هنيه سيبت الرز و اقعدت اتبحت فيه
ماهر بحت فيها: كنك اتبحتي بسم الله
هنيه: ماهر من الأخر شن يالي في عقلك قول يالي عندك
و عدي خطاني
ماهر: أمي
هنيه: ها نعم قول
ماهر: كلمي العرب
هنيه: هيييييييي الستر ياربي مزال صبح
ماهر: خلاص ما فيها من صبح أقريب القيله
و بعدين أكيده حكو امعاها من أمس
هنيه: ماهر سكر فمك و ردق وجك
ماهر قعمز علي حيله: تي كنك يا أمي
هنيه ابــ عصبيه: أثقل يا ماهر أثقل هذي من أولها
هكي معناها بعدين شنو أثقل بلاش خفه
ماهر صبى: عمرها ما جت منك تضحك أنتِ يا أمي
24 ساعه امسكرتيها في وجي
و طلع ماهر و سيبها
هنيه ابـ صوت عالي: نقعد مسكرتها في وجك
كان ما رنيت ع عرب الساعه 10 في عز الصبح
عدي خطاني كذا أستغفر الله ياربي العظيم
و ردت هنيه ادير فــ الرز
...........
عند رزان
وعت فــ الصبح خشت للحمام حشاكم غسلت وجها
وطلعت سمعت حس حد فــ المطبخ عدت شوره خشت
لقتها ريناد ادير في قهوه
رزان: صباج الخير
ريناد: صباح النور
رزان كرت الكرسي و قعمزة
رزان: أنتِ اكويسه
ريناد اتحرك فـ القهوه: اهاا اكويسه
و اقعداً الأثنين ساكتات
بعد اشوية طفت ريناد ع قهوه و خذت الفنجان صبتها
فيه و جابت الفنجان و جت كرت الكرسي و قعمزة امقابل
رزان و اقعدت تشرب بدون ما تحكي ولا كلمه
رزان: ليش درتي هكي أمس
ريناد حطت الفنجان و بحتت فيها
ريناد: معقوله هذا سؤال تسأليه ليا يا رزان
و أنتِ أكثر وحده عارفه يالي أنا مريت بيه
كيف تسأليني
رزان: بس يا قلبي مش كان تجربتك الأولى كانت فاشله
معناها تحكمي علي مستقبلك كلا هكي
ريناد: رزان
رزان: ريناد أسمعيني مؤيد ابتلاء من ربي و راح
وين تندري بالك ماهر ايكون العوض يالي رزقك بيه
ربي ونبي ما اتسكريها في وجك وخلي الراجل ايجي يخطب
و عطي روحك فرصه ديري امعاه مقابله و احكو مع بعضكم
خلي بيناتكم فترة خطبه و شوفي الراجل بالك .....
ريناد قاطعتها
ريناد ابــ صوت عالي و عصبيه: رزان خلاااااااااااص سكرو ع موضوع
معش حد يفتحه امعايا زواج مش متزوجه لا ماهر ولا غيره
أنا مانبيش نزوج خطوووووووووووني خلوني في حالي
معش حد ايرد يحكي في نفس الموضوع كان تبو تفتكو مني
قولوها ليا في وجي تو نمشي ننتحر بيش تفتكو مني
كلا اتزوجوني لااااااااا
رزان: ريناد شن الكلام يالي تحكي فيه هذا كنك أنتِ
ريناد: خطوني مالكمش دخل بيا مانبيش لا ننخطب لا نزوج
مانبيييييييش خلاص عاد مش بــ الغصب هي حتى لو كان ماهر
عوض من ربي أنا مانبيش
رزان ابــ عصبيه: ريناد هزبتي عيطتي اوكي من حقك
لكن اتفترشي كلام و تغلطي لا شنو حتى لو عوض من
ربي مانبيش ليش الكلام هذا حرام عليك ربي ايحاسبك
ريناد اقعدت تبكي: أنتم يالي حرآم عليكم واللهي أنتم يالي
حرآم عليكم أنا معش متحمله كلمة زواج مش متحمله أنرد
انعيش مع راجل فــ الحوش مش متحمله أنرد ننضرب و ننهان
مره ثانيه واللهي مش متحمله خلاص هي كلمه وحده يا اتخلوني
في حالي ومعش تفتحو امعايا سيرة الزواج يا و جلالة ربي
نقتل روحي نفتك من هــ العيشه
و طلعت ريناد من المطبخ و خشت للدار و سكرت الباب بــ القوة
علي طلعت سفيان و رابحه و ردينه من اديارهم من صوت عركة البنات
سفيان مفجوع: تي كنكم شن في
رزان: ما في شي ما في شي
رابحه: كيف ما في شي و أنتاً صوتاً واصل لعند جوا الدار
رزان طبست راسها: فتحت امعاها موضوع ماهر
رابحه: باهي شن صار
رزان: سكرت راسها و اقعدت اتعيط و قالتلي اتردو
تفتحو امعايا موضوع الزواج نقتل روحي
رابحه و ردينه: هيييييييييي
سفيان: خلاص و أنتو خلو البنت في حالها مش بــ الغصب هيا
كلمو العرب و قولولهم مافيش نصيب مافيش داعي اديرو مشاكل
رزان: ماما تبي الحق كلام سفيان صاح خلاص خلينا انكملو
عمي هنيه و نعتذرو منها و انقولولها مافيش داعي ايجو يطلبو
رسمي لأن ريناد امسكره راسها و أنتِ لو كان شفيتها كيف تحكي
و تبكي و اتهزب ابــ عصبيه كنتي فهمتي أن ريناد مستحيل اتوافق
على اي زواج في حياتها
ردينه: صح يا ماما خلاص خلونا انكلموها و انقولولها أن خلاص
مافيش نصيب خير ما ريناد ادير حاجه في روحها و نقعدو نادمين
طول عمرنا
سفيان: خلاص كلميها يا أمي و فكي هــ القصه هذ
رابحه: آآآآآآآآه باهي انشالله خير توا مزال بدري تو انكلمها بعدين
سفيان برم عدى الــ داره و رابحه و البنات عداً شور المطبخ ايديراً
فــ فطور
............
عند ماهر
كان امقعمز فــ داره و باله مشغول في ريناد
و هل ح اتوافق عليه ولا لا علي دقت باب الدار
ماهر: ها يا أمي
هنيه من ورا الباب: عصا انشالله تعال افطر يا خرا
ماهر ضحك: باهي حاضر آني جاي
و صبى ماهر طلع لقى أمه طاحه الفطور و تفطر هي
و اعيال خوه قعمز امعاهم و قعدو يفطرو و فجأة رن فون هنيه
هنيه: احميده صبي جيب نقالي
محمود صبى ابــ سرعه شور الفون جابه و عطاه الحنه
هنيه بحتت فــ الفون و بعدين بحتت في ماهر
هنيه: هذي رابحه
ماهر ابــ توتر: ردي ردي😟
و قدم ماهر شور أمه و هنيه زرت ع حضره و حطاته
علي وذنها
هنيه: ايوا
رابحه: ........

يتبع...
أودي الفرجاني##

يتبع ...
أودي الفرجاني##