A Princess Choice

Chapter 16

"I heard that the Ryu family is looking for you."

Para saan at hinahanap nila ako? Tahimik lang akong nakatingin sa mga mata ni Zeke para malaman ko kung nagsasabi ba siya ng totoo. Maimpluwensya ang pamilya Ryu, hindi naman sila magiging pangalawa sa pinakamakapangyarihang pamilya sa Japan kung hindi sila maimpluwensya. At para hanapin at kausapin ang lihim na prinsesa ng mga Asakura, malaking hakbang ito para sa kanila.

Hindi lahat ay nabibigyan ng pagkakataon para makita at makilala ang prinsesa ng mga Asakura. Hindi hinahayaan ng Lolo ko na may makaalam ng pagkatao ko. Kaunti lang ang nakakaalam, mas ligtas ang buhay ko sa mga panganib. Sa buong kasaysayan ng mga maharlika sa Japan, Lolo ko lang yata ang unang babali ng tradisyon na lalaki ang dapat magmana ng trono.

Sa kasamaang palad, ako ang napili niya na humalili sa pwesto niya sa oras na kailangan na niyang ipasa ito sa iba. Ang ama ko ang panganay niyang anak pero mas pinili niyang ako ang humalili sa kanya.

"Anong kailangan nila sa akin?" ito lang ang nasa isip ko habang nakatingin kay Zeke.

"Hindi ko alam ang detalye, pero iyan ang narinig ng mga tauhan ko. Patuloy lang sila sa paghahanap ng impormasyon na kailangan mo para sa nawawalang prinsipe."

Kahit papaano ay gumaan ang loob ko dahil sa sinabi ni Zeke.

Nanatili lang sa kwarto ko si Zeke. Tinanong ko siya kung nasaan si KC, ang sabi lang sa kanya ni KC ay may dadaanan lang daw siya bago umuwi rito sa mansion. Sinabihan niya raw ito na mag-uwi ng pasalubong para sa akin para hindi raw uminit ang ulo ko sa oras na hanapin ko siya kay Zeke.

Sinabi niya rin na dinala nila pauwi ang mga prutas na pinitas nila sa farm para raw sa akin. Baka raw maghanap na naman daw ako ng prutas. Sinabi ko sa kanya na tinatamad akong bumango para kumain ng hapunan.

Nang mag-isa na lang ako sa kwarto ay bumalik ang katahimikan na nararamdaman ko kanina. Dahil sa katahimikan ng paligid ko, bumalik din ang mga bagay na gumugulo sa isip ko.

Una na roon ang kasal na gusto ni Lolo. Kung tama ang kutob ko, kailangan kong mahanap ang nawawalang prinsipe ng mga Ryu para kausapin ito ng masinsinan. Wala akong pakialam kung mapahamak ako sa gagawin ko. Kaya ko naman ipagtanggol ang sarili ko. Kung madaan man sa pwersahan, kayang kaya ko silang labanan.

Pangalawa, kung paano ko mailalayo si Jenthrix sa magulo kong buhay? Masyado siyang inosente para sa akin. Inosente sa buhay na mayroon ako. Hindi ko hahayaang idamay siya ni Lolo oras na malaman niya na nagmahal ako ng hindi namin kagaya, na dugong bughaw.

At ang pinakahuli, ang kalagayan ko ngayon. Tanging si Christile lang ang nakakaalam ng tungkol dito dahil ayaw kong makarating ito sa mga magulang ko lalong lalo na kay Lolo. Pwede niya itong gawing dahilan para maituloy ang planong gusto niya para sa akin.

Napalingon ako sa may pintuan ng bigla itong magbukas. Pumasok mula roon si Zeke na may dalang tray ng pagkain. Napaupo ako mula sa pagkakahiga ko ng papalapit na siya sa pwesto ko.

"Alam kong hindi ka aalis dito sa kwarto mo kaya nagdala na lang ako ng pagkain at dito na rin ako kakain para may kasabay ka."

"Seriously? Fine." Tinulungan ko siyang ayusin ang mga dala niya sa mini table.

Habang kumakain kami ay kinuwento ko sa kanya ang planong ginawa ko kanina sa opisina. Nung una ay hindi niya maintindihan kung bakit ko naisip ang ganoong plano ngunit habang patuloy kong sinasabi sa kanya ang tungkol dito ay nauunawaan na niya ang gusto kong mangyari. Kakailanganin ko ang galing ni Zeke sa pagkuha ng impormasyon na kahit ang pinakamagaling na imbestigador ay hindi makukuha.

"Sasabihin mo ba kay KC?"

Hindi ko siya agad nasagot dahil may laman pa rin ang bibig ko. Hinintay niya lang ako matapos sa kinakain ko at saka ko siya sinagot.