#وجوه_مستعاره 👥 في الحلقه 15 ❤
وليد بحت في وائل بعد حكاله يلي صار بين باته وامه واصرار الام عالطلاق انصدم وائل ماتوقعش انه باته يطلع حقير حتى مع زوجته وام عويله اذكر امه يلي تشكي منه وماتت بسببه شد علي يده : هضا انسان ؟؟
وليد : مش مهم بس هو باتنا في الاخير وعارف انه عنده اخطاء واجد بس مانقدروش نحاسبوه فاهم عليا
وائل : ليش تحق فيا نبي انحاسبه ونقتله لو نبي انديرها كنت درتها من زمان من قبل حتى ما تعرفوني
وليد : لو كنت مكانك حانفكر زيك واشر بس مش حانقدر تعرف ليش لأنك انسان وحتى النمله ما اضرها
وائل : المطلوب شنو توا ليش هالمحاضره من امبدري
وليد ابتسم : حانقولك وعدا فتح الباب : تعالي يا امي
وائل استغرب وبحت في الحاجه يلي خشت ولا كأن في حد هزها هالحاجه جبل ما يهزها ريح رغم كبر سنها بس محافظه علي نفسها ومتعلمه دكتوره في الماجستير رغم وعارتها ما حقدت علي وائل حقدت عالحاج وبس قربت منه وقعدت جنب السرير وبحتت فيه : بعد تطلع من المستشفى حاتعيش في الفيلا
وائل : لا مش حانجي نعيش فيها هذي بذات لا واسف
الحاجه عطاته نضره وكملت كلامها : تبي انغيرو الفيلا !
وائل بحزم : لا هذي ولا هذي نبي نتريح وبس فخلوني نكمل حياتي مع زوجتي وولدي يلي جاي في الطريق
وليد ابتسم وفرح لان زوجته حامل والام انعجبت بوائل اكتر واكتر : اول شي مبروك علي حمل رهف وتاني شي مفروض تسمع كلام امك وترضا تعيش معاها معقوله ماتبيش تعيش مع خوتك حتى وليد وحسام وخالد يبو يعيشو في الفيلا خلاص وعشانك
وائل بحت في اعيونها وكلمة انه هي امه جمداته اذكر امه ولمعو اعيونه مابش يرد عليها اذكر انها في القبر
الحاجه : بحت فيا ومش كنت زمان تقولي يا امي ومهتم فياا وتعزني كان واضح اني مهم لك صح
وائل : لا ولان عندي اسبابي الخاصه وانتي عارفتيهاا
الحاجه : كذاب طبعا كذاب انا دكتوره في علم النفس ويلي شايفته توا هو الكذب في عيونك ننصحك ما تكذبش عليا لان عيب وعويلي ما يكذبوش وليث كذب عليا عشانك وانا كنت واثقه فيه بس ما زعلتش منه
وائل انصدم من كلمتها انه كذاب : شنو تبي مني ؟؟
الحاجه : اه منك الواضح انك صعب بكل مش عارفه كيف متحمل روحك انت صعب بس تنحب بسرعه وانا نحب الصعب عشان انخليه ساهل يا شاطر وانت مكمل تعليمك او لا ؟؟؟ وندمت لانها سألت هالسؤال من نضرته لهاا من دمعته يلي نزلت غصبا عليه وشير علي نفسه : ليش واحد كيفي متعلم يا دكتوره يا كبيره تحقي فيا متعلم ؟ انا متشوه عارفه شنو معناها واحد متشوه وكره الناس وهالشكل من 6 سنين عليا وعمري 28 سنه توا ومش متعلم كرهت كل شي والسبب هو الطاهر حاقد عليه حقد لا يوصف ياريت لو متت في بطن امي ياريت ما حملت فيا وطلعت عقيمه اهون
وليد : عيب هالكلام يا وائل خلاص يلي صار صار ما نبيكش اتعاود يلي قلته ادبالك اتعاوده وقرب منه ومسحله دمعته : انا حانقريك وكلنا حانصبوك انا وامي وخوتك كلهم فرد فرد ومش حانخلوك فاهم يا عنيد
الحاجه : اسمع كلام خوك وانا نبيك تعيش معاهم وحاتتعلم وتشتغل في الشركه عارفتك ماتحبش حد يمدلك حاجه وليث ساعدك واجد وخديت منه مش لان يمن عليك لا بالعكس هو قال انك فهمته غلط وتبي تردله كل قرش دفعته له واذا انت تبي ترد ليث فلوسه تعلم واشتغل في الشركه حاتمسك المحاسبه شنو رايك
وائل بهزوه : انتو شفقانين عليا ووضعكم هضا مخليني نتهزا حتى علي نفسي لاني خوكم وانا اسف عالتجريح بس انا قلت مانبيش نعيش في الفيلا ولا نبي الشركه
وليد عصب : خلاص معناها زوجتك احلم فيها مش حاتمشي معاك وحاتنحرم حتى من شوفت ولدك فاهم هيا يا امي خليه يتربا من اول وجديد واحد قليل ادب
وائل شد علي يده : انا مش قليل ادب انا متربي واحسن منكم اخرا انا عندي كرامه تخليني ما نمشي لحد لزني من حياته وانا مش حقود ولا عنيد ولا صعب انا ساهل بكل ساهل بس كل حد وصاحب طبعي وشخصيتي وزوجتي مكانها معايا مش معاكم ولو خديتوها ببساطه نتصل بالشرطه ونبلغ فيكم يا كبير
