#وجوه_مستعاره 👥 جديد الحلقه 16 ✍🏻
ع 8 المغرب / ليث نط من نومه وهو مخنوق ويرعش بحت في الساعه لقاها 8 تنهد : اوووف ليا واجد راقد انا بس شنو قصتي وليش فرح خايفه في الحلم شفتها وسط نار وتعيط وتنادي فيا زعما شنو في واتصل برقمها لقاها حاضرته اه يا بنت مجنونه وحق الله بس حانجيك واتشوفي وصبا للحمام وهو يفكر فيها ومشغول عليها بعد جهز روحه طلع وركب في سيارته وشرب اميه وبدا يسوق في طريقه للحوش كان في زحمه بالايش وصل نزل من السياره وقرب عند الباب وقلبه يدق وكان متوتر بكل ورن الجرس مرتين
فرح طلعت من الصاله وتسحبها رهف فتحت الباب بدون حجاب وبعد شفاته قدامها سكرت الباب في وجه
ليث : فرح افتحيلي نبي نحكي معاكي لو سمحتي !!!!
فرح لبست شالها وجاكتهاا وفتحت الباب ببرود وخشت جوا للصاله قدام الدفايه وكانت هاديه جدا
ليث خش وبحت فيها : عليش دايره بلوك لرقمي ؟؟
فرح : مش رقمي هضا رقم رهف يلي حكيت معاك بيه امس وحضرتك عشان ما تتصلش علي رقم مش لياااا
ليث بخبث : اها اوكي فهمت غايره يعني هههههههه
فرح طنشاته ومابتش أترد عليه وقعدت تتاوب 🥱
ليث يبحت فيها ويبتسم : نعسانه ليش مارقدتيش
فرح : امبدري ما جانيش نوم بس قبل اشويه نعست
ليث : باه ارقدي وتريحي وبعدها نحكو حانرجاك هنا
فرح : لالا قول يلي تبيها واطلع انا مستحيل نرقد ومعايا راجل في الحوش ماعنديش ثقه في حد وبعدين لما كنت نشتغل عندكم في روما انروح وننخمد في شقتي صح ولا غلطانه يا باش مهندس 🙄
ليث بضحكه : بس أنا مستحيل انضرك يا مجنونه
فرح : فكر زي ما تبي ولكن نوم مش حانرقد وانت هنا
ليث قرب منها وقعد جنبها حداه الدفايه هي ارتبكت ووخرت اشويه لان واجد قريب منها وترعش من سقع
ليث بهدوء : ما تخافيش مني بس نبي نحكي معاكي الراجل يلي امبدري هضا عمك صح وليش خايفه منه
فرح عيونها عالدفايه : ليش تبي تعرف شنو يهمك ؟؟
ليث : انتي عارفه غلاوتك عندي ليا 6 سنين نعرفك
فرح بهزوه : 6 سنين وزي اختك ولا عمرك حسيت فيا
ليث : يا فرح جاوبي علي سؤالي عشان نجاوبك !!
فرح : هضا عمي محسن يلي هربت من حوشهم 😔
ليث : باهي ليش هربتي منه خليك شجاعه قوليله مانبيش نعيش معاكم وانك متريحه توا في عيشتك
فرح : يا ليث افهمني صعب نوريهم وجهي مره تانيه يلي داروه فيا مش ساهل لا هما ولا ولدهم الحقير وسكتت بعد فطنت لكلمتها يلي حكتها بدون قصد
ليث ركز في اخر شي : ولدهم ؟ هما عندهم كم واحد
فرح : واحد بس يحبوه ومدلعينه وما يتحملو في شي
ليث شد علي يده : اها باهي كأن ولدهم مضايقك ؟؟؟
فرح بلعت ريقها : لالا مافيش شي وجات تبي تصبي
ليث كرها مع يدها وخلاها تقمعز في مكانها ومابش يطلق يدها وبحت فيها : ولد عمك حمزه ضايقك ؟؟؟
فرح انصدمت من يلي داره توا ومن اسم حمزه يلي يعرفه بحتت فيه : حمزه ليش منين تعرف اسمه انت
ليث : جاوبيني يا بنت الناس شنو دار فيك ردي علياااا
فرح قعدت تبكي : حانقولك بس حاتصدقني ؟؟؟
ليث : صدقيني حانصدقك بس احكيلي وريحيني شنو قصتك وليش خايفه ريحيني بالله عليك شعلتي النار فيا لا عرفت نرقد ولا عرفت نتريح يلي صار امبدري شتتني وطلق يدها يلي تبحت فيها ورفعت راسها بحتت فيه مستغربه تصرفاته ويلي حكاه وكيف مهتم بقصتها وبكل شي بلعت ريقها : حانقولك ونزلت راسها
ليث اعيونه عليها ومركز في كل حرف تحكي فيه 🔥
