#وجوه_مستعاره 🎭 جديد الحلقه 1 👥
المقدمه عليها /
فيلا فخمه وجميله علي طابقين مالكها متقاعد كبير في العمر حوالي 85 سنه اسمه الحاج طاهر طيب بكل
زوجته وأم عويله اسمها منيره 72 سنه واعره شويه
عندهم 4 شباب وبنتين أكبرهم
حسام 45 سنه متزوج وعنده بنتين صغار
خالد 42 سنه متزوج وعنده ولد وحامل زوجته
وليد 39 سنه عازب
نعيمه 35 سنه متزوجه
نجاح 30 سنه عزباء
ليث 27 سنه عازب ونسونجي
عمتهم اسمها سميه عمرها 70 سنه طيبه بكل
زوجها حسين 77 سنه انسان اصيل بمعنى الكلمه
ولدهم الكبير ميلاد 38 سنه متزوج بنعيمه
خلود 30 سنه متزوجه سالم صديق خوها ميلاد
حنان 26 سنه عزباء ومتخرجه
إسراء 23 سنه عزباء وطالبه في الكليه
الحلقه 1 /
قاعد يبرم في سيارته وهو راقيتله ومعصب مش عارف شنو يدير خاصة من اتصال باته الحاج طاهر اتصل في وقت مش مناسب اتصل وهو مش طايق نفسه او يحكي مع حد او يشوف ويتناقش مع ناس جاه في عقله ان كلمه عشان شغل في شركتهم يمشي يشوفه لان ديما الحاج يحكو معاه في الحوش مكالمات وهو يختار حد من عويله يشوفهم ويهتم بأمر المشاريع وكل شي مهم وتوا وصل قدام فيلا الطاهر نزل من سيارته وهو خاش شاف باته في حديقه عدا لعنده : خير يا باتي كلمتني شنو في !
الحاج طاهر : اها يا وليد كلمتك نبيك في موضوع
وليد : خير ان شاء الله شنو في ؟
الحاج : نبو نخطبولك بنت عمتك موافق عليها ؟
وليد شد علي يده : اي وحده فيهم من بنات عمتي
الحاج : هما 3 بنات وحده صغيره والكبيره متزوجه ومافيش الا الوسطيه يا وليدي ، حنان شنو رايك فيها
وليد بحت في الشمس وتنهد : انا اسف ما نبيهاش
الحاج انصدم اول مره وليد يرفض طلب بحت فيه وصبا من الكرسي : ليش كنها البنت شنو ناقصها ؟
وليد : مش هكي الموضوع يا باتي بس انا مانقدرش ناخدها صعب واجد عليا اني ناخد حنان بذات
الحاج : باهي خود الصغيره اسراء يلي مزالت ما تخرجت معقوله المتخرجه ما عجباتك ؟
وليد : مافيش فرق بين الطالبه والمتخرجه ولكن مش موضوعي بكل سوا متخرجه او لا ، يلي يهمني شي اخر انا عاجبتني بنت تانيه ومانبيش غيرها يا باتي
الحاج بحت في ولده : من البنت يلي بدلتها علي بنات عمتك قولي من هي ؟
وليد : خلود اختهم الكبيره يلي تزوجت 💔
الحاج أنصدم : شنو اتقول تفكر في وحده متزوجه
وليد بلع ريقه : غصبا عليا مشكلتي تأخرت مفروض خطبتها من زمان ولكن كنت مسافر وهما عطوهاا ماقدرتش نقول لعمي صعب في الاخير حكيتلك
الحاج : لا اسمعني خلود طلعها من راسك وبعد أسبوع امك حاتخطبلك حنان اختها فاهم وترفض مش مسامحك وقعد يكح من صدمته يلي سمعهاا
وليد تعقد بس خاف علي باته وقرب منه دغري عطاه اميه وخلاه يقمعز عالكرسي وما قالش حرف واحد
الحاج بحت فيه : فاهم حاتخد حنان بنت عمتك
وليد غصبا عليه هز راسه بمعنى موافق 💔
