#وجوه_مستعاره 👥 جديد الحلقه 22 ✍️
ليث خش لغرفته وهو يبتسم : اذكرتني وووو واخيرا كنت حانريح فيها ونخش لمستشفى المجانين بسببها والله هالبنت مش ساهله بس المهم عندي انها اذكرتني وعرفتني كويس لما كانت فاقده ذاكرتها كانت وحده معقده وتعبتني ركبتلي الضغط والسكر هههههههههه
ميلاد خش للميتم وخايف اشويه من الخطوه هذي بس ضروري يديرها عشان زوجته تحلم اتكون ام خش جوا وحكاه معاهم وعن وضعها : نتمنه تقدرو وضعها ونبي طفل او طفله نتبناهم وعندي كتيب عائله للتأكيد
رد المدير بعد شاف الكتيب : ربي يعوضكم وبالنسبه للتبني في بنت جاتنا من حوالي 5 ايام ماتبيش تقعد هنا وتبكي وماتريحتش عندنا تعال نوريها لك من بعيد
ميلاد صبا : وهي كم عمرها وعيلتها متوفيه او شنو
رد المدير : لا عيلتها عايشين مع الاسف بس لما اطلقو تخلو عن بنتهم كل واحد يبي يعيش حياته وسيبو هالبنت المسكينه يلي تبكي وخلاص وحالتها حاله
ميلاد : لا حول ولا قوة الا بالله الناس ميته عالخلفه وفي ناس تعزق في عويلها وتتخلى عليهم ربي يهديهم
رد : ان شاء الله وشير عالطفله : شفتها قاعده بروحها وساكته اسمها ساره عمرها 6 سنين تبي تطلع من هنا
ميلاد لما شافها ابتسم : ربي يحفظها ما شاء الله عليها
رد المدير : متعبه الحق لا تاكل ولا شي بالغصب تاكل
ميلاد : انا حانخدها وبأذن الله حانحطها في أعيوني انا وزوجتي وان شاء الله تتعود علينا وتعتبرنا عيلتهااا
رد : ان شاء الله وعيلتها الله يسامحهم ماعندهم رحمه
ميلاد وجعاته البنت وعدا وقع تعهد علي اهتمامه بساره هو وزوجته ولو صارلها شي حايتحاسب ✍🏼
المدير كلم الموظفه : لو سمحتي جهزي شنطة ساره ادريس وجيبيها هنا وطبعا يا سيد ميلاد ماتغيرش كنيتها ولا اسمها هضا القانون وان شاء الله خير
ميلاد : حاضر وخايف مش حاتمشي معايا او تخاف
رد : لا هي مش خوافه وحاتمشي معاك لكن صعبه
ميلاد بحت فيها جابوها هنا وواضح انها زعلانه قرب منها وهو يبتسم : ساره انا جيت عشان ناخدك من هنا
ساره بحتت فيه ومسكت يده : خودني مانبيش نقعد هنا هيا شيلني توا وتوا وميلاد فرح والمدير اشرله وهو يبتسم : قتلك ماحبتش الميتم ونصيبها تقعد عندكم
ميلاد : انت ادعي تتريح عندنا وتوافق تعيش معانا
رد المدير : بلغني شنو يصير معاك وهضا رقمي
ميلاد : تمام شكرا وبارك الله فيك وبحت في ساره يلي تكر في يده تبيه يمشي ضحك وخداه الشنطه وطلعو مع بعضهم فرحت واجد وبانت فرحتها حاتطلع من الحبس هضا فتحلها الباب : قمعزي يا اموره يلا
ساره قمعزت وهي فرحانه وميلاد طاير من الفرحه ودغري قعد يسوق وكل اشويه يبحت فيها ويبتسم ولما وصلو للحوش قعدت تبحت اشر عليه : هضا حوشنا تعالي نوريك نعيمه توا تحبيها نديرولها مفاجأه
ساره : نفجعوها انا نبي نفجع بس من نعيمه وانت ليش خديتني يا عمو ووين بابا وماما حطوني وعدو 🥺
ميلاد مسك يدها : يا عمري نعيمه هي زوجتي انا وباتك وامك الله اعلم بظروفهم بس نبيك تكوني قويه من توا وتتعودي عالعيشه معانا واهم شي تاكلي وتشربي راه نزعل منك ونردك للميتم وهي خافت : لا خلاص يا عمو حانسمع الكلام المهم مانبيش الميتم
ميلاد وجعاته ونزل فتحلها الباب وهي مسكت يده وكانت فرحانه وعدو شور باب الحوش فتحه ميلاد واشر لساره تلحقه وخلاها وراه وعدا للمطبخ شاف نعيمه اطبخ وسارحه بحت فيها بحب : خيرات ❤
نعيمه بحتت فيه : اهلين غريبه جيت بدري اليوم
ميلاد : لاني واخد اذن اليوم مانبيش نمشي وحانطلعو نغيرو جو نحنا ال3 شنو رايك وهي بحتت فيه وشفاته شايل طفله صغيره تضحك وفرحانه انصدمت : من هذي يا ميلاد وقربت منها وساره تضحك وفرحانه
ميلاد بحت فيها : تبنيتها من الميتم يا نعيمه نحنا مسؤلين عليها توا وانا متأكد انك حاتكوني قدهااا
نعيمه قعدت تبحت في البنت يلي فرحانه ونزلها ميلاد عدت تجري وتتفرج عالحوش نزلو دموع نعيمه : جبتها لاني ما حملتش صح خاطرك تقعد اب فجبتها لياا
ميلاد مسح دموعها : لا جبتها عشانك انتي لاني انحبك جبتها وهي حرام مسكينه باتها وامها خلوها بعد اطلقو يبو يعيشو حياتهم من غير بنتهم وهي فرحانه لما طلعت من الميتم تبي تخربي فرحتها واتقول انك ما تبيها وحاتمشي للميتم اخرا وهي ماتبيش حرام صح
نعيمه قمعزت ويلي سمعاته يقهر جات عيونها عالبنت جاتهم وخشت للكوجينه : انا جعانه يا عمو ومسكت يده : هيا عمو قول لزوجتك اديريلي سندوتش 🥺
نعيمه دمعو عيونها وصبت مسكت يدها : تعالي ياعمري جعانه انتي توا نديرلك اجمل سندوتش من عيوني الاتنين وساره فرحت وقعدت تراجي فيها وكل اشويه تلمس حاجه في الكوجينه كانت شيطانه وحركتها واجده بس تنحب بسرعه اعيونها عسلي والبنت شعله ربي يحفظها ميلاد يتفرج عليهم ويبتسم : بعد الغداء حانطلعو ونمشو السندباد ونجيبو ألعاب معانا تمام
ساره فرحت : هيييي شكرا عمو شكرا وجاته وباست خده وهو ضحك علي حركاتها يلي تجنن وعدت تاكل وهي فرحانه لاحظ علي نعيمه تبحت فيها وتبتسم
ساره : عميمه نعيمه كنك تبحتي فيا هكي وشكرا حلو السندوتش امتعك نبي اميه عميمه ونعيمه تبحت وكانت فرحانه جابتلها اي شي تطلبه انفتحت شهيتها بعد جات لعندهم وقربت من ميلاد : انا كليت ما تشيلنيش للميتم ارجوك يا عمو مانبيش نقعد عندهم
ميلاد حطها في كتره : ومش حانشيلك عندهم تمام
ساره فرحت وحضناته : شكرا عمو انت كويس 🥺
ميلاد ابتسم واعيونه علي نعيمه من الفرحه قعدت تمسح في دموعها وتبتسم وطاير عقلها واجد ❤
